Ձեր վստահելի աղբյուրը

Ադրբեջանագետ Արմինե Ադիբեկյանին այսօր ոստիկանություն են հրավիրել ֆեյսբուքյան գրառման համար։

«Սա արդեն երկրորդ գործն է, ենթադրաբար կանչել են այն գրառման համար, որն արել եմ հունվարի 5-ին։ Մենք հրաժարվեցինք ցուցմունք և բացատրություն տալուց, տեսնենք, թե գործն ինչ ընթացք կստանա։ Ես կարող եմ վստահ փաստել, որ ռեպրեսիվ ապարատը գնալով ավելի թափ է հավաքում, նման գործերը շատանալու են»,-ՔԿ-ից դուրս գալուց հետո լրագրողների հետ զրույցում ասաց Ադիբեկյանը։


Նա  նկատեց, որ վիրավորանքի համար տուգանքը «համով» գումարներ է նախատեսում, եթե ամեն ամիս 100 հոգու դատեն, ապա կարող են բյուջեի զգալի մասը լցնել։

«Մարդիկ մեռան դրսի մարդկանց անպատվությունն ու վիրավորանքը մարսել, բայց նրանցից փող մուրալ չեն կարող։ Իսկ երկրի ներսում որոշել են, որ անպատվությունը կուտեն, համ էլ փող կաշխատեն։ Երևի երեկոյան քնելուց առաջ աղոթում են, Տեր Աստված, ընենց արա, որ վաղը ինձ մի 3-4 հոգի հայհոյի, որ 2-3 մլն դրամ ըտեղից կպնի։ Ես ուրիշ բացատրություն չունեմ, բիզնես են սարքել։ Այս մարդիկ վաճառքի են հանել իրենց արժանապատվությունը»,-նման կարծիք հայտնեց Ադիբեկյանը։

Նրա խոսքով, նման հետապնդումները չեն կարող լռեցնել իրեն։

«Անհույս է։ Քանի այս վարչակազմը ոչնչացնում է մեր պետականությունը, ոտնատակ է առնում  մեր ժողովրդի, ազգի արժանապատտվությունը, ինձ լռեցնելու մի ձև կա, այդ դեպքում էլ նրանք կունենան շատ լուրջ խնդիրներ հենց իրենց պատվիրատուների հետ։ Անհույս է, որ ես լռեմ՝ նայելով, թե ոնց են քանդում իմ երկիրը»,-ասաց նա։

Ադիբեկյանի ներկայացուցիչ Ռուբեն Մելիքյանը նշում է, որ չարաբաստիկ հոդվածը ՔՊ-ի ընդունածն է, որի նպատակը հենց իրենց պաշտպանելն է։

«137.1 հոդվածն ունի երեք մասն, առաջինը վերաբերում է պաշտոնատար անձանց ծանր վիրավորանքին, երրորդ մասը՝ պարբերբարար ծանր վիրավորանք հասցնելուն։ Մեր պատկերացմամբ, նոր քրեական գործ է հարուցվելու, միացվելու է նախորդին։ Այդ դեպքում մինչև 3 մլն դրամի տուգանք է նախատեսվում,  նաև պատիժ՝  1-3 ամիս կալանք»,-ասաց նա։

Մելիքյանի խոսքով, մեղադրանքն անհիմն է, գրառումը ծանր վիրավորանք չի պարունակում։

«Այն ընդհանրապես  հանցոգործություն չպետք է լիներ, բայց եթե համարում են, որ հանցագործություն է, ապա չի կարող այն դիտարկվել ծանր վիրավորանք, քանի որ այդ անձը՝ խոսքը վերաբերում է վարչապետի պաշտոնը զբաղեցնող անձին, իր գրքում իր մասին գրել է, որ նման պրոցեսի մեջ է։ Եթե նորմալ բան չլիներ, այդ մարդն իր գրքում նման բան չէր գրի։ Եթե նորմալ է, տիկին Ադիբեկյանին չեն կարող մեղադրել»,-ասաց Մելիքյանը։

Նա հիշեցրեց, որ Հայաստանում վիրավորանքը ապաքրեականացվել է եվրոպական կառույցների պահանջով։

Հիշեցնենք, որ 2018 թ. իշխանափոխությունից հետո լույս տեսավ Փաշինյանի՝ «Երկրի հակառակ կողմը» վերտառությամբ գիրքը (Երևան, 2018)։ 

Գրքում նա մասնավորապես գրել է. «Ես տեսնում էի այդ պատերազմի զոհերին՝ բոզացած ու դրանից երջանիկ աղջիկների, բոզացած ու դրանից երջանիկ տղաների, բոզացած ու դրանից շոյված մայրերի, բոզացած և դրանից արծվացող հայրերի տեսքով։ Զգում էի, որ ինքս էլ սկսում եմ բոզանալ, և գուցե շուտով նույնքան հպարտ կզգամ ինքս ինձ, որովհետև հաղթածի բանակում կլինեմ, կդառնամ խորհրդանիշը՝ այդ պատերազմում բոզության վերջնական և անշրջելի հաղթանակի (էջ 338)»։