Ձեր վստահելի աղբյուրը

«Ղազախստանում տիրող իրավիճակը մեզ հետաքրքրում է բացառապես ահաբեկչական կազմավորումների ակտիվացման և մեր իշխանությունների վարքի առումով»,-ասուլիսում հայտարարեց «Պատիվ ունեմ» խմբակցության պատգամավոր Տիգրան Աբրահամյանը:

Նա պնդեց, որ ղազախական իրադարձություններից հետո տարածաշրջանում իրերի դասավորվածությունը փոխվելու է:

«Այն գործընթացներում, որով ի դեմս Թուրքիայի, այլ ուժեր մինչ այս փորձում էին տարբեր ձևաչափերով մտնել Միջին Ասիա, այս իրադարձություններով բավականին մեծ արգելակում  տեղի կունենա»,-նկատեց պատգամավորը:

Անդրադառնալով շրջանառվող կարծիքին, որ Հայաստանի նման նախաձեռնողականությունը հետագայում ՀԱՊԿ ուժերը նաև ներհայաստանյան իրադարձություններում կիրառելու նպատակ է հետապնդում՝ պատգամավորն ասաց. «Չի բացառվում, որ հայաստանում, նույնիսկ ոչ ղազախական ծավալներով նման հնարավոր իրադարձության դեպքում, որը կկրի ընդգծված ներքաղաքական բնույթ, ՀՀ այսօրվա իշխանության գլխավոր ակնկալիքն այն է լինելու, որ այլ ուժերից, մասնավորապես՝ ՀԱՊԿ-ից աջակցություն ստանա»:

Աբրահամյանը նկատեց, որ Ղազախստանի հետ հայաստանյան իրավիճակի համեմատությունը դժվար է, միակ ընդհանուր եզրն այն է, որ Հայաստանում նույնպես իրավիճակն ճգնաժամային է՝  երկրում կայուն վիճակ ցույց մտալու իշխանությունների ջանքերից անկախ:

Ընդդիմադիր պատգամավորը պնդեց, որ այսօր Հայաստանում կայունության մասին խոսելը ճիշտ չէ, թեկուզ այն պատճառով, որ շատ գործիչներ իրենց հայրենասիրական, անձնական կարծիքի և կողմնորոշման համար գտնվում են անազատության մեջ:

Տիգրան Աբրահամյանի խոսքով՝ Հայաստանում ճնշվում է ազատ խոսքը, իշխանությունների ձևավորման գործընթացը, որի հետևանքները երևում են ՏԻՄ ընտրությունների ժամանակ և դրանց հաջորդած գործընթացներում:

Ըստ պատգամավորի՝ այս ամենը կուտակվում է և ինչ-որ պահի դրանք կարող են պայթել, բայց առաջնային համարեց, որ այն չլինի այնպիսին, որ վտանգի պետյության անվտանգությունը:

«Այս տեսանկյունից ես որևէ կոչ, հորդոր չունեմ գործող իշխանություններին, որովհետև նրանք վաղուց կորցրել են գործողությունների տրամաբանությունը և  թքած ունեն պետության ու պետականության վրա»,-հայտարարեց պատգամավորը և շեշտեց, որ հասարակությունը, ընդդիմությունը ինքը պետք է պատրաստ լինի իրավիճակի զարգացման տարբեր սցենարներին, որպեսզի թույլ չտրվի պետության վերջնական փլուզումը:

Տիգրան Աբրահամյանը կարծում է, որ եթե Հայաստանում լինի ընդգծված ներքաղաքական գործընթացներ, ապա ղազախական տարբերակով  ՀԱՊԿ ուժերի ներգրավում մեր մոտ չի կարող արձանագրվել: