Ձեր վստահելի աղբյուրը

«Ես էլ եմ  նման հայտարարություն անող դատավորների թվում: Բայց ինձ համար մի փոքր ավելի դժվար է  կարծիք հայտնել գործող արդարադատության նախարարի հետ կապված»,- լրագրողների հետ զրույցում ասաց Վերաքննիչ քրեական դատարանի  դատավոր Մխիթար Պապոյանը՝ անդրադառանալով մի խումբ դատավորների հայտարարություններին, որ արդարադատության նախարարության կողմից կարգապահական վարույթներ հարուցելը խոչընդոտում է դատավորների անկախությանը:

Դատավորի խոսքով, արդարադատության նախարար Անդրեասյանն իր համակուրսեցին է, նրա նկատմամբ վերաբերմունքը դրական է:

«Ինձ թվում է՝ պարոն Անդրեասյանի մոտ ուղղակի այս պահին միգուցե մոլորություն է»,- ասաց նա:

Մ. Պապոյանը խոսելով Կարեն Անդրեասյանի կողմից Վերաքննիչ քրեական դատարանի դատավոր Վազգեն Ռշտունու նկատմամբ վարույթ հարուցելու մասին, ասաց, որ նրան մեղադրում են թվով տաս դատական գործեր վերամակագրության հանձնելու և արձակուրդ մեկնելու համար. «Դատավոր Ռշտունին երկարատև արձակուրդ է մեկնել, մոտ երկու ամսով: Արձակուրդ մեկնելը պայմանավորված է եղել առողջական խնդիրներով, բայց 4-5 օրը մեկ վերադարձել է, քանի որ վարույթում եղել են գործեր, որոնք ավարտական փուլին էին մոտեցել, որպեսզի կարողանար դրանք ավարտել»:

Ռշտունու՝  արձակուրդ մեկնելուց հետո պաշտոնակատար է նշանակվել Մխիթար Պապոյանը, ով քննարկվել է այդ 10 գործերի վերամակագրության հարցը և որոշել է հանձնել վերամակագրության՝ հետ ուղարկել, համակարգիչը մակագրի մեկ այլ դատավորի:

«Այսօր մեղադրում են Վազգեն Ռշտունուն, որ դրանով վարքագծի կանոն է խախտել: Ինձ համար անհասկանալի է, թե ինչով է խախտել»,- ընդգծեց Պապոյանը:

Նա նշեց, որ արդարդատության նախարարության աշխատակիցը ուսումնասիրություն է կատարել «Դատալեքս» տեղեկատվական համակարգի ծրագրի միջոցով, դրա արդյունքում հայտնաբերվել է այս հանգամանքը, որ Ռշտունին գործեր է հանձնել:

«Ես էլ փորձեցի  այդ ծրագրով փնտրել,  իմ մոտ չստացվեց հայտնաբերել, որովհետև այդ նույն  համակարգում կան այդպիսի պատուհաններ, բայց երբ գործարկում ես, չի գալիս այն պատկերը, որը տեսանելի է եղել ԱՆ համապատասխան աշխատակցին:  Թեև հակված եմ մտածելու, որ այդ տեղեկատվությունը փոխանցվել է իրենց, ենթադրում եմ, նույն մեր համակարգի  պաշտոնատար անձի կամ անձանց կողմից: Այնուամենայնիվ, ինձ համար զարմանալի է Կարեն Անդրեասյանի կողմից հարուցված վարույթը:

Թեև փորձում եմ դեռևս իմ կարծիքին մնալ նրա վերաբերյալ,  բայց եթե տևական ժամանակ այսպես շարունակվի, երևի կփոխվի, քանի որ ես չեմ տեսնում օբյեկտիվություն»,-  ասաց դատավոր Մխիթար Պապոյանը:

Նա միաժամանակ հավելեց, որ Քրեական վերաքննիչ դատարանում կա այդպիսի պրակտիկա. եթե դատավորները տևական ժամանակ բացակայում են աշխատանքից, գործերը վերահանձվում են: Դատավորի գնահատմամբ, դա ավելի արդարացի է, քան հակառակը:

Ինչ վերաբերում է դատավորներին գործերը մակագրելուն, որն իրականացվում է դատարանի նախագահի կողմից, քանի որ էլեկտրոնային համակարգը չի գործում, Մ.Պապոյանն ասաց, որ  ԲԴԽ կողմից նախատեսված հստակ կարգ կա,  թե ինչպես պետք է իրականացվի՝ պատահականության սկզբունք կամ այբբենական հերթականություն:

«Եթե այդ ամեն ինչ պահպանվի, խնդիր  չի առաջանա: Բայց դժգոհ եմ այսօրվա մակագրումներից: Իմ կողմից որոշակի ուսումնասիրության արդյունքում պարզել եմ, որ, մասնավորապես, ինձ մակագրված գործերը ավելի շատ են, քան օրենքով պետք է ինձ մակագրվեր: Այս հանգամանքը հաշվի առնելով՝ գտնում են, որ չի պահպանվում  կարգը: 

Արդարադատության նախարարության աշխատակիցները թող ուսումնասիրություն կատարեն մակագրման համակարգի հետ կապված, թե արդյոք դատարանների նախագահները ճիշտ են մակագրում, թե ոչ, արդյոք պահպանում են կարգը, թե ոչ:

Եթե հակառակն է, ինչպես ես եմ մտածում, այսինքն չի պահպանվում, սա հեղինակազրկում է  դատական իշխանությունը, կլինի վարքագծի կանոնի խախտում»,- ասաց դատավոր Մխիթար Պապոյանը: