Ձեր վստահելի աղբյուրը

«Ձեր խոսքում ասացիք, որ դատավորներին գործերն էլեկտրոնային համակարգով մակագրումն արդար դատաքննության, դատավորների անկողմնակալության ստանդարտ է։ Այդ ստանդարտը չկա 2021 թվականի հուլիսից։ Ձեր գնահատականը դրան որպես ՄԻՊ թեկնածու՝ արդար դատաքննության իրավունքի, օրենքի հիման վրա ստեղծված  դատարանի կոնցեպտի  տեսանկյունից ո՞րն է »,- «Քաղաքացիական պայմանագիր» խմբակցության կողմից առաջադրված Մարդու իրավունքների պաշտպանի թեկնածու Քրիստինե Գրիգորյանի հետ հանդիպմանը հետաքրքրվեց «Հայաստան» խմբակցության պատգամավորն Արամ Վարդևանյանը։

Ք. Գրիգորյանը պատասխանեց. «Բնականաբար, խախտված է այդ իրավունքը, պետք է այդ իրավունքը վերականգնվի»։ 

«Ձեր ասած այդ գնահատականից կարող եմ հետևություն անել, որ եթե այդ ստանդարտը խախտում է,  խախտում կա 2021 թվականի հուլիսից բոլոր գործերով և այդ բոլոր գործերով ունենք արդար  դատաքննության իրավունքի խնդիր»,- ասաց Ա.Վարդևանյանը։

«Գործնականում ես ասացի, որ խախտված է այդ իրավունքը, որովհետև եթե չունենք այդ անկողմանակալ, պատահական մակագրման համակարգը, դրա բացակայության պայմաններում նաև եթե ապահովված չեն օբյեկտիվ անկողմնակալ սկզբունքները, այսինքն՝ եթե դա չկա, այլ միջոցներով պետք է երաշխավորել այդ մակագրումները, որ լինի անկողմնակալ։
Եթե այդ բոլորը չկան, նոր պետք է արձանագրել խախտում»,- արձագանքեց ՄԻՊ ՔՊ թեկնածուն։

Վարդևանյանի գնահատմամբ, Ք. Գրիգորյանը սկսեց մի քիչ սրբագրել պատասխանը։

Ք. Գրիգորյանի խոսքով, արդար դատաքննության իրավունքի խախտում արձանագրելու համար պետք է նաև պատասխանել այս հարցին՝ արդյո՞ք այլ օբյեկտիվ սկզբունքներով մակագրում առկա է, թե ոչ.
«Եթե այդ հարցին պատասխանեցինք ու ասացինք՝ ոչ, նոր կարող ենք արձանագրել իրավունքի խախտում։ Որտեղ որ փաստեր ունենք, որ նման սկզբունքով չի մակագրվել, այո, կան խախտումներ»։

Ըստ Ք. Գրիգորյանի, արձանագրում են՝ էլեկտրոնային մակագրման համակարգի չվերականգնումը խնդիր է, բայց խախտումն արձանագրելու համար  պետք է նաև փաստեր ունենալ, որ ալտերնատիվ տարբերակն էլ չի գործել։

Արամ Վարդևանյանը նաև հետաքրքրվեց՝ ինչպիսի՞ն է դիրքորոշումը դատարանների մուտքերն ու ելքերը շրջափակելու վերաբերյալ Նիկոլ Փաշինյանի կոչին, Քրիստինե Գրիգորյանը պատասխանեց. «Դե, բնականաբար, չեմ համարում, որ լավ որոշում էր։ Լավ որոշում չէր»։