Ձեր վստահելի աղբյուրը

«Որոշում ունեմ, որ այն ոլորտները, որոնք ժամանակին որպես քաղաքապետի առաջին տեղակալ համակարգել եմ, մնալու են իմ կուռացիայի տակ, հաշվի առնելով այն հանգամանքը, որ բազում փոփոխություններ է իրականացվել այդ ոլորտներում, կարծում եմ, որ այդ փոփոխություններն ինձանից լավ ոչ մեկը չի կարող իրականացնել»,- Երևանի քաղաքապետարանի գործակարգավարական  խորհրդակցության ժամանակ հայտնեց քաղաքապետ Հրաչյա Սարգսյանը:

Թվարկելով ոլորտները՝ քաղաքապետը տեղեկացրեց, որ դրանք են «Երքաղլույս» ՍՊԸ-ն, «Փարքինգ սիթի սերվիսը», «Ավտոբուս», «Երևան տրանս» ՓԲԸ-եր, «Երքաղլույս» ԾԻԳ-ը, Երևանի մետրոպոլիտենը, նոր աղբավայրի կառուցումը, «Երևանի էլեկտրատրանսպորտ» ՓԲԸ-ն և Երևանի գերատեսչական շենքերի պահպանությունը:

Հրաչյա Սարգսյանը նաև տեղեկացրեց, որ քաղաքապետարանի Մարդկային ռեսուրսների կառավարման վաչությունը նույնպես իր ենթակայության տակ է լինելու:

Նա հիշեց, որ 2019 թվականին «Փարքինգ սիթի սերվիս»-ում իրականացված գույքագրման արդյունքում որոշ անհամապատասխանություններ էին բացահայտվել, որի արդյունքում Երևան համայնքի բյուջե է վերականգնվել շուրջ 800 մլն դրամ և շնորհակալություն հայտնեց քաղաքապետարանի և մյուս գերատեսչությունների աշխատակիցներին այդ գործընթացում ներգարվված լինելու համար:

Գործակարգավարական խորհրդակցության ժամանակ քաղաքապետն անդրադարձավ նաև Քանաքեռ-Զեյթուն վարչական շրջանում սահմանափակ գրաֆիկով ջրամատակարարման խնդրին:

«Վեոլա ջուր» ընկերության ներկայացուցիչը հայտնեց, որ աշխատանքներ են տարվում ավելի երկար ժամանակով ջրամատակարարման ռեժիմ ապահովելու համար, բայց չկարողացավ ասել, թե կկարողանան 2022 թ-ին ապահովել շուրջօրյա ջրամատակարարում:

Խորհրդակցության ժամանակ քաղաքապետին զեկուցվեց, որ նախորդ շաբաթ Երևանում ծնված երեխաների թիվը 326 է եղել՝ 174 տղա և 182 աղջիկ: Տեղեկացվեց նաև, որ Երևանում 740,990 քաղաքացի պատվաստվել է կորոնավիրուսի դեմ, որից առաջին բաղադրիչով՝ 410.301, իսկ երկրորդով՝ 334.147 (39.8%) և բուստեր պատվաստում է ստացել 4.342 քաղաքացի: