Ձեր վստահելի աղբյուրը

14 կողմ, 0 դեմ, 0 անվավեր ձայներով Վարդենիս խոշորացված համայնքի ղեկավար է ընտրվում ընդդիմադիր «Ահարոն Խաչատրյան» դաշինքի թեկնածու Ահարոն Խաչատրյանը: Վարդենիսի քաղաքապետարանում հայտարարեց Վարդենիսի ավագանու ընդդիմադիր անդամ Սաթենիկ Մինասյանը:

Ահարոն Խաչատրյանը շնորհակալություն հայտնեց «Միասնական Վարդենիս» և «Ահարոն  Խաչատրյան» խմբացություններին իր թեկնածությունն առաջադրելու և պաշտպանելու համար։ Նա վստահություն հայտնեց, որ միասին ի զորու են  լուծելու Վարդենիս համայնքի առաջ ծառացած խնդիրները, բոլորի նպատակն է Վարդենիսի շենացումն ու հզորացումը։

Համայնքի ղեկավարի ընտրությանն ավագանու ՔՊ-ական անդամները չմասնակցեցին։

Դեկտեմբերի 5-ին կայացած ՏԻՄ ընտրություններին Վարդենիս խոշորացված համայնքում երեք քաղաքական ուժ է մասնակցել՝ «Քաղաքացիական պայմանագիր» կուսակցությունը, «Միասնական Վարդենիս» և «Ահարոն  Խաչատրյան» դաշինքները։ Ընտրությունների արդյունքներով ընդդիմադիր երկու դաշինքները միասին 27  հոգանոց ավագանու կազմում ունեցել են 15 մանդատ, ՔՊ-ն՝ 12 մանդատ։ Վերահաշվարկի արդյունքում «Միասնական Վարդենիսից» մեկ մանդատ վերցվել և տրվել է  ՔՊ-ին։ Արդյունքում ավագանու կազմում 14 մանդատ ունեցան երկու դաշինքները, 13 մանդատ՝ ՔՊ։