Ձեր վստահելի աղբյուրը

«Նիկոլ Փաշինյանը թքած ունի հանրային բոլոր արձագանքների վրա, խնդիրն այն է, որ «Քաղաքացիական պայմանագիր» կուսակցության հիմնական թևերը կատեգորիկ դեմ են եղել Արայիկ Հարությունյանի թեկնածությանը»,-հրավիրված ասուլիսում հայտնեց ԱԺ նախկին պատգամավոր Նաիրա Զոհրաբյանը՝ անդրադառնալով մամուլում շրջանառվող լուրերին, թե նախագահի պաշտոնում Արայիկ Հարությունյանի թեկնածության դեմ հասարակության բուռն արձագանքի պատճառով է փոխվել նրա թեկնածությունը:

Նախկին պատգամավորը գտնում է, որ Վահագն Խաչատրյանի թեկնածության վրա են կանգնել քանի որ նա դեռ քաղաքապետ եղած ժամանակ շատ մտերիմ է եղել Խաչատուր Սուքիասյանի հետ և վերջինիս լոբբինգով է առաջարկվել նրա թեկնածությունը:

«Մեկ բրենդային կոշիկի գնով Խաչատուր Սուքիասյանին է սեփականաշնորհվել Աբովյան փողոցի և քաղաքի կենտրոնի բազմաթիվ շինություններ»,-քաղաքապետի պաշտոնում Վահագն Խաչատրյանի գործունեությանն անդրադարձավ Զոհրաբյանը:

Նա հիշեց, որ Վահագն Խաչատրյանն այն քիչ մարդկանցից էր, որ ամենօրյա մուտք ունեն «Հայկական ժամանակ» թերթի խմբագրություն:

«Վահագն Խաչատրյանի, X-ի կամ Y-ի փոխարեն, եթե նախագահի պաշտոնում Նիկոլ Փաշինյանը առաջարկեր իր կոշիկի քուղը, ատամի չոտկը, բաղնիքի իր տապչկան, միևնույնն է խորհրդարանական մեծամասնությունը, չեմ բացառում նաև 1-2 հոգի ընդդիմությունից, միանշանակ փակ գաղտնի քվեարկության ժամանակ  կողմ էին քվեարկելու այդ թեկնածուին»,- ասաց բանախոսը:

Ըստ Նաիրա Զոհրաբյանի՝ նախագահի հրաժարականի քայլով Նիկոլ Փաշինյանը ցեմենտ-բետոնում է իր իշխանությունը, Հայաստանում իր դիկտատուրան, որին անհասկանալի ձևով ԵԽԽՎ-ն տվեց տարածաշրջանի ամենաժողովրդավարական երկրի բնորոշումը:

«Նախագահի հրաժարականով Հայաստանում սահմանվեց սուլթանաֆեոդալական ճորտատիրական կարգեր»,-ասաց ԱԺ նախկին պատգամավորը և համոզմունք հայտնեց, որ քանի դեռ Փաշինյանին չկա իրական այլընտրանք՝  նրա իշխանությունը երկար է շարունակվելու: