Ձեր վստահելի աղբյուրը

«Եթե քաղաքական մեջ եմ, իհարկե, պետք է ձգտեմ հասել բարձրագույն կետին: Բայց քաղաքականությունը միայն իշխանատենչություն չէ»,- 24.news-ի «Մերձքաղաքական զրույց» հաղորդման ժամանակ ասել է  «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար, ԱԱԾ նախկին տնօրեն Արթուր Վանեցյանը:

Նա նշել է, որ եթե քաղաքականության մեջ է, իհարկե, պետք է ձգտել հասնել բարձրագույն կետին։

«Բայց քաղաքականությունը միայն իշխանատենչություն չէ։ Հիմա, եթե ես ասեմ՝ երազում եմ դառնալ նախագահ, վարչապետ, դա կարող են մեկնաբանել որպես իշխանատենչություն, բայց եթե նաև չասեմ, որ նպատակ ունեմ հասնել իշխանության, ինձ հավատացող մարդիկ, մեր քաղաքական թիմին հավատացող մարդիկ, մեզ ձայն տված մարդիկ կասեն՝ բա, ինչի՞ համար ենք այս մարդուն հավատում, այս մարդու հետևից գնում։

Ուստի ձգտումը դեպի իշխանություն, իմ պատկերացմամբ, մի նպատակ պետք է հետապնդի․ գաս իշխանության, որ կարողանաս կատարել այն ծրագրերը, որոնք, քո կարծիքով, օգուտ են բերելու մեր երկրին և մեր ժողովրդին։ Եվ այդ նպատակով, իհարկե, այո, ես ձգտում եմ դեպի իշխանություն, որպեսզի կարողանանք մեր երկիրն այս ծայրահեղ ծանր վիճակից հանել և կարողանանք գնալ դեպի ապագա», - ասել է Արթուր Վանեցյանը։

Ընդդիմադիր քաղաքական գործիչը նշել է, որ միշտ գործել է օրենքի շրջանակներում, ամենակարևորը՝ իր խղճի առաջ միշտ մաքուր է եղել. «Ցանկացած աշխատանք անելուց, դեռևս օպեր լիազոր աշխատած ժամանակահատվածից, միշտ ինքս ինձ հաշվետվություն եմ տվել, որ այս  գործն անելով, այս մարդուն ձերբակալելով, պատասխանատվության  ենթարկելով՝ ճի՞շտ գործ եմ անում, ինքն արժանի՞ է պատժի, թե ոչ:

Անսխալ մարդ չկա: Իհարկե, սխալներ էլ ունեցել իմ աշխատանքի ժամանակ, բայց հիմնականում իմ խղճի առջև միշտ մաքուր և պարզ եմ եղել, ուստի որևէ կաշկանդավածություն չի եղել: Եթե վաղը ինձ նորից հնարավորություն տրվի աշխատելու իրավապահ համակարգում կամ իշխանության մեջ լինելու, եթե ինձ հայտնի դառնան տեղեկություններ, որ մարդիկ օրենքներ են խախտել, անպայման պատասխանատվության եմ ենթարկելու»:

Ա. Վանեցյանը նշել է, որ 8-րդ գումարման Ազգային ժողովը սովորական պայմաններում ձևավորված ԱԺ չէ, կապիտուլյացիոն  խայտառակ  պայմանագրից հետո ձևավորված առաջին ԱԺ-ն է. «Ինչքան էլ կարևոր լինեն ծառատունկի վերաբերյալ  օրենսդրական նախաձեռնությանները, մենք մի խնդիր ունենք լուծելու՝ մենք պետք է ապահովենք Հայաստանի ու Արցախի անվտանգային երկարաժամկետ երաշխիքներ, իսկ մենք տեսնում ենք, որ պարտված իշխանությունն ի վիճակի չէ  սպասարկել  հայկական շահը»:

«Պատիվ ունեմ» խմբակցության ղեկավարը պաշտոնական վիճակագրությունն է  մեջբերել՝ 2021 թ. հունվար-սեպտեմբերին 102 հազար մարդ արտագաղթել է Հայաստանից:

«Մարդիկ չունեն անվտանգության երկարաժամկետ երաշխիքներ: Ցավով եմ դա ասում: Ես Հայաստանից դուրս ինձ չեմ պատկերացնում ապրելուց: Ուզում եմ ապրել մեր երկրում: Համոզված եմ՝ շատ մարդիկ էլ չեն ուզում գնալ, սակայն տեսնում ենք, որ ադրբեջանցիներն անպատիժ գործում են ՀՀ սահմանամերձ  գյուղերում: Պաշտոնական տվյալներով, 41  քառակուսի կմ այսօր ադրբեջանական զինուժը  մտած է ՀՀ տարածք: Տեսանք, որ պատերազմից հետո, երբ Փաշինյանը խոստանում էր  խաղաղության դարաշրջան բացել, սուտ էր, բացառապես ընտրություններին ձայներ հավաքելու նպատակ էր հետապնդում: 

Պատերազմից հետո խաղաղության դարաշրջանի փոխարեն ստացանք ավելի ծանր վիճակ՝ նոր գերիներ, նոր սպանված զինվորականներ, քաղաքացիական անձինք, սպառնալիքներ, որ կմտնենք, կգրավենք, հեսա «Զանգեզուրի միջանցքը» կբացենք: Մարդիկ իրենց տներում չեն կարողանում հանգիստ քնել, որովհետև  անօդաչու թռչող սարքերը գալիս ու կախվում են մարդկանց գլխին»,- ասել է Ա. Վանեցյանը:

Նա ընդգծել է, որ իշխանությունները մշտապես փորձում են մոռացության տալ Արցախի հարցը:

«Նիկոլ Փաշինյանը ցույց տվեց, որ երեք տարի որևէ էֆեկտիվ կառավարչական գործունեություն չի իրականացրել, բոլոր ուղղություններով  ձախողումներ ունենք: Այս մարդը չի հասկանում պետություն, պետականություն, պետականաշինություն, ոչ մի բան չի հասկանում, հախուռն որոշումներ, առաջնայինը չի տարբերում երկրորդայինից»,- ասել է Ա.Վանեցյանը: