Ձեր վստահելի աղբյուրը

ԱԺ «Քաղաքացիական պայմանագիր» խմբակցության անդամ Վիլեն Գաբրիելյանը ներկայացրել է «Ազգային ժողովի կանոնակարգ» սահմանադրական օրենքում լրացումներ կատարելու մասին օրենքի նախագիծ:

ԱԺ Պետական-իրավական հարցերի մշտական հանձնաժողովի նիստում հիմնական զեկուցող Վիլեն Գաբրիելյանը ներկայացրեց նախագիծը, ըստ որի առաջարկվում է՝ եթե մշտական հանձնաժողովի նախագահի տեղակալը չի ընտրվում, ապա իրավասու խմբակցությունը քվեարկությունից հետո՝ հինգ աշխատանքային օրվա ընթացքում առաջադրում է նոր թեկնածու: 

«Օրենքով սահմանվում է, որ մշտական հանձնաժողովի նախագահի տեղակալն ընտրվում է իրավասու խմբակցության ղեկավարի կամ քարտուղարի առաջադրմամբ՝ հանձնաժողովի որոշմամբ: Մշտական հանձնաժողովի նախագահի տեղակալի ընտրությունն անցկացվում է հանձնաժողովի կազմը հաստատվելուց, ինչպես նաեւ նրա պաշտոնը թափուր մնալուց հետո՝ հինգ աշխատանքային օրվա ընթացքում: Գործող կարգավորմամբ մշտական հանձնաժողովի նախագահ չընտրվելու դեպքում իրավասու խմբակցությունը քվեարկությունից հետո՝ տասնօրյա ժամկետում, թափուր մնացած պաշտոնի համար առաջադրում է նոր թեկնածու, սակայն Օրենքով չունենք կարգավորում, որտեղ հստակ կարգավորվում է մշտական հանձնաժողովի նախագահի տեղակալի ընտրության կարգը»,- նշված է նախագծում:

Վիլեն Գաբրիելյանն ասաց, որ ԱԺ պաշտպանության և անվտանգության մշտական հարցերի հանձնաժողովը տևական ժամանակ չի կարողանում ընտրել հանձնաժողովի նախագահի տեղակալ, իրավասու խմբակցությունն անընդհատ առաջադրում է  նույն թեկնածուին, ում հանձնաժողովի անդամների մեծամասնությունը չի ընտրում, կանոնակարգը չի կարգավորում այս դրույթը և տեղի է ունենում շահերի բախում:

Իրավասու խմբակցությունն անսահման թվով  նույն թեկածուին առաջադրելով՝ չի կարող ստիպել պատգամավորին պարտադրված ընտրություն կատարել»,- ասաց ՔՊ-ական պատգամավորը:

Նա նշեց, որ «Ազգային ժողովի կանոնակարգ» սահմանադրական օրենքում լրացում կատարելու մասին» սահմանադրական օրենքի նախագծի ընդունվելու դեպքում կկարգավորվի Ազգային ժողովի մշտական հանձնաժողովի նախագահի տեղակալի ընտրության հարցը և կապահովվի մշտական հանձնաժողովի աշխատանքների բնականոն ընթացքը:

ԱԺ «Հայաստան» խմբակցության պատգամավոր Արամ Վարդևանյանը հետաքրքրվեց, թե ի՞նչ շահերի բախման մասին է խոսքը, ի՞նչ առնչություն ունի շահերի բախումն այս հարցի հետ:

«Երկրորդ. օգտագործվեց եզրույթ՝ ստիպել ընտրել թեկնածու, իսկ հակառակ պարագայում չի՞ ստացվում, որ մշտական հանձնաժողովում հանդես եկող մեծամասնությունը ստիպում է  առաջադրել նոր թեկնածու, քանի որ ձեր առաջարկվող կարգավորումը հենց այդ տրամաբանության մեջ է»,- ասաց նա:

Վ.Գաբրիելյանը պատասխանեց, որ շահերի բախման մասին խոսքը, մասնավորապես, իրավունքի բախման մասին է:

«Հանձնաժողովի նախագահի պարագայում կարգավորումը հստակ է: Հիմա առաջարկվում է հստակեցնել տեղակալի մասով: 15, 16 անգամ  Արթուր Ղազինյանը չի ընտրվել ԱԺ պաշտպանության և անվտանգության մշտական հարցերի հանձնաժողովի նախագահի տեղակալ, այդ պրոցեսը չի կարող անընդհատ տեղի ունենալ:

Մեծամասնության կողմից պարտադրանքի տեսանկյունից  պարտադրանք չկա, քանի որ  կարող եք առաջարկել այլ թեկնածու»,- ասաց հանձնաժողովի իշխանական անդամը:

Արամ Վարդևանյանն արձագանքեց, որ շահերի  բախման տեսանկյունից մի նժարի վրա դնում են ընդդիմության համար վերապահված երաշխիք Դոնթի բանաձևը, մյուս նժարի վրա դրվում է  կոնկրետ  պատգամավորի փաստացի ցանկությունը կամ իր խղճի ու համոզմունքի հիման  վրա քվեարկելը:

«Այս երկու մրցակցող արժեքների մեջ, առնվազն իմ տրամաբանությամբ, Դոնթի բանաձևը պետք է գերակայող լինի, բխում է  ժողովրդավարության սկզբունքից:

Երբ խոսում ենք նոր թեկնածու առաջադրելու մասին, բոլոր դեպքերում 7-րդ գումարման  ԱԺ-ն ունի  հետաքրքիր փորձ նոր թեկնածու եզրույթի հետ կապված: Մասնավորապես, Վահե Գրիգորյանը, որպես ՍԴ դատավորի թեկնածու, մշտապես  նոր թեկնածու էր համարվում, չնայած նրան, որ չէր ընտրվում»,- ասաց ընդդիմադիր պատգամավորը:

Հանձնաժողովի նախագահ Վլադիմիր Վարդանյանը նշեց, որ այս նախագծով չի ասում՝  եթե մարդը չի ընտրվել հանձնաժողովի տեղակալի պաշտոնում, այլևս  հավերժ չի կարող  առաջադրվել այդ պաշտոնին, պարզապես ասվում է՝ չընտրվելու պարագայում ներկայացվում է նոր թեկնածու:

«Դոնթի բանաձևը պահպանվելու է, քանի որ այն դիտակվում է որպես խորհրդարանական ժողովրդավարության ամենակարևոր գրավականներից մեկը,  երկրորդ՝  խորհրդարանական մեծամասնությունը, յուրաքանչյուր պատգամավոր ինքն է որոշում կայացնում ինչպես քվեարկի»,-  նշեց նա:

Վ.Վարդանյանն ընդգծեց, որ  այս նախագիծն  անձի համար չի ընդունվում,  այլ ընդհանուր կարգավորում է:

«Սրանով չի սահմանափակվում նաև նոր կանոնակարգման հիման վրա Արթուր Ղազինյանի թեկնածության առաջադրումը, քանի որ չկա նման սահմանափակում: Խոսքը վերաբերում է ԱԺ կանոնակարգ օրենքում առկա բացի ըստ էության կարգավորմանը»,- ասաց հանձնաժողովի նախագահ Վլադիմիր Վարդանյանը:

Այս նախագիծն ընդունվեց: Դեմ քվեարկեց հանձնաժողովի 3 անդամ: Հանձնաժողովը նաև որոշեց առաջարկել խորհրդին ընդգրկել այս հարցը լիագումար նիստերի օրակարգում: