Ձեր վստահելի աղբյուրը

«2018 թվականի համեմատ 2020 թվականին ունեցել ենք խաղադրույքների թվի 6  և խաղացողների քանակի 3 անգամ աճ»,-ԱԺ տնտեսական հարցերի մշտական հանձնաժողովի նիստում ասաց ֆինանսների նախարարի տեղակալ Արմեն Հայրապետյանը՝ ներկայացնելով  «Գովազդի մասին» օրենքում փոփոխություններ և լրացումներ կատարելու մասին նախագիծը:

Փոխնախարարի խոսքով՝ նախագծով առաջարկվում է ինտերնետ շահումով խաղի գովազդի կարգավորումները վերադարձնել մինչև 2000 թ. կարգավորւմների դաշտ, երբ շահումով խաղերի գովազդները արգելված էին, և առաջարկվող նախագծով դրանք կթույլատրվեն միայն չորսաստղանի և ավելի  բարձրակարգ հյուրանոցներում, սահմանային անցակետերում և այնտեղ, որտեղ այդ ընկերությունները գործունեություն կիրականացնեն:

Նա տեղեկացրեց, որ շենքերի ճակատային մասում, ներսի տարածքներում, մյուս վայրերում գովազդներըը կարգելվեն:

Արմեն Հայրապետյանի խոսքով՝ հարցը երկար է քննարկվել, քանի որ այն որոշակի բացասական ազդեցություն է ունենալու գովազդային գործակալների վրա՝ նրանց գնահատմամբ 60–70%-ի չափով, իսկ նախարարության ուսումնասիրությամբ՝ 20–25 %-ով։

Փոխնախարարը վստահեցրեց, որ տնտեսվարողները հասկացել են, որ իրենց գործունեությունը նոր պահանջներին հարմարեցնելու ժամանակի խնդիր կա։

Տնտեսական մրցակցության պաշտպանության հանձնաժողովի ներկայացուցիչն հայտնեց, որ իրենց մտահոգությունը վերահսկողական մեխանիզմների բացակայությանն է վերաբերում, և որ Հայաստանում գործունեություն ծավալող արտասահմանյան սուբյեկտները դուրս են մնում այս նախագծից:

Նրա խոսքով՝ ռիսկ կա, որ նախագծով հարցն ամբողջական չի կարգավորվի, քանի որ այդ դեպքում տեղական սուբյեկտներն արտասահմանյան կայքերի միջոցով գովազդ անելու հնարավորություն կունենան, իսկ  արտասահմանյան կայքերն իրենք գովազդ կիրականացնեն: 

Արմեն Հայրապետյանը պատասխանեց, որ արտասահմանյան ընկերությունների գովազդ իրականցնելու ռիսկերը նույնպես դիտարկվել են և այդտեղ ևս սահմանափակումներ, պատասխանատվության հարցեր կան։

Տնտեսական հարցերի մշտական հանձնաժողովի նախագահ, «Հայաստան» խմբակցության պատգամավոր Վահե Հակոբյանը նկատեց, որ գովազդից գոյացած բյուջեն հեռուստաընկերությունների  և ռադիոյի եկամուտի  30–40 %-ն է, համացանցի և արտաքին գովազդի՝ 40–50 %-ը։

«Այսինքն եթե մենք հիմա արգելում ենք նման գովազդները, ապա դա զգալի հարված է այդ բոլոր ոլորտներին։ Ես, որպես ՀՀ քաղաքացի դեմ չեմ, որ զսպող մեխանիզմներ կիրառվեն, բայց կողմ եմ շուկայի ավելի խորն ուսումնասիրման»,-հայտարարեց Հակոբյանը և առաջարկեց քննարկումը հետաձգել փոփոխությունների ազդեցությունն ավելի խորն ուսումնասիրելու համար։

ՔՊ պատգամավոր Բաբկեն Թունյանն էլ նկատեց, որ գովազդի սահմանափակումներ մտցնելով  խաղամոլության հիմնահարցն ամբողջությամբ չի լուծվում, բայց սա այն լրացուցիչ գործոններից մեկն է:

«Ցավոք, ունենք իրավիճակ, որ մեդիադաշտը նստած է պայմանական ասած բույքմեյքերական գովազդի ասեղի վրա և լուծում պետք է գտնենք, որ հնարավորինս անցնցում կազմակերպելնք այս պրոցեսը, որ իրենք էլ ադապտացվելու ժամանակ ունենան»,-հայտնեց Թունյանը և առաջարկեց նախագծի անցումային դրույթներում շտկումներ կատարել և ուշադրություն դարձնել մրցակցային պայմանների հնարավոր խաթարման հարցին:

Հանձնաժողովը միաձայն դեմ արտահայտվեց օրենքի նախագծին: