Ձեր վստահելի աղբյուրը

«Ռազմական դրությամբ պայմանավորված Արցախի Հանրապետության քաղաքացիներին ժամանակավոր կացարանով ապահովելու ծառայություններ ծրագիրի նկարագրությունների մեջ նշվում է, որ շուրջօրյա խնամք է մատուցվել 360 արցախցու, որոնց մեծ մասը տարեց կամ հաշմանդամություն ունեցող անձինք էին»,- «Հայաստան» համահայկական  հիմնադրամի հավաքագրած և ՀՀ պետբյուջե փոխանցված միջոցների օգտագործումն ուսումնասիրող քննիչ հանձնախողովի նիստում տեղեկացրեց հանձնաժողովի նախագահ, «Հայաստան» խմբակցության քարտուղար Արծվիկ Մինասյանը:

Նա հայտնեց, որ ըստ նախագծի՝ շահառուների կեսը բնակվել է Աղավնաձորի տուն-ինտերնատի մասնաճյուղում նոյեմբեր-դեկտեմբեր ամիսներին և դրանից հետո էլ 95 շահառու 2021 թվականի հունիսի դրությամբ շարունակում էին այնտեղ ստանալ խնամքի ծառայություններ:

Արծվիկ Մինասյանը շեշտեց, որ այդ տողի դիմաց գրված է 28 մլն 200 հազար դրամ ֆինանսավորում, սակայն նույն կառավարության ծրագրում գրված է, որ այդ գումարը գոյացել է 2020 թվականի նոյեմբերի 18-ին՝ նախարար Զարուհի Բաթոյանի պաշտոնավարման շրջանում, բյուջեով սահմանված մեկ այլ ծրագրից՝ տարցներին կովիդ ծառայությունների մատուցման հաստատված ծրագրից 31 մլն դրամ վերաբաշխելու արդյունքում:

Սակայն կառավարությունը ԱԺ քննիչ հանձնաժողովին ներկայացրել է, թե 28 մլն դրամը հատկացվել է «Հայաստան» համահայկական  հիմնադրամից կառավարությանը հատկացրած 52.7 մլրդ դրամից:

«Կառավարությունը ներկայացրել է տեղեկանք, որ Արցախից բռնագաղթած 360 անձի կացարաններով ապահովելու ծրագիրն իրականացվել է «Հայասատան» հիմնադրամի 52.7 մլրդ դրամի միջոցներով, որը կազմում է 28 մլն 200 հազար դրամ, բայց կառավարության որոշումից պարզվում է, որ դրանցի մի բան էլ ավել՝ 31 մլն դրամ մեկ այլ բյուջետային ծրագրից է վերաբաշխվել»,-բացատրեց հանձնաժողովի նախագահը:

Քննիչ հանձնաժողովի ՔՊ-ական անդամները, որևէ կերպ չէին ցանկանում հասկանալ պարզ ճշմարտությունը և փորձում էին հարցը տեղափոխել այլ հարթություն, թե արդյոք բավարար էր այդ գումարը նման թվով շահառուների կարիքը բավարարելու համար:

Պատգամավորներ Թադևոս  Ավետիսյանը և Արծվիկ Մինասյանը մի քանի անգամ ապարդյուն փորձեցին բացատրել, որ կառավարությունը 28 մլն դրամը ներկայացրել է հիմնադրամից ֆինանսավորում, բայց նույն կառավարության որոշումներից երևում է, որ այն մինչ պատերազմը հաստատված պետական բյուջետային մեկ այլ ծրագրից վերաբաշխված միջոց է:

«Ես չեմ կարողանում հասկանալ,  թե ինչու մեր ՔՊ գործընկերները, որոնք ներգրավված են քննիչ հանձնաժողովում, ավելի շատ փաստաբանական հանձնաժողովի անդամներ են կարծես, քանի որ իմ հարցերին ավելի շատ պատասխանում են պարոն Թունյանն ու Պապոյանը, քան հրավիրված տիկին Բաթոյանը»,-արձագանքեց «Պատիվ ունեմ» խմբակցության պատգամավոր Հայկ Մամիջանյանը:

Ընդդիմադիր պատգամավորը ստիպված էր պատկերավոր բացատրել, թե ինչ է կատարվել «Հայաստան» համահայկական  հիմնադրամից կառավարությանը փոխանցված 52.7 մլրդ դրամի հետ:

«Եթե դու ունես ընտանեկան ամսական ծախս՝ 100 հազար դրամ, որից որոշել ես, որ 25 հազար դրամը ուտել-խմելու(պարգևավճարի) ես հատկացնելու, և հետո՝ ամսվա կեսին, հիվանդանում ես և ստիպված ես լինում քո 100 հազար դրամի մեծ մասը տաս բուժման, իսկ այդ ընթացքում ընկերոջիցդ նվեր փող ես ուզում՝ միևնույն  է այն ծախսում ես ուտել խմելու համար: Ինչպես ուզում եք հաշվեք, ստացվում է, որ ընկերդ քո ուտել խմելն է ֆնանսավորել »,-նկատեց Հայկ Մամիջանյանը:

Հանձնաժողովի նախագահ Մինասյանը նիստին ներկա աշխատանքի և սոցիալական հարցերի նախկին նախարար Զարուհի Բաթոյանից փորձեց պարզել, թե արդյո՞ք նա տեղյակ է, թե հիմնադրամը այդ ֆինանսավորման հետ առնչություն ունի, թե ոչ:

ՔՊ պատգամավոր Բաբկեն Թունյանը հայտարարեց, որ Զարուհի Բաթոյանը չի կարող պատասխանել ֆինանսավորման մասին հարցերին:

Արծվիկ Մինասյանը հիշատակեց որ բաթոյանի օրոք մեկ այլ՝ Աջակցություն զոհվածների ընտանիքներին ծրագորվ 1 մլրդ 950 մլնդրամ է հատկացվել հիմնադրամից, բայց նրա զգալի մասը նույնպես պետական բյուջեից գործող այլ ծրագրերից վերաբաշխումներ են եղել, ինչը երևում է կառավարության համապատասխան որոշումներից: