Ձեր վստահելի աղբյուրը

Այսօր՝ հունվարի 10-ին  ՀՊՏՀ-ի Տնտեսական և ինժեներատեխնիկական բաժնի նախկին գլխավոր էներգագետ-ճարտարագետ  Խաչատուր Ավետիսյանը ստացել է Վճռաբեկ դատարանի որոշումը։

«Հաստատվել է, որ ՀՊՏՀ ռեկտոր Դիանա Գալոյանը ինձ աշխատանքից ազատելու իրավունք չի ունեցել: Որոշումը վերջնական է և բողոքարկման ենթակա չէ»,-լրատվամիջոցներին տարածած հաղորդագրության մեջ դատարանոի որոշման բովանդակությունը ներկայացրել է Ավետիսյանը։

Դատալեքսում հրապարակված  տեղեկատվության  համաձայն, Խաչատուր Ավետիսյանը, դիմելով դատարան, պահանջել է ՀՊՏՀ ռեկտորի պաշտոնակատարի` աշխատանքային պայմանագիրը լուծելու մասին 02.03.2020 թվականի թիվ ՄՌԿ/177-Ա հրամանը ճանաչել անվավեր` իրեն վերականգնել նախկին աշխատանքում, պատասխանողից հօգուտ իրեն բռնագանձել հարկադիր պարապուրդի ամբողջ ժամանակահատվածի համար միջին օրական աշխատավարձի գումարը:

«Ցավոք, ռեկտորի ապօրինության հետևանքն այժմ կրելու են բուհի ուսանողները, քանի որ այս ամբողջ ընթացքում կուտակված հարկադիր պարապուրդի գումարը, որը կազմում է շուրջ 12 մլն ՀՀ դրամ վճարելու է ոչ թե ապօրինության հեղինակը, այլ բուհի ուսանողները՝ իրենց վարձավճարներից: Սակայն, ես ամեն ինչ անելու եմ, որպեսզի ռեկտորը հետ վերադարձնի այդ գումարը ուսանողներին՝ իր անձնական միջոցներից, որովհետև այսպես շատ անարդար է, ուսանողները ռեկտորի անօրինականության պատճառով չպետք է տուժեն: Դիանա Գալոյանն ինձ աշխատանքից ազատել էր, որովհետև ես չէի հանդուրժում համալսարանում կատարվող ապօրինությունները և բարձրաձայնում էի այն խախտումները, որոնք տեսնում էի»,-հաղորդագրության մեջ նշել է  Ավետիսյանը։

Խաչատուր Ավետիսյանը 2019 թվականի  հունիսի 1-ից աշխատանքի էր անցել ՀՊՏՀ-ում որպես Տնտեսական և ինժեներատեխնիկական բաժնի գլխավոր էներգագետ-ճարտարագետ: Սակայն 2020 թվականի հունվարի 9-ինն ծանուցում է ստացել, որ հաստիքի կրճատման պատճառով ազատվում է զբաղեցրած պաշտոնից:

Երևան քաղաքի ընդհանուր իրավասության դատարանի (դատավոր՝ Ե. Եսոյան) 10.02.2021 թվականի վճռով հայցը բավարարվել է: Դատարանի վերը նշված վճռի դեմ «Հայաստանի պետական տնտեսագիտական համալսարան» ՊՈԱԿ-ի ռեկտոր Դ.Գալոյանը 10.03.2021 թվականին ներկայացրել է վերաքննիչ բողոք։

ՀՀ վերաքննիչ քաղաքացիական դատարանի (այսուհետ` Վերաքննիչ դատարան) 02.07.2021 թվականի որոշմամբ Կազմակերպության անունից ներկայացված վերաքննիչ բողոքը բավարարվել է մասնակի. հարկադիր պարապուրդի գումարը հաշվարկել և բռնագանձել մինչև սույն դատական ակտն օրինական ուժի մեջ մտնելու օրը, նախկին աշխատանքում վերականգնելու պահանջը մերժել։

Խաչատուր Ավետիսյանին վճարել հատուցում` նրա միջին աշխատավարձի վեցապատիկի չափով՝ որպես աշխատանքում չվերականգնելու դիմաց հատուցում։ «Հայաստանի պետական տնտեսագիտական համալսարան» ՊՈԱԿ-ի և Խաչատուր Ավետիսյանի միջև 2019թ. հունիսի 28-ին կնքված թիվ 03/282 աշխատանքային պայմանագիրը համարել լուծված սույն դատական ակտն օրինական ուժի մեջ մտնելու օրվանից»:

Վերաքննիչ դատարանի որոշումը բողոքարկվել է Վճռաբեկ դատարան։