Ձեր վստահելի աղբյուրը

«Երբ կառավարությունը որոշեց, որ պետք է հանվեն թուրքական ապրանքների սահմանափակումները, այդտեղ առաջնորդեց քաղաքական նկատառումները»,- ԱԺ-ում տված ճեպազրույցի ժամանակ հայտարարեց էկոնոմիկայի նախարար Վահան Քերոբյանը:

Նրա նշեց, որ որպես տնտեսության համար պատասխանատու մարմին, նախարարությունը պետք է ուշի-ուշով հետևի և պաշտպանի այն ընկերություններին, որոնք վերջին մեկ տարվա ընթացքում են բացվել՝ թուրքական ապրանքների ներմուծման սահմանափակումների շնորհիվ:

«Պետք է այնպես անենք, որ իրենց այսպես ասած կայացումը չվտանգվի և նրանք նորից ստիպված չլինեն դուրս չթռնել շուկայից»,- ասաց էկոնոմիկայի նախարարը և հավելեց. «Մենք հետևելու ենք իրավիճակին և եթե տեսնենք, որ խնդիրներ կան, այդ ներդրողների բիզնեսներ վտանգված են և նրանք այնքան չեն կայացել, որպեսզի կարողանան մրցակցել թուրքական ապրանքներ ներկրողների հետ, ապա մենք անպայման որոշակի ծրագրեր կներդնենք, որպեսզի պաշտպանենք նրանց»։:

Քերոբյանը շեշտեց, որ ինքն անձամբ կողմնակից է եղել արգելքի երկարացմանը և տեղեկացրեց, որ հնարավոր է եղել թուրքական ապրանքների ներմուծման արգելքը երկարացնել, բայց քանի որ կառավարությունը կոլեգիալ մարմին է, միասին այդպիսի որոշում են կայացրել:

Նախարարն անդրադառնալով Ադրբեջանի սադրանքներին՝ ցավակցեց Գեղարքունիքում նախորդ օրը զոհված զինծառայողների հարազատներն և ասաց, թե պետք է հաշվի առնել, որ վերջին 30 տարիներին այդպիսի բախումներ եղել են միշտ, բայց թուրքական ապրանքների համար հանրապետությունը բաց է եղել:

Շեշտելով, որ չի ուզում սահմանային միջադեպերի հարցի մեջ շատ խորանալ՝ Քերոբյանը հայտնեց, որ կառավարությունն ամեն ինչ անում է, որ զոհեր չլինեն, Հայաստանի համար ընդունելի պայմաններով հաստատվի խաղաղություն, որպեսզի կարողանան մտածել երկարաժամկետ աշխատանքի և ներդրումների մասին: