Ձեր վստահելի աղբյուրը

Ռուսաստանի նախագահ Վլադիմիր Պուտինը հեռախոսազրույցներ է ունեցել Նիկոլ Փաշինյանի ու Բելոռուսի նախագահ Ալեքսանդր Լուկաշենկեյի հետ։

Ռուսական ԶԼՄ-ների փոխանցմամբ, քննարկվել է Ղազախստանում տիրող իրավիճակը։

Փաշինյանը տեղեկացրել է, որ Հայաստանը՝ որպես ՀԱՊԿ նախագահող երկիր կազմակերպում է ՀԱՊԿ նիստ։ 

ՀԱՊԿ նիստ անցկացնելու առաջարկ արել էր Ղազախստանի նախագահը, Պուտինը հավանության էր արժանացրել նրա առաջարկը։

Հիշեցնենք, որ Ղազախստանում լայնածավալ բողոքի ցույցեր սկսեցին հունվարի 2-ին։ Ժանաոզեն և Ակտաու քաղաքի բնակիչները դուրս եկան փողոց՝ բողոքելով գազի կրկնակի թանկացման դեմ։ Ավելի ուշ բողոքի ակցիաները տարածվեցին երկրի ողջ տարածքում, սկսկեցին բախումներ ոստիկանների ու ցուցարարների միջև, խանութների թալան, մեքենաների հրդեհում, պետական մարմինների շենքերի զավթում։

Ի պատասխան Ղազախստանի իշխանությունները  հայտարարեցին արտակարգ դրություն մինչև հունվարի 19-ը և սկսեցին հակահաբեկչական գործողություններ իրականացնել։

ՄԱԿ-ի տվյալներով, Ղազախստանում տարբեր աստիճանի վնասվածքներ է ստացել ավելի քան հազար մարդ։ ՆԳՆ-ն ավելի վաղ հայտարարել էր, որ բախումների ու անկարգությունների ժամանակ զոհվել է 18 ուժային։ Ղազախստանում ՀՀ դեսպանության հաղորդմամբ՝ ՀՀ քաղաքացիների շրջանում տուժածներ չկան։

Հունվարի 5-ին այդ երկրի նախագահ Քասիմ-Ժոմարտ Տոկաևն ընդունեց կառավարության հրաժարականն ու ղեկավարեց Անվտանգության խորհուրդը։ Հենց առաջին նիստում նա իրավիճակը որակեց որպես երկրի տարածքային ամբողջականության խարխլում և հայտարարեց, որ դիմել է ՀԱՊԿ-ին՝ դիմակայելու ահաբեկիչներին։

ՀԱՊԿ հավաքական խաղաղապահ ուժերն արդեն Ղազախստանում են։