Ձեր վստահելի աղբյուրը

«Ի՞նչ է նշանակում զորքերի հայելային հետքաշում: Որտե՞ղ՝ ամբողջ սահմանով մե՞կ, թե՞ այն  հատվածներում, որտեղ հակառակորդը մխրճվել է»,- ԱԺ-ում լրագրողների հետ զրույցում ասաց պաշտպանության նախկին նախարար, «Հայաստան» խմբակցության ղեկավար Սեյրան Օհանյանը:

Ըստ նրա, հակառակորդը պետք է միակողմանի հետ քաշվի ՀՀ այն հատվածներից, որտեղ  մխրճվել է:  Ս. Օհանյանի խոսքով, հայկական կողմն այդ ուղղությամբ համապատասխան աշխատանքներ պետք է իրականացնի:

«ԱԺ-ում ԱԳ նախարարն ասում է՝  ՀԱՊԿ-ի հետ քաղաքական գործընթացներ ենք սկսել: Լավ կլիներ,  որ ինքը պարզ  բացատրեր՝ մենք բանակցում ենք ՀԱՊԿ բոլոր երկրների քաղաքական ղեկավարության, ռազմական կոմիտեի, նաև աշխատում ենք  միջազգային  բոլոր կազմակերպությունների հետ, որ ստիպենք  Ադրբեջանին հետ քաշվել: Դա է մեր այսօրվա աշխատանքը, եթե չստիպենք հետ քաշվել, ապա  մենք ստիպված ենք լինելու գործադրելու ՀԱՊԿ-ի ռազմական կոմպոնենտը Հայաստանի զինված ուժերի հետ մեկտեղ»,-  ասաց Ս. Օհանյանը:

Պաշտպանության նախկին նախարարը նշեց, որ սահմանագծման և սահմանազատման խնդիրները լուծելու համար հակառակորդ, թշնամի պետությունները պետք է  վերածվեն հարևան պետությունների, ստեղծվի երկու հարևան պետությունների կառավարություններից խառը հանձնաժողով, որն աշխատանքներ տանի ճշգրտումներն իրականացնելու համար. «Ադրբեջանը հիմա մեր համար հարևա՞նն է իր հոխորտանքներով, երկրի ղեկավարի ռազմական հռետորաբանությամբ, սադրանքներով,  լոկալ հարձակումներով  ՀՀ սահմանում, էլ չեմ ասում Թուրքիայի ընդգրկվածությունը:

Միայն լիարժեք, խորաթափանց  քննարկումից հետո կարելի է  որոշել, թե որտեղ ինչպես պետք է անցի սահմանը, իսկ այս պարագայում  հայելային հետքաշում ասածն ինձ համար մերկապարանոց, անիմաստ խոսակցություններ են»:

Նրա կարծիքով, Ադրբեջանը երբևէ չի համաձայնվի հայելային հետքաշմանը, քանի որ  Ադրբեջանն ու Թուրքիան հանցագործներ են, նրանք հանցագործություն են իրականացրել ՀՀ և ԱՀ հանդեպ:

Խոսելով ՀԱՊԿ գործունեության մասին, Ս. Օհանյանն ասաց, որ մինչև 44-օրյա  պատերազմը, նույնիսկ ամոթ էր միանգամից դիմել ՀԱՊԿ-ին հայ-ադրբեջանական  սահմանին, շփման գծում սադրանքների դեպքում, քանի որ Հայաստանի Զինված ուժերն ի վիճակի էին իրենց առջև դրված խնդիրներն իրականացնել ու իրականացրել են հստակ:

«Այլ իրավիճակ է հիմա: Ակնհայտ է, որ միայնակ քո անվտանգության խնդիրները չես կարող լուծել, պետք է այդ դեպքում լուրջ բանակցել նաև ՀԱՊԿ շրջանակում»,- ասաց Ս. Օհանյանը:

Սեյրան Օհանյանը տեսականորեն հնարավոր է համար Հադրութի ու Շուշիի վերադարձը, Արցախի Հանրապետության ժողովրդի իրավունքների վերականգնումը Շուշիում, Հադրութում, մասամբ Մարտունի, Ասկերան, Մարտակերտ հատվածներում:

«Այդ ամենն իրականացնելու համար լծակներ ունի քաղաքական մեծամասնությունը»,-  ասաց ընդդիմադիր պատգամավորը:

Ըստ նրա, մեխանիզմը բանակցություններ են ԵԱՀԿ Մինսկի խմբի համանախագահության շրջանակում: