Ձեր վստահելի աղբյուրը

«Ազդեցության գործակալների փնտռտուքը ԱԺ դահլիճում սկսվել է ոչ երեկ»,-  Ազգային ժողովում հայտարարեց «Հայաստան» խմբակցության պատգամավոր Արթուր Ղազինյանը:

Նրա խոսքով, որպեսզի իրենց ու հանրությանը պարզ դառնա, թե ովքեր են ազդեցության  գործակալները, քանի որ իշխանական թևը մեղադրում է  ընդդիմությանը, ընդդիմությունը՝ իշխանությանը, շատ կարևոր է ընկալ, թե ինչ է դա բնորոշումով.

«Կոնկրետ  շահին ծառայող հանրային գործիչներն են, որոնք  ունեն ճանաչելիություն, որոնց լսում են, ընթերցում են, նրանց վարքաբանությունը, տարածած  նարատիվները, ընտրված թիրախները, օգտագործած բառամթերքը ծառայո՞ւմ է արդյոք տվյալ պետության ազգային պետական շահին, թե՞ ծառայում է օտար պետության շահին: Պետք է տարանաջատել հավաքագրված իրական գործակալին ազդեցության գործակալներից, քանի որ  ազդեցության գործակալները ի վեջո ինչ որ մի պահից, եթե ծառայում են  օտար պետության շահին, հավաքագրվում են այդ պետության կողմից»:

Նրա խոսքով, ոնց էլ պտտեցնեն, ի վեջո առանցքը մնում է հայկական շահը, արդյո՞ք հայկական շահին են ծառայում հանրային գործիչները, թե՞ ոչ:

«Օրինակ, եթե ընդդիմության համար Արցախը հայկական շահի կարևոր հենասյուներից մեկն է, ցեղասպանության  միջազգային ճանաչումը հայկական շահի ամենակարևոր հենասյուներից մեկն է, Թուրքիայի հետ զգուշավոր, բավական զուսպ հարաբերությունները և Թուրքիան որպես բարեկամ չընկալելու կոնտեքստը ևս հանդիսանում է  հայկական շահի հիմնարար սկզբունքներից մեկը, ապա իշխանության համար Արցախը մեծ հաշվով  տեղավորվում է՝  Արցախը խնդիր է եղել  որպեսզի կարողանանք զարգացնել հարաբերությունները, բացենք կոմունիկացիաները, պետք է այդ հարցը կարգավորել՝ կուզեք ազատագրված, կուզեք  գրավյալ,  կուզեք օկուպացված ձևակերպումներով:

Կամ կա այսպիսի դիսկուրս՝ Սերգոն լավ չի ապրելու, քանի դեռ չի լուծվել Արցախի հարցը կամ՝  ոչինչ էլ չենք զիջելու, 100 տարի էլ զարգանալու ենք»,-  նշեց Ղազինյանը:

Նա ասաց, որ եթե նպատակ ունեն պարզել տվյալ սուբյեկտը հանդիսանում է ազդեցության գործակալ, թե ոչ, պետք է վերցնել տվյալ սուբյեկտին,  իր հանրային գործունեության ողջ ժամանակահատվածը,  վերցնել ա կետից բ կետը և հետևել նրա կողմից հանրային գործունեության ընթացքում ծավալած դիսկուրսը և հետագայում  ստանալով դա իրականացնելու հնարավորություն՝ ինչպիսի գործողություններ է կատարել այդ  նարատիվների կյանքի կոչելու համար:

«Ընդդիմության համար Թուրքիան, Ադրբեջանը սպառնալիք են, վտանգ, նրանց մտքում Հայաստան պետություն, հայ մարդ չկա այս տարածաշրջանում: Նրանց համար մենք չպետք է լինենք: Մենք այդպես ենք մտածում, համենայնդեպս: Իշխանության համար դա հնարավորություն է, այնտեղից ներդրումներ, ֆինանսներ կգան, փող կաշխատեն,  համոզել են մարդկանց, որ Թուրքիայի հետ սահմանը բացենք, հարցը կարգավորենք,  լավ կապրենք, տուրիստներ կգան, կբուժվեն Գյումրիում: Դա տարբեր կոնցեպտների մոտեցումներ են:

Հետևաբար, որպեսզի պարզ դառնա,  թե իրականում հայկական շահի տիրույթում գործունեություն ով է իրականացում, ինչ խորությամբ, բովանդակությամբ, պետք է ընդամենը դա անել»,- նշեց ընդդիմադիր պատգամավորը:

Նր խոսքով, ազդեցության գործակալը քրեական օրենքով նախատեսված արարք է՝ Քրեական օրենսգրքի 299-րդ հոդվածի պետական դավաճանություն:

«Եթե կան հիմնավոր  կասկածներ  առ այն, որ ընդդիմության շրջանում կան մարդիկ, ովքեր  իրականացնում են օտարերկյա պետության շահերին ուղղված գործունեություն, ապա, բարդ չի, կարելի է  հաղորդում գրել հանցագործության մասին: Վստահեցնում եմ, ձեր գրած հաղորդումները կունենան բոլորովին այլ ճակատագիր, քան մեր գրած հաղորդումները»- նշեց նա:

Այնուհետև Արթուր Ղազինյանը խոսքն ուղղեց ԱԺ փոխնախագահ, հայ-թուրքական բանակցություններում հատուկ ներկայացուցիչ Ռուբեն Ռուբինյանին.

«Պարոն Ռուբինյան, դուք ներկայացում եք Հայաստանը Թուրքիայի հետ հարաբերությունների կարգավորման գործընթացում: Այդպես է հայտարարվել: Հայտարարվել է մի բան, իրական մանդատ շնորհելը մեկ այլ բան է: Մանդատ շնորհելու իրավասություն ունի վարչապետը, որոշում է  ստորագրում:

Երբ ասում ենք մանդատ չունեք, նեղանում եք, լիազորություն չունեք, ևս նեղանում եք: Ասում եք՝ ընդդիմությունը փորձում է  վարկաբեկել բանագնացին: Բացարձակ: Բանագնացն ինքն է իրեն վարկաբեկում իր վարքագծով, ոչ հավասարակշիռ վերաբերմունքով: Եթե բանագնացն ունի այդպիսի խնդիր, չպետք է գտնվի խորհրդարանում, այլապես  մշտապես գտնվելու է  ընդդիմության թիրախում: Ձևն է այդպես: Եթե լինեիք ընդդիմություն, դուք էլ էիք փորձելու կորզել առավելագույնը իշխանությունից, թե ինչ են բանակցում: Եթե դուք ուզում էիք դա գաղտնի պահել, պետք է լիներ փորձառու դիվանագետ, սահմանվեին  չափանիշներ՝ փորձառություն, գիտելիք, աշխատանքի փորձ, կապեր, դրանով ընտրվեր: Ընտրվեր ու ասեր, որ գաղտնիության ռեժիմում պետք է գործի, բանակցությունները չեն բացահայտվում:

Սա  տեղի չի ունեցել»:

Նա ընդգծեց, որ Ռուբեն Ռուբինյանն ունի լեգիտմության լուրջ խնդիր, մանդատի  բացակայության խնդիր է սա:

«Հետևաբար ինչ-որ մի պահի չզարմանաք, որ հենց այս ամբիոնից, իրադարձությունների ոչ բարենպաստ զարգացման պարագայում, կարող է հայտարարվել, որ ես չեմ լիազորել Ռուբեն Ռուբինյանին: Ի վերջո պարզվի, որ Ռուբինյանը  գործել է ինքնագործունեությամբ, որովհետև լիազորություններ չունի իր վրա ֆիքսած» ,- ասաց «Հայաստան» խմբակցության պատգամավորը:

Արթուր Ղազինյանն ընդգծեց, որ սա պետության համար կենսական կարևոր գործընթաց է, որում պետք է պահպանվեն պետականությանը բնորոշ բոլոր ատրիբուտները:

«Սա պարտադիր պահանջ է: Լրացրեք այդ բացը, պարոն Ռուբինյան»,- ասաց ընդդիմադիր պատգամավորը: