Ձեր վստահելի աղբյուրը

«Հունվարի 13-ին ԱԺ նախագահը կարգադրություն է ստորագրել, որի համաձայն աշխատանքային այցով  հունվարի 13-15 Մոսկվա է գործուղել ԱԺ փոխնախագահ Ռուբեն Ռուբինյանին։ Նա Մոսկվայում հունվարի 14-ին  հանդիպել է Թուրքիայի բանագնացի հետ։ Ռուբեն Ռուբինյանը ԱԺ կողմի՞ց է բանակցություններ վարել Մոսկվայում, թե՞ ինչ այլ նպատակով է Մոսկվա մեկնել ԱԺ բյուջեի հաշվին»,- Ազգային ժողովի նիստում այս հարցերը ԱԺ փոխնախագահ,  ԱԺ նախագահի պարտականությունները կատարող Հակոբ Արշակյանին ուղղեց  «Հայաստան» խմբակցության պատգամավոր Գեղամ Մանուկյանը։

Հ.Արշակյանը պատասխանեց, որ պետության կողմից բանագնաց է ներկայացված և ըստ այդմ բանագնացի գործուղման ծախսերը  նույնպես պետությունն է հոգում։

Գ.Մանուկյանն արձագանքեց, որ փորձել է ման գալ ու գտնել, թե ինչ որոշման, կարգադրության հիման վրա է Ռուբեն Ռուբինյանը նշանակվել բանագնաց։ Նա նշեց, որ Թուրքիայի կողմից նշանակված բանագնացը նշանակվել է Էրդողանի հրամանագրի համաձայն։

«Պետության կողմից ԱԺ-ն արդյո՞ք լիազորել է ԱԺ փոխանախագահ Ռուբեն Ռուբինյանին  ՀՀ անունից բանակցություններ վարել Թուրքիայի հետ։ ԱԺ խորհրդում այդ հարցը քննարկվե՞լ է, որ  Թուրքիայի հետ բանակցություններ վարի»,- նշեց ընդդիմադիր պատգամավորը։

Նա հիշեցրեց, որ Ռուբինյանի՝ որպես բանագնաց նշանակելու մասին հանրությանը տեղեկացվել է միայն ԱԳՆ մամուլի քարտուղարի մամուլին տված կարճ պատասխանի հիման վրա։

Հ.Արշակյանը նշեց, որ յուրաքանչյուր բանակցության ժամանակ գոյություն ունի պատվիրակություն, պատվիրակության ղեկավար, համապատասխան ընթացակարգ, թե ինչ օրակարգով, ինչ ժամկետներում, ինչ ֆինանսվորմամբ է գործուղվում պատվիրակությունը տվյալ երկիր. «Այս դեպքում այդ բոլոր պրոցեդուրաները պահվել են, եթե հավելյալ  որևէ հարց է հետաքրքրում, կարող ենք աշխատանքային կարգով քննարկել, հարցերի պատասխանը ստանալ»։