Ձեր վստահելի աղբյուրը

«Եթե իրականում պարոն Ներսես Երիցյանը ցանկանար շատ անկեղծ զրուցել հասարակության հետ, ապա ասելու էր, որ այս նախագծի շահառուն բացառապես բանկերն են»,-«Անկանխիկ գործառնությունների մասին» օրենքի նախագծի վերաբերյալ ելույթ ունենալիս ԱԺ-ում հայտարարեց «Հայաստան» խմբակցության պատգամավոր Արամ Վարդևանյանը:

Պատգամավորը բացատրեց, որ նախաձեռնության նապատակն այն է, որ բանկերն այլևս ունենան մենաշնորհային դիրք գումարների շրջանառության ոլորտում:

Կառավարության հեղինակած «Անկանխիկ գործառնությունների մասին» օրենքի նախագծով առաջարկվում է Հայաստանի տարածքում ֆիզիկական անձանց միջև 2022 թվականի հունվարի 1-ից 500,000 դրամը գերազանցող վճարումը և վճարման ստացումը իրականացնել անկանխիկ ձևով, նույն եղանակով անել նաև ֆիզիկական անձանց միջև 300,000 դրամը գերազանցող փոխառությունների տրամադրումը և ստացումը: Գրավատների դեպքում առաջարկվում է սահմանել 80,000 դրամի շեմը:

Օրենքի մեկ այլ դրույթով սահմանվում է, որ 2023 թվականի հունվարի 1-ից Հայաստանի տարածքում ֆիզիկական անձանց միջև՝ 300,000 դրամը գերազանցող վճարման և վճարման ստացման բոլոր գործարքները ևս իրականացնել անկանխիկ ձևով:

Արամ Վարդևանյանը հայտնեց, որ նախագծի հիմնավորումից պարզ չէ, թե ինչ է շահում հայ մարդը, բաց հստակ է, որ այն կոնկրետ միջամտություն է քաղաքացու սեփականության իրավունքին:

«Որովհետև մենք ասում ենք, որ պետությունը որոշում է, թե ինչպես կարող է տնօրինվել սեփականությունը, որն այս դեպքում դրամական միջոցն է, նաև՝ անկանխիկը և ստացվում է, որ սահմանվում է, թե ինչպես չեն կարող դրանք տնօրինվել: Սա դասական իմաստով իրավունքից հետքայլ է»,-շեշտեց ընդդիմադիր պատգամավորը: