Ձեր վստահելի աղբյուրը

Գեղարքունիքի Վարդենիս համայնքում դեկտեմբերի  5-ին կայացած ՏԻՄ ընտրություններից հետո դեռ համայնքապետ չեն ընտրել։ Այսօր ավագանու անդրանիկ նիստն անընդհատ ուղեկցվում է գոռգոռոցներով, վիճաբանությամբ։

Առաջին նիստն այդպես էլ չկայացավ։

Հաջորդ նիստը փորձեցին հրավիրել «Ահարոն Խաչատրյան» ու «Միասնական Վարդենիս» դաշինքները։ Ավագանու ՔՊ-ական անդամները ներկա չէին նիստին։

«Ահարոն Խաչատրյան» դաշինքի անդամ, նիստը նախագահող Սաթենիկ Մինասյանին առաջարկեցին ներս հրավիրել աշխատակազմի քարտուղարին, որպեսզի նիստը շարունակեն, երկար սպասել չեն կարող։ Զարոյանը չեկավ։

Ավագանու անդամներից մեկը հեռախոսով զրուցելուց հետո հայտարարեց, Զարոյանին ներս գալ չեն թողնում ոստիկանները։ Լրագրողների միջանցք դուրս գալուց հետո քարտուղարը եկավ դահլիճ։

Նախագահողը նիստը բացված համարեց, ընթերցեց նիստին մասնակցող ավագանու անդամների անունները։ Մասնակցում էր ավագանու 14 անդամ, քվորումն ապահովված էր։

Ս. Մինասյանն ընթերցեց օրակարգում ընդգրկված  հարցերը, որոնք վերաբերում են համայնքապետի ընտրությանը, երդմնակալությանը։ Արձանագրողին ներկայացրեցին խմբակցությունների կանոնադրությունները։

Այս ամենից հետո «Ահարոն Խաչատրյան» դաշինքն առաջադրեց Ահարոն Աղաբեկի Խաչատրյանի թեկնածությունը որպես Վարդենիս խոշորացված համայնքի ղեկավարի թեկնածու։

Մինչ փաստաթղթերը հանձնում էին արձանագրողին, վերջինը հերթական զանգը ստացավ։

«Ասի էլ չզանգեք ինձի»,-պատասխանեց նա, անջատեց հեռախոսն ու մի կողմ նետեց։
Բայց զանգ էլի եկավ։

«Ասում եմ՝ չզանգեք ինձ, չես լսում դու ինձ»,-բարկացավ արձանագրողը։

Լրագրողները հետաքրքրվեցին, ո՞վ է զանգում, սակայն պատասխան չեղավ։

«Միասնական Վարդենիս» խմբակցության ներկայացաւոցիչն ասաց՝ իրենք պաշտպանելու են Ահարոն Խաչատրյանի թեկնածությունը, թեկնածու չի առաջադրում, քանի որ հուշագիր են ստորագրել, հավատարիմ են մնում հուշագրին։

Հենց այդ պահին ավագանու ՔՊ-ական անդամը՝ Մանուչարյանը ներս մտավ դահլիճ ու հայտարարեց՝ փաստաբան են հրավիրել, անցկացվող նիստը իրավազոր չէ։

«Մենք հանգիստ նստած մեր անելիքներն ենք քննարկում, մեկ էլ ուղիղ եթերով տեսնում ենք մի պատ այն կողմ այն, ինչ տեղի է ունենում։ Պահանջում ենք՝ էս խեղկատակությունը դադարեցնել։ Քանի դեռ մեր փաստաբանը չի մտել էս սենյակ, չշարունակեք»,-ասաց նա։

Ի պատասխան, «ահարոն Խաչատրյան» դաշինիք անդամ Սաթենիկ Մինասյանը նշեց, երբ իրենց այս դահլիճից բռնի ուժով հանում էին, որտե՞ղ էր Մանուչարյանը։ Հարցը բարկացարեց վերջինին, ասաց՝ որտեղ կուզի կլինի, պարտավոր չէ պատասխանել այդ հարցին։

ՔՊ-ականը դուռը շխկացրեց ու դուրս եկավ։ Նիստը շարունակվեց։ Միջանցքից հնչում էին Մանուչարյանի գոռգոռոցները, որոնք ուղեկցվում էին «գլուխդ կջարդեմ, տականք» ու այլ արտահայտություններով։