Ձեր վստահելի աղբյուրը

«Եթե  մեղադարողը շարունակի խեղաթյուրված տվյալներ ներկայացնել… Փաստական տվյալները մեր առաջ են դրված, կարդում ենք»,- ՀՀ երրորդ նախագահ Սերժ Սարգսյանի և մյուսների գործով դատական նիստի ժամանակ ասաց  Ս.Սարգսյանի պաշտպան Ամրամ Մակինյանը:

Նա ընդգծեց, որ ակնհայտ խեղաթյուրված տվյալներ են ներկայացվում: 

Դատավոր Վահե Միսակյանը ընդհատեց՝ նշելով, որ  մեղադրողը թող ավարտի իր ելույթը:

Մակինյանն արձագանքեց, որ փաստերը խեղաթյուրելուց հետո արտահայտվելն արդեն ուշացած կլինի:

Դատախազը շարունակեց իր ելույթը, տարբեր հայտարարություններ էր հնչեցնում, ինչն առաջացրեց ՀՀ երրորդ նախագահ Սերժ Սարգսյանի վրդովմունքը:

Պաշտպան Ա. Մակինյանը նշեց, որ իրականում պարոն նախագահի վրդովմունքը տեղին է:

«Մեղադրողը ֆոն է ուզում ստեղծել դատարանում, ինչը չի բխում իր վրա դրված պարտականություններից, առավել ևս դատախազը չունի նման իրավունքները:

Ինչո՞ւ է  մեղադրողը դուրս գալիս իր մեղադրանքի սահմաններից, ապացուցելու պարտականությունից: Ինչո՞ւ է գրությունները կիսատ-պռատ կարդում: Դատախազը փորձում է դատավորի, հասարակության, դատավորության մասնակիցների մոտ տպավորություն  ստեղծել, որ պատճառված վնաս է հատուցվել»,- ասաց պաշտպանը:

Գործով անցնող «Ֆլեշ» ընկերության սեփականատեր Բարսեղ Բեգլարյանը նույնպես վրդովվեց՝ նշելով, որ դատախազը կոնտեքստից դուրս մտքեր է ասում:

Հիշեցնենք, որ քրեական գործով այս պահին մեղադրյալի կարգավիճակում է երեք անձ. Սերժ Սարգսյանից բացի մեղադրանքներ են առաջադրվել նաև գյուղնախարարության բուսաբուծության վարչության նախկին պետ Գևորգ Հարությունյանին, գործարար Բարսեղ Բեգլարյանին։

Դատական այսօրվա նիստը հետաձգվեց: Այն կշարունակվի փետրվարի 3-ին: