Ձեր վստահելի աղբյուրը

Երևան քաղաքի ընդհանուր իրավասության դատարանի դատավոր Սերգեյ Սահակյանն այսօրվա նիստում հայտարարություն  է արել, որը ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանն աբսուրդային է որակում։

Հիշեցնենք, որ Երևան քաղաքի ընդհանուր իրավասության դատարանի Քանաքեռ նստավայրում այսօր քննվում էր  Ռոբերտ Քոչարյանն ընդեմ Նիկոլ Փաշինյանի հայցը։ Հայկ Ալումյանն ինքաբացարկ էր հայտնել դատավորին՝ հիմնավորելով, որ նա չի ընտրվել համակարգչային մակագրմամբ, ինչպես սահմանում է Դատական օրենսգիրքը։

«Անցած տարվա հունիս ամսից ԱԱԾ-ն առգրավվել է համակարգիչները, այդ օրվանից սկսած մինչ օրս դատական կազմերն ընտրվում են դատարանների նախագահների միանձյա ու կամայական որոշումներով, ինչը Եվրոպական կոնվենցիայի 6-րդ հոդվածի՝ օրենքի վրա հիմնված դատարանի սկզբունքի խախտում է։ Այդ հիմքով էինք բացարկ հայտնել դատավոր Սահակյանին՝  նշելով, որ այս կազմով դատարանը չի կարող համարվել օրենքի վրա հիմնված։ Բացարկի միջնորդությունը մերժվել է»,-դատական նիստի ավարտից հետո  լրագրողների հետ զրույցում ասաց Ալումյանը։

Նրա խոսքով,  որոշման մեջ ոչ մի բան ասված չէ բացարկի բուն թեմայի վերաբերյալ, դատավորն իր որոշման մեջ քննարկում է՝ արդյո՞ք հիմքեր կան կասկածելու իր անաչառությանը։

«Բայց անաչառության հարց  բարձրացված չէր։ Ահա այս հայտարարությունը բարձրացվեց դատարանում»,-ներկայացրեց Ալումյանը։

Նշենք, որ դատական դռնբաց նիստի տեսանկարահանմանը դեմ էր արտահայտվել Նիկոլ Փաշինյանի ներկայացուցիչը։

Նիստում Ալումյանը բարձրացրել է նաև այն  հարցը, թե արդյո՞ք պատասխանող կողմի փաստաբանը կարող է հանդես գալ որպես ՀՀ ներկայացուցիչ։ Փաշինյանը փաստաբանին լիազորել է հանդես գալ վարչապետի անունից, մինչդեռ, ըստ Ալումյանի, այս գործով պատասխանողը ոչ թե վարչապետն է, այլ Հայաստանի Հանրապետությունը։

«Մյուս կողմի փաստաբանը ու դատավորը համատեղ ջանքերով փորձեցին այդ իրավիճակը տեղավորել օրենքի մեջ։ Դատավորն ընդհուպ հայտարարեց, իմ գնահատականով մի աբսուրդային բան, որ երբ մենք նշել են ՀՀ-ին պատասխանեց, պետք է նաև նշեինք, թե ՀՀ-ի անունից որ մարմինը պետք է գա դատարան։ Նման պահանջ օրենքում չկա։ Դատավորն այս կարգի աղավաղումների գնաց, որպեսզի արդարացնի այդ լիազորագրի բովանդակությունը»,-ասաց փաստաբանը։

Ալումյանը համարում է, եթե դատավորն «այդ կարգի կաշկանդված է վարչապետից», որ նման աղավաղումներով ընդում է լիազորագիրը, ապա նա չի կարող այս գործով որոշում կայացնել օբյեկտիվ կերպով։

«Այս գործով ավելի լուրջ բան է գնահատվում, քան այս լիազորագրի՝ օրինական լինել-չլինելը։ Այս գործով քննարկվում է քաղաքացի Նիկոլ Փաշինյանի կողմից զրպարտչական արտահայտություններ անելու հանգամանքը, և Հայաստանի Հանրապետության անունից իմ վստահորդի անմեղության կանխավարկածը խախտելու հանգամանքը։ Մի դատավոր, որը չի համարձակվում  չընդունել ակնհայտ ապօրինի լիազորագիր, քանի որ դրա տակ դրված է վարչապետի ստորագրությունը, բնականաբար չի կարող այդ նույն անձի դեմ վճիռ կայացնել։ Բացարկ ենք  ներկայացրել դատավորին, քանի որ իր համար վարչապետի գործողություններն անքննելի են։ Հիմա ինքը մինչև հունվարի 13-ը ժամանակ ունի որոշում կայացնել այդ բացարկի վերաբերյալ»,-ասաց Ալումյանը։

Նա հիշեցրեց, որ միայն իրենք զրպարտության հոդվածով երեք հայց են ներկայացրել Փաշինյանի դեմ, որոնցից մեկով Փաշինյանը հայտարարել է, որ Ռոբերտ Քոչարյանին ի նկատի չի ունեցել։

«Մենք հույս ունեինք, որ այլևս նման բան չի կրկնվի։ Հիմա երկու հայց կա մեր կողմից։ Ես նկատել եմ, որ նա այնքան էլ զգույշ չի իր արտահայտությունների մեջ, երբ խոսքը վերաբերում է այլ անձանց»,-ասաց փաստաբանը։

Դատական տեղեկատվական համակարգում հրապարակված տեղեկատվության համաձայն,  հայցադիմումով հայցվոր Ռոբերտ Սեդրակի Քոչարյանի ներկայացուցիչ Հայկ Ալումյանը խնդրել է
հաստատել, որ Հայաստանի Հանրապետության վարչապետ Նիկոլ Վովայի Փաշինյանի կողմից արված հետևյալ հայտարարություններով.

«2008 թվականի մարտի 1-ն ահա ժողովրդի իշխանության համար մղվող այդ պայքարի մի կարևոր հանգրվան էր: 2008 թվականի մարտի 1-ին Հայաստանի այն ժամանակվա կառավարողները բանակը հանեցին ժողովրդի դեմ, Հայաստանի քաղաքացիներին գնդակահարելու որոշում կայացրին: Շատ կարևոր է արձանագրել, որ այս գործով Մարտի 1-ի գործով կան մեղադրվող անձինք, որոնք այսօր կանգնած են դատարանի աոաջ: Ու պիտի, այո, արձանագրեմ, որ Մարտի 1-ի գործը, ըստ էության, իմ զնահատմամբ, բացահայտված է: Շատերը հարց են տալիս, թե ինչպես կարելի է բացահայտված համարել Մարտի 1-ի գործը, երբ սպանությունները բացահայտված չեն: Իմ կարծիքն ու անձնական գնահատականն այն է, որ, ճիշտ է, կրակողները բացահայտված չեն, բայց սպանությունները, այն ֆոնը, որում դա տեղի է ունեցել, բացահայտված է: Եվ դա, կարծում եմ, հանրությանն ակնհայտ կերևա գործի դատաքննության ընթացքում:

Այս հանգամանքները պատշաճ իրավական գործընթացների շրջանակում պետք է ուսումնասիրվեն ու գնահատվեն դատարանի կողմից: Այս համոզմունքն է պատճառը, որ բոլոր հնարավոր և անհնար միջոցները Մարտի 1-ի գործով մեղադրվող անձանց պաշտպանական թիմի կողմից գործադրվում են, որ դատավարությունն անընդհատ ձգձգվի ունենալով միայն ու միայն մեկ նպատակ, որպեսզի գործի ապացույցները չհետազոտվեն, այսինքնª չբացահայտվի, հրապարակային չդառնան բազմաթիվ նրբություններ և ճշմարտություններ: Նրանք ակնհայտորեն ժամանակ են ձգում: Ինչի համար են ձգում այդ ժամանակը: Որովհետև ոմանք հույս ունեն ինչպես նախկինում բռնազավթել են ժողովրդին պատկանող իշխանությունը, հիմա էլ հույս ունեն, որ այդ բռնազավթմանը կհասնեն: Բայց մեր ասելիքը կրկին ու կրկին շարունակում է մնալ նույնը:

Իսկ Մարտի 1-ի գործի բացահայտված ճշմարտության առանցքային դրույթն այն է, որ 2008 թվականի իշխանությունները բանակը, այո, հանել են սեփական ժողովրդի դեմ, բանակն օգտագործել են սեփական ժողովրդի կամարտահայտումը թույլ չտալու համար: Եվ այս համատեքստում է, որ տեղի են ունեցել սպանություններ: Ինչպես բազմիցս ասել եմ, սպանությունների հեղինակները կոնկրետ անուն-ագգանունով մարդկանց չեն թիրախավորել, այլ թիրախավորել են Հայաստանի Հանրապետության քաղաքացուն, որ նա չունենա, մտքով անգամ չանցնի իշխանություն ունենալ Հայաստանի Հանրապետությունում: Իսկ սպանություններ կատարողները մինչև օրս բացահայտված չեն նաև այն պատճառով, որ հենց Մարտի 1-ի իրադարձություններից անմիջապես հետո քննչական մարմինները դեպքի վայրից հավաքել են կրակված պարկուճները և դրանք փոխարինել այլ տեղերում այլ անձանց կողմից կրակված փամփուշտներով, պարկուճներով: Այսինքնª այն ժամանակ գործող իշխանությունը ինքը հոգ է տարել, որ սպանությունների և այլ ապօրինի գործողությունների պոտենցիալ ապացույցներն անհետանան, ոչնչանան: Ինչո ւ: Այս հարցերի պատասխանները թերևս կստանանք Մարտի 1-ի գործով դատաքննության փուլում: Այս պատճառով է, որ ամեն ինչ արվում է այդ փուլը ձգձգելու համար:

Այս ամենն ասում եմ ոչ միայն օրվա խորհորդն ընդգծելու համար, բայց ուզում եմ ասել, որ այդ նույն մարդիկ, բացարձակապես նույն մարդիկ, այսօր էլ փորձ են անում բանակը հանել ժողովրդի և ժողովրդի կողմից ընտրված օրինական իշխանության և կառավարության դեմ: Եվ Զինված ուժերի գլխավոր շտաբի հայտարարությունն այլ կերպ պարզապես չեմ կարող գնահատել: Ուզում եմ ասել առանց սեթևեթանքների Գլխավոր շտաբի հայտարարությունը, այդ թվում 2008 թվականի իշխող շրջանակների կողմից զինվորականների վրա ազդեցություն գործադրելու արդյունք է: Սա ուզում եմ ասել առանց սեթևեթանքների: Սա ոչ թե կռահում է, այլ կոնկրետ հիմնավորված հանգամանք»

խախտվել է հայցվոր Ռոբերտ Սեդրակի Քոչարյանի՝ Հայաստանի Հանրապետւթյան Սահմանադրության 66-րդ հոդվածով և «Մարդու իրավունքների և հիմնարար ազատությունների պաշտպանության մասին» եվրոպական կոնվենցիայի 6-րդ հոդվածի 2-րդ կետով երաշխավորված արդար դատաքննության իրավունքը:

2. Հայաստանի Հանրապետությունից հօգուտ հայցվոր Ռոբերտ Սեդրակի Քոչարյանի բռնագանձել 2.000.000 (երկու միլիոն) ՀՀ դրամ՝ որպես արդար դատաքննության իրավունքի խախտման արդյունքում պատճառված ոչ նյութական վնասի հատուցման գումար:

3. Պարտավորեցնել պատասխանող Նիկոլ Վովայի Փաշինյանին հրապարակայնորեն հերքել 01.03.2021 թվականին Հանրապետության հրապարակում հայցվորի վերաբերյալ հնչեցված վերը մեջբերված արտահայտությունները, հերքումը տարածելով Հայաստանի կառավարության պաշտոնական Youtube ալիքով, ՀՀ վարչապետի պաշտոնական կայքում, պատասխանող Նիկոլ Փաշինյանի ֆեյսբուքյան էջի միջոցով, հանրային հեռուստաընկերության ՙԼուրեր՚-ի Youtube ալիքով, 1in TV-ի Youtube ալիքով, ՙԱզատություն՚ TV-ի Youtube ալիքով, 168.am֊ի Youtube ալիքով, PastinfoTV-ի Youtube ալիքով, armeniasputnik.am, armtimes.com, armtimes.com, news.am, 168.am էլեկտրոնային լրատվության միջոցներով:

4. Պատասխանող Նիկոլ Փաշինյանից հօգուտ հայցվոր Ռոբերտ Սեդրակի Քոչարյանի բռնագանձել 2.000.000 (երկու միլիոն) ՀՀ դրամ՝ որպես զրպարտությամբ հայցվորին պատճառված ոչ նյութական վնասի հատուցում»։

Հայցադիմումը վարույթ է ընդունվել անցած տարվա դեկտեմբերի 14-ին։