Ձեր վստահելի աղբյուրը

Ազգային ժողովի «Հայաստան» խմբակցության պատգամավոր Արամ Վարդևանյանը կառավարության կողմից ներկայացված «Գովազդի մասին» օրենքում փոփոխություններ լրացումներ կատարելու մասին նախագծի քննարկմանն ասաց, որ այսօր հեռուստաընկերության տիրույթում կա սպորտային  ալիք, որը համընկնում է  հենց շահումով խաղերի ոլորտում գործունեություն իրականացնող  կազմակերպություններից մեկի հետ:

Նշենք, որ խոսքը «Վիվառո» հեռուստաընկերության մասին է:

«Ենթադրենք, «կոկա-կոլա»-ի գովազդը մի օր ագելվում է և առաջանում է «կոկա-կոլա» թիվի, որտեղ ոչ մի «կոկա-կոլա»-ի գովազդ չի արվում, բայց միշտ ասում ես` «կոկա-կոլա» թիվիի եթերում նայեք», - որպես օրինակ բերեց Ա. Վարդևանյանը:

Նախագծի հիմնական զեկուցող ՀՀ ֆինանսների նախարարի տեղակալ Արմեն Հայրապետյանն ասաց, որ կոնկրետ դեպքով քննարկումներ են եղել, ՏՄՊՊՀ-ն նույնպես իր եզրակացության մեջ անդրադարձել է այդ դեպքին:

«Գովազդի մասին օրենքում կարգավորում կա` հովանոցային գովազդ: Հենց այն դեպքերի համար է, երբ որևէ գովազդի սահմանափակում կա, բայց դու որևէ ապրանքով կամ ծառայությունով հիշեցնում ես արգելված գովազդի մասին, հետևաբար որակվում է հովանոցային գովազդ: Նույն սահմանափակումն է կիրառվում, ինչ կիրառվում էր այդ ապրանքի նկատմամբ», - ասաց փոխնախարարը:

Նրա խոսքով, գովազդը վերահսկող մարմինը պետք է առանձին դեպքը քննության առարկա դարձնի և բացահայտի` հովանոցային գովա՞զդ է, թե՞ ոչ, եթե բացահայտվի հովանոցային է՝ ապա միանգամից դուրս կգա:

Արդեն ելույթում Արամ Վարդևանյանն ասաց, որ իսկապես, շահումով խաղերի ոլորտում մտահոգիչ իրավիճակ է, քանի որ շահումով խաղերը վերաբերվում են ՀՀ յուրաքանչյուր մարդու, ով դրա մեջ ներքաշվում է:

Ըստ նրա, նախագծի նպատակը որոշակիորեն դրա տարածումը սահմանափակելն է, հնարավոր դրական լույսի ներքո ներկայացնելը նույնիսկ արգելելը, սակայն մյուս կողմից մտահոգություն հայտնողներն են՝ հեռուստաընկերություն, ռադիո, որոնք, բնականաբար տնտեսական գործունեություն են իրականացնում:

«Ունենք վատի և շատ վատի միջև շահերի բախում: Կարծում եմ՝ այն ճանապարհը, որն ընտրվել է, դա է ամենից լավ ճանապարհը:

Մի նժարի վրա ունենալով տնտեսական գործունեություն, հարկեր վճարում, բայց բոլոր դեպքերում իսկապես այն հարցերից մեկն է, որ նժարը պետք է լինի մյուսի վրա»,-  ասաց նա: 

Նախագծով առաջարկվում է. «Արգելվում է շահումով խաղի կամ ինտերնետ շահումով խաղի կամ խաղատան կամ խաղասրահի կամ տոտալիզատորի կամ դրանց կազմակերպիչների ցանկացած տեսակի գովազդը, այդ թվում՝ ռադիոյով, հեռուստատեսությամբ կամ համացանցով, բացառությամբ իր պաշտոնական կայքի կամ խաղատների կամ շահումով խաղերի կամ ինտերնետ շահումով խաղերի կամ տոտալիզատորի (խաղասրահ, բուքմեյքերային գրասենյակ) շենքերի, շինությունների կամ սրահների մեջ կամ վրա, Հայաստանի Հանրապետության սահմանային մուտքի կետերում, ինչպես նաեւ առնվազն չորսաստղանի կարգին համապատասխան որակավորման պահանջներին եւ չափանիշներին համապատասխան հյուրանոցներում տեղադրվողների կամ սույն հոդվածով սահմանված դեպքերի, իսկ խաղարկությունով կամ համակցված վիճակախաղի գովազդը թույլատրվում է նաեւ խաղարկությունով կամ համակցված վիճակախաղի վաճառակետերում:…

Ընթացիկ իրավիճակը

Մինչև«Գովազդի մասին» օրենքում լրացումներ եւ փոփոխություններ կատարելու մասին» 19.06.2019թ. ՀՕ-91-Ն օրենքի ուժի մեջ մտնելը (ուժի մեջ է մտել 2020 թվականի հունվարի 1-ից) ինտերնետ շահումով խաղերի գովազդը եղել է ագելված, այդ թվում՝ հեռուստատեսությամբ կամ ռադիոյով կամ համացանցով, բացառությամբ իր պաշտոնական կայքի կամ խաղատների կամ շահումով խաղերի շենքերի, շինությունների կամ սրահների մեջ կամ վրա, Հայաստանի Հանրապետության սահմանային մուտքի կետերում, ինչպես նաեւ առնվազն չորսաստղանի կարգին համապատասխան որակավորման պահանջներին եւ չափանիշներին համապատասխան հյուրանոցներում տեղադրվողների: Օրենքի համաձայն 2020 թվականի հունվարի 1-ից թույլատրվել է ինտերնետ շահումով խաղերի գովազդը եւ նրա նկատմամբ սահմանվել է, որ կիրառվում են վիճակախաղի գովազդի համար սահմանված պահանջներն ու սահմանափակումները: Արդյունքում 2020թ. համացանցով կատարված խաղադրուքների համեմատած 2018թ. հետ ավելացել են 6 անգամ, իսկ մասնակիցների թիվը 3 անգամ: ...

Ակնկալվող արդյունքը
Նախագծի ընդունման արդյունքում ակնկալվում է խաղային բնագավառում ապահովել միասնական քաղաքականություն եւ հավասար մրցակցային պայմանների, պահանջների սահմանում: Ինտերնետ շահումով խաղերի, ինչպես նաեւ վիճակախաղերի՝ տոտալիզատորների կազմակերման գործունեության գովազդի կարգավորումները կհապատասխանեցվեն խաղատների եւ շահումով խաղերի կազմակերպման գովազդներին ներկայացվող սահմանափակուներին՝ ավելի հավասարակշռված եւ մրցակցային միջավայրի ապահովման, սպառողների իրավունքների եւ շահերի պաշտպանության, անձանց բարոյական կամ նյութական վնաս պատճառելու սպառնալիքով հղի գործունեության կանխարգելման, հասարակության խոցելի խմբերը մոլեխաղերով հրապուրվելու վտանգից զեռծ պահելու, հաշվի առնելով բնակչության սոցիալական վիճակը եւ մոլեխաղերով հրապուրված անձանց կողմից իրենց եւ իրենց ընտանիքներին նյութական ծանր դրության հասցնելու հաճախ հանդիպող իրողությունը, քաղաքացիների՝ մոլեխաղերով տարվելու (հրապուրվելու) անմիջական հնարավորության սահմանափակման նպատակով:

Նախագիծը դժգոհություն է առաջացրել գովազդային մեդիա ոլորտում՝ որ գովազդային ընկերությունների հասույթի մեծ մասը (60%-70%) գոյանում է ինտերնետ շահումով խաղերի եւ վիճակախաղերի ոլորտի շնորհիվ, սակայն մեր հաշվարկներով այն կազմում է 20%-25%»: