Ձեր վստահելի աղբյուրը

Վերաքննիչ քրեական դատարանի դատավոր Վազգեն Ռշտունին դատավորներին գործերի էլեկտրոնային մակագրման համակարգը չգործելու հանգամանքը բացասական է գնահատում:

«Տարիներ շարունակ մի շարք միջազգային կազմակերպություններ պայքարել էին, որ այդ համակարգը ներդրվեր»,- լրագրողների հետ զրույցում ասաց դատավորը:

Նա նշեց, որ այդ դեպքում դատարանի նախագահն ընդհանրապես որևէ գործոն չուներ:

«Այդ առումով նախագահի անձի  գործոնի բացակայությունը, բնականաբար, դատավորների մոտ համոզմունք էր ձևավորում, որ այդ բողոքն օբյեկտիվորեն հայտնվել է իրեց վարույթում»,- նշեց Վ.Ռշտունին:

Նա ասաց, որ այդ խնդիրը էլի է եղել, սակայն այլ կերպ է լուծում ստացել. «Այն ժամանակ ինձ հետ որպես դատարանի նախագահ կապ էր հաստատել ԱԱԾ-ից Միքայել Համբարձումյանը: Մենք պայմանավորվել էինք, որ հնարավոր չէ առգրավել այդ համակարգիչը, քանի որ կխափանի դատարանի բնականոն գործունեությունը: Իրենք եկել են, տեղում մի քանի օր ուսումնասիրել են այդ համակարգն ու գնացել»:

Դատավորի խոսքով, այս դեպքում էլ հնարավոր էր լուծում գտնել, օրինակ նախքան առգրավելը, եթե դա խիստ անհրաժեշտ էր, նոր համակարգչով այն փոխարինել:

Վազգեն Ռշտունին նշեց, որ իր ունեցած տվյալներով այսօր, առանց էլեկտրոնային համակարգի, գործերի բաշխման համաչափությունը պահպանված չէ: