Ձեր վստահելի աղբյուրը

«Որևէ մեկի՝ ինչ-որ երկրում գտնվելը բերել կապել ազդեցության գործակալի հետ, նույնն է, ինչ որ մեկի ազգանունից ելնելով նրան կապել ինչ-որ մեկի գործակալ լինել-չլինելու հետ և խնդրում եմ՝ ձեր շուրջը նայեք, հնարավոր է ազգանունների մեջ կասկածելի ազգանուններ հայտնաբերեք»,- իր արտահերթ ելույթում «Հայաստան» խմբակցության պատգամավոր Հռիփսիմե Ստամբուլյանին ակնարկեց ԱԺ  փոխխոսնակ Հակոբ Արշակյանը և խորհուրդ տվեց չգնալ այդ ճանապարհով, քանի որ այդ գործելաոճը շատ սխալ է համարում:

Հռիփսիմե Ստամբուլյանը տեղից կոշտ արձագանքեց Արշակյանին:

«Հայտարարում եմ նախազգուշացում Հռիփսիմե Ստամբուլյանին ու ինձ թվում է, որ դուք լավ չեք հասկանում: Ձեզ սխալ է թվում ու ձեր ամբողջ խմբակցությանը ես կոչ եմ անում՝ հանգստացեք մի հատ»,- միջամտեց նիստը նախագահող Ռուբեն Ռուբինյանը։

«Հայաստան» խմբակցությունից հնչած հարցին, թե հակառակ դեպքում ինչ է անելու՝ Ռ ուբինյանը պատասխանեց. «Կանեմ այն, ինչը որ կուզեմ»:

«Չես կարա, դե արի տեսնենք ինչ կարաս անես»,-հայտարարեց ընդդիմադիր խմբակցության պատգամավորներից մեկը:

Ռուբեն Ռուբինյանը շտապ քայլերով մոտեցավ «Հայաստան» խմբակցության կողմը՝ ընդամենը գոռալու, որ հանգստանան:

ՔՊ խմբակցության արական սեռի ներկայացուցիչները նույնպես մոտեցան ընդդիմադիր խմբակցությանը, բայց քանի որ նախկինի նման նրանց թիվը մի քանի անգամ չէր գերազանցում ընդդիմադիրների թվին՝ Ռուբինյանի հրահանգով հետ քաշվեցին:

Դրանից հետո ընդդիմադիր և ՔՊ-ական պատգամավորները սկսեցին լեզվակռիվը, որից հետո Ռուբինյանը հայտարարեց ընդմիջում: