Ձեր վստահելի աղբյուրը

«Սերժ Սարգսյանի կողմից հնչեցին մի շարք կարևոր և տվյալ ժամանակահատվածի համար առանցքային հայտարարություններ»,-ասուլիսում ասաց Հայաստանի պաշտպանության նախկին փոխնախարար, ՀՀԿ ԳՄ անդամ Արտակ Զաքարյանը՝ խոսելով ՀՀ երրորդ նախագահ Սերժ Սարգայանի երեկվա հարցազրույցի մասին։

Նրա խոսքով, երրորդ նախագահը բացելով մի շարք փակագծեր, մեկնաբանելով  մի շարք խնդիրներ արցախային բանակցային կարգավորման տարբեր փուլերից՝ ներկայացրեց բոլոր այն ուղղությունները, որոնք կարող էին օգնել այս իշխանություններին չմտնել այն վտանգավոր ճանապարհների մեջ, որոնցով անցան, չտանեին պատերազմի, ունենալ և շարունակել պահպանել բանակացային այն ամուր, կայուն դիրքերը, որոնք  իրենց  թողել էին, հասկանալի մնալ միջազգային հանրության համար և դրա արդյունքում կարողանալ պաշտպանել  Հայաստանի և Արցախի իրավական շահերը։

Արտակ Զաքարյանն ասաց, որ այս իշխանությունները վերջին երեք տարիներին ամեն կերպ փորձել են միտումնավոր և ոչ այնքան միտումնավոր ձախողումները փաթաթել նախկին իշխանությունների վրա, նրանց  մեղավորներ նշանակել։

«Այս բոլոր զառանցանքները, այս կարգի անհեթեթությունները ցույց են տալիս, որ այս երեք տարին չբավարարեց սրանց գոնե նվազագույն փորձառություն, կառավարման հմտություններ ձեռք բերել, գոնե հասկանային աշխարհաքաղաքական և տարածաշրջանային զարգացումներն ու իրավիճակը, գոնե կարողանալ մի փոքր արժանապատվություն ունենալ ու դուրս գալ այս վիճակից, գոնե գիտակցեն, որ այս ծանր դժվարին կործանված, կործանարար ժամանակահատվածի համար միակ և անփոխարինելի պատասխանատուները հենց իրենք են, որ կան»,- ասաց քաղաքական գործիչը։ 

Ա.Զաքարյանն ընդգծեց, որ որևէ մեկին չթվա՝ ղարաբաղյան հիմնախնդիրը կարգավորվել է, պատերազմը վերջակետ է դրել բոլոր տեսակի հավանություններին, որոնք ունի հայ ժողովուրդը. «Իսկ հայ ժողովուրդն ունի  անկախ պետություն ունենալու, այս տարածաշրջանում կայուն, անվտանգ, ապահով և զարգացող երկիր ունենալու հավակնություն և հայ ժողովուրդը շարունակելու է իր ինքնիշխանության, տարածքային ամբողջականության, միջազգային բոլոր իրավունքների համար պայքարը»։

Անդրադառնալով ՀՀ իշխանության՝ զորքերի հայելային հետքաշման մասին հայտարարություններին, նա նշեց. «Եթե կառավարության անդամները հասկանային՝ ինչ է տարածքային ամբողջականությունը, պետական սահմանը, սահմանային բնավակայրը, նման հիմար գաղափարներ առաջ չէին քաշի»։

Նրա խոսքով, լղոզված հայտարարություն է. «Այսինքն 1 կմ իրենք են հետ գնում, 1 կմ մենք, առաջանում է   բուֆերային գոտի։ Բա հետո՞։ Այդ 1 կամ 5 կիլոմետրը, որ հետ են գնում... Ադրբեջանցիներն  արդեն մխրճված են մեր տարածք, արդեն օկուպացրել են քո տարածքները ռազմական ագրեսիայի միջոցով։ Այսինքն այդ ամեն ինչը մոռացել ենք, հիմա հայելային հետքաշում, դեմարկացիա, դելիմիտացիա են անո՞ւմ»։

Ըստ Ա. Զաքարյանի, այնքան բարդ պրոցես է, որ  նույնիսկ դրա սկզբունքները չեն կարողանում գտնել այդ գաղափարն առաջ քաշողները։

«Ասել է ու ձեռքը կրալն ընկել։ Իրենք էլ չեն հասկանում՝ ինչ է  նշանակում հայելային հետքաշում, որտե՞ղ, ինչի՞ համար։ Հայելային հետքաշման դեպքում կարող է այնպիսի կարևոր ռազմավարական ռեսուրսներ կորցնես, որ քո բնակչության մի հատվածը զրկվի ջրից, մյուսը՝ ճանապարհից, կենսական, բնապահպանական ռեսուրսներից, կյանքի, տեղաշարժի, անվտանգության տարրական իրավունքներից»,- ասաց ՀՀԿ-ական գործիչը։

Նրա գնահատմամբ, իշխանությունները չեն հասկանում, թե ինչ են խոսում, դրա համար Ադրբեջանը սրանց ոչ մի առաջարկի լուրջ չի վերաբերում։