Ձեր վստահելի աղբյուրը

Արցախի Հանրապետության քաղաքացին, ով երեկ հայտնվել էր Ադրբեջանի Հանրապետության զինված ուժերի վերահսկողության տակ գտնվող տարածքում ու վերցվել արգելանքի, դեռ չի վերադարձվել հայկական կողմին։ 

Բերձորի քաղաքապետ Նարեկ Ալեքսանյանը Panorama.am-ի հետ զրույցում ասաց, որ այս պահին ռուս խաղաղապահների մասնակցությամբ բանակցություններ են ընթանում Արցախի քաղաքացուն վերադարձնելու ուղղությամբ։

«Մինչև օրվա վերջ ավելի հստակ կլինի, թե երբ կվերադարձվի»,- նշեց նա։

Ն. Ալեքսանյանն ասաց, որ մինչև պատերազմը 69-ամյա Անդրանիկ Ալեքսանյանը բնակվում էր Քաշաթաղի շրջանի հյուսիսային թևում, որն այժմ թշնամու վեահսկողության տակ է։

«Հաշվի առնելով, որ կռվից հետո է տեղափոխվել Բերձոր, երեկ էլ եղանակը մառախլապատ էր ու ձյուն, ըստ երևույթին, մոլորվել է»,- նշեց Բերձորի քաղաքապետը։

Հիշեցնենք՝ երեկ Արցախի Հանրապետության ԱԱԾ-ն հայտնել էր, որ Բերձոր քաղաքի 1953թ. ծնված բնակիչ Անդրանիկ Հրանտի Ալեքսանյանի ժամը 15։00-ի սահմաններում Բերձոր քաղաքի մոտակայքում մոլորվելու հետևանքով հայտնվել է Ադրբեջանի Հանրապետության զինված ուժերի վերահսկողության տակ գտնվող տարածքում և վերջիններիս կողմից վերցվել արգելանքի: Դեպքի մասին անմիջապես հաղորդվել էր ռուս խաղաղապահներին։

Հիշեցնենք նաև, որ 2021 թ. դեկտեմբերի 3-ին Ադրբեջանի զինված ուժերի ներկայացուցիչների կողմից ԱՀ Մարտունու շրջանի Ճարտար համայնքի վարչական տարածքում սպանվել էր նույն համայնքի բնակիչ Սեյրան Սարգսյանը: Դեպքի առթիվ հարուցված քրեական գործով կատարված քննչական և դատավարական այլ գործողությունների արդյունքները թույլ են տալիս փաստելու այն վարկածը, որ Սեյրան Սարգսյանը սպանվել է հեռահար կրակոցով, որից հետո ադրբեջանական զինվորականները նրա մարմինը չեզոք գոտուց տեղափոխել են իրենց մարտական դիրք: Այդ մասին են վկայում նաև դեպքի վայրի հարևանությամբ տեղակայված տեսադիտարկման սարքերի արձանագրած տեսանյութերի հետազոտման արդյունքները: