Ձեր վստահելի աղբյուրը

«Ամուր նյարդերի մասին խոսող իշխանությունը խիստ դյուրագրգիռ վիճակում է հայտնվում ընդդիմության հարցադրումներից»,- անդրադառնալով ԱԺ միջադեպին՝ լրագրողներին ասաց «Հայաստան» խմբակցության պատգամավոր Ագնեսա Խամոյանը։

Պատգամավորը նկատեց, որ Նիկոլ Փաշինյանը բազմիցս հայտարարել է` կարևոր գործընթացներ են տեղի ունենում, և պետք են ամուր նյարդեր։

Ըստ Խամոյանի՝ ընդդիմությունը նիստի մեկնարկից սկսած փորձում է հասկանալ, թե ինչ բանակցություններ են տեղի ունեցել ՀՀ-ի և Թուրքիայի հատուկ ներկայացուցիչների միջև։

«Ես հայտարարեցի, որ ԱԺ ամբիոնից խոսք է հնչել Ռուբեն Ռուբինյանի՝ Թուրքիայի ազդեցության գործակալ լինելու մասին։ Իշխանափոխությունից անմիջապես առաջ Ռուբինյանը Թուրքիայում ուսումնառության էր կամ ինչ-որ պրակտիկա էր անցնում։ Նա նշանակվել է ՀՀ հատուկ ներկայացուցիչ, հիմա կարող է չէ՞, ողջամիտ կասկած կամ մտավախություն լինել, թե ինչու Ռուբինյանը նշանակվեց։ Սա հարցադրումներից մեկն էր»,- ասաց պատգամավորը։

Նա նկատեց, որ նման անհանդուրժողականություն կա այն իշխանության կողմից, որը բազմիցս հայտարարում էր, թե բաց է աշխատում, իսկ այսօր ժողովրդից թաքցնում է ամենակարևոր գործընթացներից մեկը՝ Հայաստան-Թուրքիա կարգավորումը: