Ձեր վստահելի աղբյուրը

Կառավարությունը «Զանգեզուրի պղնձամոլիբդենային կոմբինատ» փակ բաժնետիրական ընկերության`  ՀՀ սեփականություն հանդիսացող 15 տոկոս բաժնետոմսերով հավաստված իրավունքները հանձնեց «Հայաստանի պետական հետաքրքրությունների ֆոնդի» հավատարմագրային կառավարմանը։ Կառավարության նիստում փոխվարչապետ Համբարձում Մաթևոսյանն ասաց, որ միաժամանակ պահպանվում է բաժնետոմսերի նկատմամբ պետության սեփականության իրավունքը։

Նիկոլ Փաշինյանն ասաց, որ առաջին անգամ պետությունը ունի բաժնեմաս «Զանգեզուրի պղնձամոլիբդենային կոմբինատ»-ում:

«Այս գործարքը շատերին կասկածելի է թվացել: Այն, որ պետությունն իր հիմնական ռազմավարական ակտիվից երկար տարիներ զրկվում էր և զրկված է եղել, դա, փաստորեն, կասկածելի չէ, իսկ այն, որ պետությունը ձեռք է բերել, ոմանք փորձում են  դրա մեջ կոռուպցիոն հետքեր ու գործարքներ գտնել: Կոռուպցիայի արդյունքում պետությունը ոչ թե ստանում է, այլ պետությունը կորցնում է, դա մենք տեսել ենք երկար տարիներ»,-ասաց նա:

Փաշինյանը նշեց, որ «Զանգեզուրի պղնձամոլիբդենային կոմբինատ» ՓԲԸ-ի 15 տոկոս բաժնետոմսերի սեփականատերը ՀՀ վարչապետի աշխատակազմ է, բայց այս փաստից որոշակի գործառույթներ են բխում, կարծում են, որ դրանք վարչապետի աշխատակազմը չպետք է անի։

«Դրանք կառավարման հետ կապված ամենատարբեր գործառույթներ են, և այս բաժնեմասի կառավարումը մենք հանձնում ենք էլի մեր կողմից հիմնադրված Հայաստանի պետական հետաքրքրությունների հիմնադրամին։

Մեր բաժնեմասի չափով Հայաստանի կառավարությունը ԶՊՄԿ տնօրենների խորհրդում կունենա ներկայացուցիչ:

Շահույթի բաշխման պարագայում տվյալ չափով շահաբաժինն արդեն կդառնա պետական բյուջեի եկամուտ»,- նշեց նա։