Ձեր վստահելի աղբյուրը

Շախմատի Հայաստանի նորընծա չեմպիոն Մանուել Պետրոսյանը կարիերայում առաջին անգամ դարձավ Հայաստանի առաջնության հաղթող և ընդգրկվեց Հայաստանի հավաքականի կազմում: Պետրոսյանն անկեղծանում է՝ իր այս հաջողության մեջ մեծ է գրոսմայստեր Լևոն Արոնյանի դերը: Այս մասին գրել է Armsport.am-ը և հրապարակել հարցազրույց վերջինիս հետ:

-Առաջին անգամ նվաճեցիր Հայաստանի չեմպիոնությունը: Ինչպե՞ս կամփոփես մրցաշարը:

-Մրցաշարը շատ հաջող էր ընթանում. սկզբում երեք ոչ-ոքի խաղացի ռեյտինգ-ֆավորիտների հետ, իսկ հետո հաջողվեց 5 անընդմեջ հաղթանակ տանել: Նախավերջին պարտիայում սայթաքեցի ու պարտություն կրեցի: Դրանից հետո հավաքվեցի ու կարողացա վերջին պարտիայում վստահ խաղալ, ճիշտ է՝  ոչ-ոքին էլ էր ձեռնտու արդյունք, բայց ստացվեց հաղթել ու այդպես չեմպիոն դառնալ:

-Ամբողջ առաջնության ընթացքում տպավորություն էր՝ հատուկ տրամադրվում ես պարտիաներից առաջ: Ճի՞շտ էր այդ տպավորությունը:

-Այո, պարտիաներից առաջ այդպիսի սովորություն ունեմ: Փորձում եմ ամբողջովին մտնել այդ մրցումային իրավիճակի մեջ, տրամադրվել ու հավաքել մտքերը:

-Շախմատիստները պարտիաներից հետո սովորաբար վերլուծում են իրենց խաղը մասնագետների կամ ընկերների հետ: Կա՞ր ինչ-որ մեկն, ում հետ դու այդ ամենը քննարկում էիր:

-Այո, ունեմ ընկերներ, ում հետ կարող եմ քննարկել պարտիաները, բայց հիմնականում թեթև քննարկումներ են լինում:

-Ինչի՞ շնորհիվ կարողացար ստանձնել առաջատարի դիրքն ու ի վերջո չեմպիոն հռչակվել:

-Մրցաշարից առաջ հավաքների էի մասնակցում Լևոն Արոնյանի հետ: Ծաղկաձորում 4-5 օր հավաք ունեցա նրա հետ. կարծում եմ՝ դա շատ մեծ օգուտ տվեց ինձ: Մարզավիճակ հավաքեցի առաջնությունից առաջ ու իմ խաղերի վրա դա ևս երևում էր, քանի որ կարծում եմ՝ ինչ-որ չափով որակով էի խաղում, բացառությամբ իհարկե մի քանի պարտիաների:

-Առաջնության շրջանակում քո ո՞ր պարտիան կառանձնացնես:

-Երևի՝ առաջին հաղթանակը, ինչը սկիզբ դրեց իմ հաղթանակներին: Դրանից առաջ՝ Հայկի և Սամվելի հետ պարտիաներում, շատ մոտ էի հաղթանակին, բայց չստացվեց, իսկ առաջին հաղթանակից հետո այդ պահը որսացի ու սկսեցի իրար հետևից հաղթանակներ տանել: Կարծում եմ՝ առաջին հաղթանակս ինձ վստահություն տվեց:

-Առհասարակ վերջում շատ դժվար է տրամադրվելը, բայց քո պարագայում չզգացինք՝ հոգեբանական առումով դժվարություն ունեցար: Այդպե՞ս է:

-Վերջում իսկապես ծանր էր: Նախավերջին տուրում պարտվել էի ու այդ առումով դժվար էր: Ամեն դեպքում սպիտակներով ցավալի պարտություն էի կրել. տեղին չէր նման պարտություն կրելը նախավերջին պարտիայում: Փաստորեն, եթե ոչ-ոքի խաղայի, գործնականում կապահովեի չեմպիոնությունը, իսկ այսպես արդեն պետք եկավ պատրաստվել, ամբողջովին նորից կենտրոնանալ: Հասկացա, որ մրցաշարը դեռ չի ավարտվել ու պետք է պայքարել մինչև վերջ:

-Ընդգրկվեցիր Հայաստանի հավաքականի կազմում, որն այս տարի Մոսկվայում մասնակցելու է շախմատի համաշխարհային օլիմպիադային: Ի՞նչ սպասելիքներ ունես:

-Տա Աստված՝ այս համավարակի պայմաններում Օլիմպիադան կայանա: Գիտեմ, որ ամռանն է լինելու: Կպատրաստվենք ու կփորձենք հնարավորինս լավ հանդես գալ: