Ձեր վստահելի աղբյուրը

«Ինձ համար կանխատեսելի չէր ԲԴԽ այս որոշումը, բոլոր դեպքերում պատրաստ էի ամեն ելքի: Շատ լավ է, որ այսպիսի որոշում կայացվեց և կայացվեց միաձայն»,- ԲԴԽ որոշման հրապարակումից հետո լրագրողների հետ զրույցում ասաց Երևանի ընդհանուր իրավասության դատարանի դատավոր Զարուհի Նախշքարյանը:

Հիշեցնենք, որ Բարձրագույն դատական խորհուրդը մերժեց Երևանի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու վերաբերյալ արդարադատության նախարարի միջնորդությունը:

Դատավորը նշեց, որ իր ցանկությունն է՝ այսուհետև արդարադատության  նախարարությունն ավելի մեծ ջանք գործադրի  հիմնավորվածության տեսանկյունից կարգապահական վարույթներ հարուցելիս և ոչ թե քանակության վրա շեշտը դնի, ինչպես բազմիցս արդարադատության նախարար պարոն Անդրեասյանը նշել է: 

«Չի կարող ինքնանպատակ լինել իրեն դուր չեկող անձանց հեռացնել համակարգից: Լիահույս եմ, որ մեր դատական իշխանության ներկայացուցիչները, իմ բոլոր գործընկերները, տեսնելով այս վարույթը, կլցվեն համոզմունքով և այլևս չեն հիասթափվի,  պատրաստակամ կլինեն, համարձակ կլինեն, անկախ կշարունակեն գործել»,- ասաց Զարուհի Նախշքարյանը:

Դատավորի ներկայացուցիչ Ռուբեն Մելիքյանը նշեց, որ այսօր տեղի չունեցավ անարդարություն.  «Երևանի ընդհանուր իրավասության դատարանի դատավոր Զարուհի Նախշքարյանը շարունակում է  պաշտոնավարել որպես դատավոր: Զարուհի Նախշքարյանը բավական մեծ հեղինակություն ունի առնվազն մասնագիտական հանրության մեջ, կարծում եմ, շատ փաստաբաններ ուրախ են, որ մեր դատական  համակարգը շարունակելու է ունենալ Զարուհի Նախշքարյան»:

Նա նշեց, որ որոշման եզրակափիչ մասն իրենց բավարարում է, բայց ԲԴԽ նախագահի պաշտոնակատար Գագիկ Ջհանգիրյանը հրապարակեց փաստարկման հետ կապված մի դրույթ, որն իրենց համար այնքան էլ ընդունելի չէ:

«Մենք այնպես հասկացանք՝ ԲԴԽ-ն, հանդես գալով որպես դատարան, որոշել է, որ խախտում եղել է, բայց իր բնույթով այնպես չէ, որ հեղինակազրկած լինի դատական իշխանությունը»,- ասաց փաստաբանը:

Զարուհի Նախշքարյանի մյուս ներկայացուցիչը՝ փաստաբան Սիրանուշ Սահակյանը, նշեց, որ ըստ որոշման, արարքը ֆորմալ առումով մի փոքր պարունակել է խախտման հատկանիշներ, սակայն իր նվազ նշանակությամբ չի հեղինակազրկել դատական իշխանությանը:

«Մենք այս մոտեցման հետ համաձայն չենք: Ի սկզբանե Զարուհի Նախշքարյանի  արարքում  որևէ խախտման, անգամ ձևական, հատկանիշներ առկա չեն եղել, իրականացրել է արդարադատություն, արդարադատության շրջանակներում տվել է փաստերի և ապացույցների մեկնաբանություն, որը  դատավորների բացառիկության տիրույթում է և որևէ քաղաքացի, պաշտոնատար անձ չի կարող իր գնահատականներով կասկածի տակ դնել  դատարանի գնահատականը: Եթե անգամ այդ փուլերում տեղի են ունենում սխալներ, ինչն այս դեպքում բնավ տեղի չի ունեցել, դրա համար ստեղծվում են վերաքննիչ դատարաններ, գործում է վճռաբեկ դատարան և նմանատիպ խնդիրները պետք է լուծվեն վերաքննության արդյունքում, բայց երբևէ  այդ հատկանիշներով դատավորի  գործունեությանը չեն կարող միջամտել և սպառնալիքներ, այդ թվում կարգապահական պատասխանատվության տեսքով, չեն կարող ստեղծել դատավորների համար: Սա դատական իշխանության անկախության հարցն է, և մենք այստեղ ունենք այդ մոտեցումը և պետք է պայքարենք այնքան, որպեսզի  յուրաքանչյուր դատավորի առնչությամբ այս սկզբունքը հարգվի»,- ասաց նա:

Հարցին՝ վիճարկելո՞ւ եք այդ կետը, Ս. Սահակյանը պատասխանեց, որ իրենք երեք գործընթացներով են անցել, որոնցից երկուսը մերժվել են նվազ նշանակության հիմքով, իսկ մեկի պարագայում անգամ ունեն խիստ նկատողություն և առաջիկայում իրենց այլ իրավական գործընթացներ են սպասվում թե երկրի ներսում, թե  երկրի սահմաններից դուրս:

Ռ.Մելիքյանը հավելեց, որ այս ամենը վերաբերում է ոչ միայն և ոչ այնքան կոնկրետ դեպքին, այլ առհասարակ դատական իշխանության անկախությանը, դատական իշխանության ինքնագնահատականին:

Հիշեցնենք, որ դատավոր Զարուհի Նախշքարյանի նկատմամբ կարգապահական վարույթ է հարուցվել ՀՀ արդարադատության նախարարի կողմից՝ Հանրային խորհրդի նախկին նախագահ Ստյոպա Սաֆարյանի հաղորդման հիման վրա։ Ստյոպա Սաֆարյանը «դժգոհ» էր մնացել դատավորի կայացրած որոշումից, որով դատարանը Սաֆարյանին պարտավորեցրել էր ներողություն խնդրել լրագրողից և վճարել 600.000 ՀՀ դրամի չափով փոխհատուցում։

Հանրային խորհրդի նախկին նախագահ Ստյոպա Սաֆարյանն անդրադառնալով ԲԴԽ որոշմանն ասաց, որ  այս շենքում արդարադատություն փնտրել այլևս հնարավոր չէ. «Այս շենքը, ինչպես նաև բոլոր դատարանների շենքերը, պետք է մաքրվեն օրենքի դեմ գործող, օրենքը ոտնահարող դատավորներից: Դա ես անելու եմ: Ես ինձ միայն նվիրելու եմ վեթթինգին»:

Բարձրագույն դատական խորհուրդը Երևան քաղաքի ընդհանուր իրավասության դատարանի դատավոր Զարուհի Նախշքարյանի վերաբերյալ արդեն երկու կարգապահական վարույթով որոշում կայացրել է. ԲԴԽ-ն  միջնորդություններից մեկը մերժել էր, իսկ մյուսով՝ «Իկրայի գործով», կիրառել խիստ նկատողություն։ Զարուհի Նախշքարյանին արդարադատության նախարարությունը մեղադրում է այն բանի համար, որ Նիկոլ Փաշինյանի դստեր հայցով քննվող «Իկրայի գործի» շրջանակներում ինքնաբացարկ չի հայտնել՝ այն պայմաններում, երբ ժամանակին քննադատել է հայտնի «վնգստացող դատավորներ» արտահայտությունը։

Եվս մեկ նկատողություն Զարուհի Նախշքարյանին,  նրա՝ դատավորի լիազորությունները կդադարեցվեին։