Ձեր վստահելի աղբյուրը

Վարդենիսի համայնքապետարանի դիմաց բազմաթիվ բնակիչներ են հավաքվել. աղմուկ-աղաղակ է։
Շենքից դուրս եկած ավագանու անդամներից մեկն առաջարկեց  ծափահարել։

«Ժողովուրդ, ձեր ցավը տանեմ, ամեն ինչ գնում է իր հունով, ինչպես օրենքն է պահանջում, ժողովուրդն է պահանջում։ Առանց որևէ ավելորդ քայլի խնդրում եմ, սպասեք մի քիչ էլ, ինչպես սպասել եք առավոտից»,-ասաց նա։

Դրանից հետո վարդենիսցիները սկսեցին վանկարկել «հաղթանակ»։

«Նորից եմ խնդրում, հանգիստ, առանց որևէ ավելորդ բաների սպասեք, մինչև արձանագրությունները վերջնականապես ստորագրվեն, և մենք ողջունենք մեր հերոսներին։ Հանգիստ եղեք։ Մի հատ ծխեք, հանգստացեք, ձեր ցավը տանեմ»,-ասաց ավագանու անդամը, ինչից հետո հավաքվածները ծիծաղեցին։

Հավաքվածների մեջ էր նաև ՔՊ-ի ընտրացուցակը գլխավորող Արամ Մելքոնյանի հայրը, ով հայտարարեց՝  շնորհավորում է Ահարոն Խաչատրյանին համայնքապետ ընտրվելու կապակցությամբ։

Մինչ շենքից դուրս  այս տրամադրությունն էր, շենքի ներսում աշխատակազմի քարտուղարին էին փնտրում, որպեսզի արձանագրությունները ստորագրի։ Կասկած կա, որ նա մտել է զուգարան ու դուրս չի գալիս։