Ձեր վստահելի աղբյուրը

«Մենք ներկայումս քննարկման փուլում ենք, անպայման մեր որոշման մասին կհայտնենք»,- ԱԺ-ում ճեպազրույցի ժամանակ ասաց «Հայաստան» խմբակցության քարտուղար Արծվիկ Մինասյանը՝ պատասխանելով հարցերին Հանրապետության նախագահի թեկնածուի տարբերակի շուրջ քննարկումների, առաջադրման վերաբերյալ։

Նա նշեց, որ մի քանի չափանիշներ նկատի առնելով՝ առաջիկայում կոնկրետ կհայտնեն իրենց որոշման մասին։

Հարցին՝ երեկ Նիկոլ Փաշինյանը ներկայացրել էր իր չափանիշները,  որ նախագահը պետք է ներդաշնակ լինի իշխող ուժի հետ, նախագահը պե՞տք է այդպիսին լինի, թե՞  ապաքաղաքականացված, Ա.Մինասյանը պատասխանեց. «Առաջիկայում հստակ կներկայացնենք մեր չափանիշները։

Բնականաբար, Փաշինյանի  խոսքը վերաբերում էր իր իշխանությանը և ակնհայտ էր, որ այս խոսքի մեջ չկար այն հիմնական միտքը, նպատակադրումը, որն անհրաժեշտ է մեր այսօրվա ստեղծված վիճակից դուրս գալու մասով։ Նախագահը չի կարող միայն քաղաքական մեծամասնության սրտի նախագահը լինել։ Նախագահը պետք է ապահովի Սահմանադրությամբ ամրագրված մոտեցումների լիարժեք իրականացումը»։

Ճեպազրույցին ներկա «Հայաստան» խմբակցության պատգամավոր Աննա Գրիգորյանի գնահատմամբ, բավականին վտանգավոր հայտարարություն է, որ պետք է  բոլոր ինստիտուտների միջև՝ օրենսդիր, գործադիր, նախագահական, ներդաշնակեցում տեղի ունենա։ 

«Սա նշանակում է, եթե ավելի բաց խոսենք, Փաշինյանը որպես Հանրապետության նախագահ ուզում է  տեսնել մեկին, ով  ընդհանրապես որևէ  առարկություն չի հնչեցնի որևէ հարցի հետ  կապված, այսինքն մարդ, որ ոչ մի խոչընդոտ չի ստեղծի հերթական նոր խնդիրների համար, բացարձակ լուռ և անհաղորդ կլինի երկրում ստեղծված իրավիճակի հետ կապված»,- ասաց ընդդիմադիր պատգամավորը։