Ձեր վստահելի աղբյուրը

Կարեն Դեմիրճյանի անվան մարզահամերգային համալիրում ժամը 14:00-ին հրավիրվել է Դատավորների արտահերթ ընդհանուր ժողովը։ Ժողովի օրակարգում ընդգրկված է Արդարադատության ակադեմիայի կառավարման խորհրդի դատավոր անդամների ընտրության հարցը (2 անդամների՝ քաղաքացիական և քրեական մասնագիտացմամբ): Ժողովից հետո կկայանա նաև Դատավորների միության նախագահի ընտրություն:

Միության նախագահի պաշտոնում առաջադրվել են Վերաքննիչ քրեական դատարանի դատավոր Ալեքսանդր Ազարյանն ու ՀՀ վճռաբեկ դատարանի քրեական պալատի դատավոր Ելիզավետա Դանիելյանը։

Լրագրողների հետ զրույցում Ալեքսանդր Ազարյանն ասաց, որ ինֆորմացիա, տեղեկատվություն է ստանում, որ կազմակերպված է տապալել հենց կոնկրետ միության նախագահի ընտրությունները:

«Չեմ կարող ասել իրականությանը համախատասխանում է, թե ոչ»,- նշեց նա:

Ա. Ազարյանն ասաց, որ իր ընտրվելու շանսերը  բարձր է գնահատում:

«Ես եկել եմ ընտրվելու նպատակով և ակնկալիքս ընտրվելն է»,- ասաց դատավորը:

Հարցին՝ կան արդյո՞ք ճնշումներ դատավորների նկատմամբ, Վերաքննիչ քրեական դատարանի դատավորը պատասխանեց, որ իր ու իր նման դատավորներին անհնար է վախեցնել։

«Մետ երկու-երեք տարի առաջ ես մի քանի հարցազրույցներում անդրադարձել եմ այդ հարցին: Կարծում եմ՝ այն ժամանակ բացահայտ ճնշումներ են եղել դատավորների նկատմամբ գործադիր մարմնի ներկայացուցիչների կողմից», - ասաց Ալեքսանդր Ազարյանը։