Ձեր վստահելի աղբյուրը

«Սահմանադրական դատարանի որոշման մեջ ոչ մի հիշատակում չկա բարերարի, հարևանի, բարեկամի մասին։ Կա հիշատակում պետության մասին։ ՍԴ որոշման մեջ բառացի գրված է, որ պետությունը պետք է միջոցներ ձեռնարկի սոցիալական համերաշխության օրակարգով»,- ԱԺ-ում լրագրողների հետ զրույցում ասաց  «Հայաստան» խմբակցության պատգամավոր Արամ Վարդևանյանը՝ անդրադառնալով կորոնավիրուսի դեմ պայքարում ՀՀ կառավարության գործողություններին ու ՍԴ որոշման մասին: 

Նրա խոսքով, ՀՀ-ում նվազագույն աշխատավարձը 68 հազար դրամ է, ՊՇՌ թեստերի ծախսերը 15 հազարից մինչև 40 հազար դրամ կարող է լինել և հենց այդ կոնտեքստում պետությունը պետք է միջոցներ ձեռնարկի սոցիալական համերաշխության օրակարգով։

«Եթե այս իշխանությունը չի ուզում ընկալել այս պարզ ճշմարտությունը, դրա հետևանքները կրելու է այս կամ այլ ձևով. մարդկանց վրա հակասահմանադրական պարտականություն դնելը ինքնին պետք է հետևանք առաջացնի»,- ասաց սահմանադրագետ պատգամավորը:

Ա. Վարդևանյանի խոսքով, ՍԴ-ն չի կարող վերածվել գործադիրի, սակայն կարող է հուշում տալ:

«Առողջապահության նախարարի կամ իշխանության ընկալմամբ, դա արվում է նրա համար, որ մարդիկ հարևանների կամ բարերարների գտնեն։ Եթե կառավորության անդամները չեն ուզում ընկալել իրենց կարգավիճակը, առաքելությունն ու պարտականությունները, չեն ուզում առերեսվել իրավունքների և պարտականությունների հետ, ՍԴ-ն անզոր է։ Ամենազորեղը Հայաստանի քաղաքացիները պետք է լինեն»,- նշեց ընդդիմադիր պատգամավորը՞ 

Արամ Վարդևանյանը խորհուրդ է տալիս գործատուների հետ համատեղ հարցը դնել կառավարության առջև։

«ՍԴ-ն գործատուի վրա պարտականություն չի դրել, սակայն պետության վրա դրել է:

Ռեպրեսիաներից, վարչական միջամտություններից թող ոչ մի աշխատող կամ գործատու չվախենա։ Բիզնեսը կորցնելու խնդիր չի առաջանա։ Կարող են վարչական ակտ գրել, գործատուն կարող է շատ հանգիստ բողոքարկել վարչական դատարան՝ հիմքն էլ դնի ՍԴ որոշումը»,- ասաց նա:

Ա.Վարդևանյանի խոսքով, ՍԴ որոշումից հետո իշխանությունը ներողություն չի խնդրել, որևէ փոխհատուցում նախորդ կատարված ծախսերի համար չր կատարել, հիմա էլ չր կատարում, այլ հարցն անլրջացնում է այն պայմաններում, երբ Հայաստանում սոցիալ-տնտեսական լուրջ խնդիրներ կան:

«Այս իշխանությունները համարում են, որ իրենք ՍԴ-ում հաղթանակներ են տանում։ Հաղթանակն ընդդեմ ո՞ւմ, ընդդեմ ժողովրդի՞։ Լուրջ, դուք ժողովրդին հաղթող իշխանությո՞ւն եք, երբ դուք եք ժողովրդին ծառայողները և պարտավոր եք ծառայել։ Այս ընկալման համար շատ կարևոր կլինի մի քանի գործերով իրավական պրոցեսների իրացում»,- ասաց Արամ Վարդևանյանը: