Ձեր վստահելի աղբյուրը

«Մենք պետք է, իհարկե, ապահովենք հեռուստաալիքների լիակատար անկախությունն ու ազատությունը, միաժամանակ պետությունը պետք է որոշակի արգելքներ դնի ոչ թե լուրերի թողարկումների հետ կապված, այլ մշակութային հատվածի մասով, քանի որ մշակույթը դաստիարակում է մարդուն»,- ԱԺ-ում  ՀՀ  Հեռուստատեսության և ռադիոյի հանձնաժողովի անդամի պաշտոնում «Քաղաքացիական պայմանագիր» խմբակցության կողմից առաջադրված թեկնածու Արթուր Մանուկյանի ընտրության հարցի քննարկմանն ասաց «Հայաստան» խմբակցության պատգամավոր Գեղամ Նազարյանը:

Նրա խոսքով, երբեմն մարդուն պետք է պարտադրես լսել, որ մեծանա ճիշտ մարդ:

«Մեր պետությունն այդ բացն ունի»,- ասաց Գ. Նազարյանը:

«Հայաստան» խմբակցության պատգամավորներից Գեղամ Մանուկյանը նշեց, որ Հեռուստատեսության և ռադիոյի հանձնաժողովի անդամների պարտականություններն են հետևել այն փաթեթում, որով լիցեզիա են ստացել հեռուստաընկերությունները, ռադիոընկերները, ներկայացված պարտականությունների կատարմանը, համապատասխանությանը, որպեսզի հեռուստառադիոընկերություններն իրենց եթերային քաղաքականության  մեջ ՀՀ օրենքները չխախտեն, կարմիր գծերը չանցնեն, մնացած բոլորի հետ հանձնաժողովը կապ չունի:

«Հեռուստատեսության և ռադիոյի հանձնաժողովը խմբագրական քաղաքականության իրավունք չունի: ԱԺ նիստը ինչպես է լուսաբանում հեռուստատեսությունը, հանձնաժողովն իրավունք չունի որոշել»,- հավելեց ընդդիմադիր պատգամավորը:

Նա նշեց, որ երկու օր լսում են լեզվական մշակույթի, մշակույթի քարոզչության բազմաթիվ խոսքեր, շատ ճիշտ խոսքեր:

«Բայց հանձնաժողովի անդամը գործառույթներ չունի: Հայ հասարակությանը թույրիմացության մեջ չգցեն. երկու օր այստեղից լսելուց հետո մարդը մտածի՝ վաղվանից սերիալներն, անճաշակ հաղորդումներն  արգելելու են, Հանրային հեռուստաընկերությունն առավոտից երեկո դասական երաժշտություն է հեռարձակելու կամ «Կենտրոն», «Երկիր մեդիա» ու մյուս հեռուստաընկերություններին պարտադրելու են գիտակակրթական, մշակութային հաղորդումներ հեռարձակել: Ոչ, ամեն հեռուստաընկերություն իր վրա վերցրել է պարտականություն, դրա շրջանակում գործում է»,-  ասաց Գեղամ Մանուկյանը:

Նա նշեց, որ մշակութային որակյալ հաղորդումների, կրթական ու գիտահանրամատչելի հաղորդումների պատվեր պետք է պետությունը տա, գումար հատկացնի, դա պետության խնդիրն է, սակայն երեք տարվա ընթացքում Հանրային հեռուստատեսությանը թողեցին գովազդ ցուցադրել, դարձրեցին կոմերցիոն:  Գ. Մանուկյանն ընդգծեց, որ պետք է հետևողական ու մշակված քաղաքականության վարել:

«Նայեք բյուջեի կատարողականը, Հայաստանի կառավարությունը որևէ մշակութային հաղորդման զարգացման համար բյուջե հատկացրե՞լ է, թե՞ ոչ: Մարդկանց աչքին թոզ փչելու համար 3 տարի շարունակ մեկն իր գարաժում պանրի արտադրամաս է բացում, սարքում են բիզնեսի զարգացման  խոշորագույն օրինակ: Երեք տարի շարունակ  պետական բյուջեի փողերը գնացել են ոչ թե մշակույթը զարգացնելուն,  դասական երաժշտությունը  ժողովրդի մեջ քարոզելուն, արևմտահայերեն հաղորդումների համար, այլ գնացել է լոկ կառավարության արածն ու չարածը քարոզելուն, առավոտից գիշեր կառավարության քարոզչության  համար»,-  ասաց ընդդիմադիր պատգամավորը:

Այնուհետև նա խոսքն ուղղեց լրագրողներին՝ ընդգծելով, որ Հայաստանում արդեն տևական ժամանակ լրագրողների նկատմամբ տեռոր է սկսվել, ԱԺ ամբոինից ամենավերջին բառերեն են ասում:

«Սրա դեմը չառնելու դեպքում նույն ձևի, ոնց դատարաններ էին շրջափակում,  ձեր խմբագրություններն էլ են շրջափակելու: Օրինակներն էլ կան:

Դուք տեռորի զոհ եք դառնում, տեռորի զոհ է դառնում հասարակությունը»,-   նշեց Գ. Մանուկյանը՝ ընդգծելով, որ պետք է կտրուկ գործողությունների դիմել: 

Նա ասաց, որ որպես պատգամավոր դիմելու է միջազգային կառույցներին, քանի որ սա վտանգավոր ընթացք է երկրում, նաև դիմում է քաղաքական մեծամասնությունը. «Հիշեք,  վաղը կարող է իշխանության չլինեք: Վաղը իշխանության չլինելով՝ դուք էլ կարող եք այդ պաշտպանության կարիքը  ունենաք: Հանուն բոլորի՝ մի թույլ տվեք այդ տեռորը»:

Ըստ նրա, եթե այսօր լրագրողական համայնքը չըմբոստանա դրա դեմ հանուն մեր հասարակության՝ շատ ավելի վատ է լինելու: