Ձեր վստահելի աղբյուրը

Ազգային ժողովի «Պատիվ ունեմ» խմբակցության պատգամավոր Հայկ Մամիջանյանը ԱԺ-կառավարություն հարցուպատասխանի ժամանակ ԱԳ նախարար Արարատ Միրզոյանին հարց ուղղեց հայկական կողմի՝  Ռուսաստանին, Ադրբեջանին փոխանցած Հայաստան-Ադրբեջան սահմանագոտում իրավիճակի դեէսկալացիային, լարվածության նվազմանը, անվտանգության և կայունության մակարդակի բարձրացմանն ուղղված մի շարք միջոցառումների փաթեթի մասին:

Նա նշեց, որ այնտեղ հայելային հետքաշման մասին խոսք կա, ցանկանում է ճշգրտել՝  հայելային հետքաշման մասին խոսելիս որպես հիմք ի՞նչն է վերցվում՝ մինչև  2020 թվականի դեկտեմբեր եղած իրավիճակը, 2021 թ. մայիսի դրությամբ  եղած իրավիճակը, թե 2021 թ. նոյեմբերի իրավիճակը:

«Վստահ եմ, որ ծանոթ եք ՄԻՊ զեկույցին, ըստ որի  հայելային հետքաշման որոշակի տրամաբանության պարագայում մենք ուղղակիորեն որոշ հայկական գյուղեր անպաշտպան ենք թողնում առնվազն»,- ասաց Հայկ Մամիջանյանը:

Արարատ Միրզոյանը նախ ասաց, որ շատ դետալներ բացահայտել չի կարող, բայց իր ներկայացրած փաթեթում նախատեսված են հանգամանալից կերպով մեխանիզմներ, որոնց գործարկման արդյունքում որևէ գյուղ, ճանապարհ անպաշտպան չի մնա:

«Շատ դետալներ չեմ կարող բացահայտել, քանի որ քննարկման փուլում են:  Միայն կարող եմ ասել, որ խոսքը խորհրդային սահմանների մասին է:

Այս  պահին քննարկվողը Խորհրդային Հայաստանի և Խորհրդային Ադրբեջանի միջև սահմանագիծն է որպես  հիմք հետքաշման համար»,- ասաց ԱԳ նախարարը:

Հայկ Մամիջանյանը նաև հետաքրքրվեց Ստոկհոլմում Թուրքիայի ԱԳ նախարար Չավուշօղլուի հետ հանդիման մասին, որի վերաբերյալ պաշտոնական հաղորդագրություն չի եղել:

Միրզոյանն ասաց, որ խոսքը պաշտոնական հանդիպման մասին չէ, ուղղակի մի սենյակից մյուս սենյակ, որտեղ պետք է տեղի ունենար պաշտոնական նիստը, երկու սրահները  կապող միջանցքում կողք-կողքի են քայլել, խոսակցությունը եղել է այսպես. «Բարև ձեզ: Բարև ձեզ: Ուրախ եմ ծանոթանալ: Ուրախ եմ ծանոթանալ: Մենք  տրամադրված ենք կարգավորմանը: Մենք էլ ենք տրամադրված  կարգավորման:  Այդ դեպքում նշանակեք ներկայացուցիչ: Հենց որ գնանք տուն, անմիջապես կներկայացնենք ներկայացուցիչ և կսկսենք գործընթացը»:

«Կարծում եմ՝  լավ խոսակցություն էր և ազդակներ էլ, կարծես թե, դրական են: Որևէ գաղտնի հանդիպման մասին խոսք չկա, քանի որ  պաշտոնական հանդիպում չէր,  ըստ այդմ էլ հաղորդագրություն չկա, բայց գրեթե տառացիորեն վերարտադրեցի խոսակցությունը»,- ասաց Արարատ Միրզոյանը: