Ձեր վստահելի աղբյուրը

Պլաստիկ վիրաբուժությունն այնքան կտրուկ մտավ մեր կյանք, առօրյա, կենցաղ, դարձավ շատ սովորական մի բան, որ հիմա տարրական բաներ չիմանալու և հարցեր տալու համար անգամ նախատում են՝ «Ինչ անկիրթ եք, դա բոտուլինոթերապիա է , ոչ թե  բոտոքս, սա ֆիլեր չէ, սա  բլեֆարոպլաստիկա չէ, սա  հիալուրոնային թթու է...»։ Ի՞նչ են սրանք, ո՞ւմ են պետք, ո՞ւմ են վնաս, ինչպե՞ս գեղեցկանանք և պահպանանենք այն, ինչո՞ւ են այս պրոցեդուրաներն այդքան թանկ,արդյո՞ք, այդ նյութերը վնասակար չե՞ն առողջությանը։ Շուրթերը չե՞ն կորցնում զգայունակությունը։ Համբույրները նույն հա՞մն են ունենում լցրած և չլցրած շուրթերով. այս և նմանատիպ այլ անհարմար հարցեր ուղղել ենք պլաստիկ վիրաբույժ Թորգոմ Խաչատրյանին։

-Ի՞նչ խնդիրներով են Ձեզ ամենաշատը դիմում, արդյո՞ք տղամարդիկ նույնպես օգտվում են պլաստիկ միջամտությունների ծառայություններից, եթե այո, որ պրոցեդուրան է գերակշռում։

-Հայաստանում ամենատարածված խնդիրը, ինչի կապակցությամբ դիմում են՝ ռինոպլաստիկան է (քթի պլաստիկ վիրահատությունը): Վերջին շրջանում ավելացել է նաև տղամարդկանց դիմելիությունը այս խնդրով: Հաճախ դիմում են նաև կոպերի վիրահատության, որովայնի առաջային պատի դեֆերմացիաների հետ կապված (հատկապես ծննդաբերությունից հետո, քաշի կտրուկ կորստի դեպքում), ականջների ձևփոփոխության համար, մազերի փոխպատվաստման համար, շուրթերի մեծացման և բոտուլինոթերապիայի համար: Այս ցուցակը իրականում շատ-շատ կարելի է շարունակել: Քանի որ սա նոր և մշտապես զարգացող ուղղություններից բժշկության մեջ:

-Ճի՞շտ է, որ բոտոքսը հանգեցնում է մաշկի վաղաժամ  ծերացման, եթե, այո, ապա այլընտրանք կա՞ ոչ տարիքային կնճիռների դեմ պայքարի։

-Բոտուլինոթերապիան չի կարող հանգեցնել մաշկի վաղաժամ ծերացման, պարզապես պետք է հասկանալ ճիշտ ժամանակը այն սկսելու, իսկ դա իդիվիդուալ է յուրաքանչյուրի համար:

-Շրթունքների ծավալի մեծացում. ովքե՞ր են դիմում հիմնականում, նկատի ունեմ ՝ ինչ տարիքի, սեռի, սոցիալական ստատուսի։ Ցավո՞տ է։

-Դիմում են տարբերի տարիքի աղջիկներ և կանայք, և յուրաքանչյուրի դեպքում ակնկալվող արդյունքը տարբեր է: Դա հիմնականում կախված է բուժառուի ցանկությունից և պատկերացումներից, ինչպես նաև մեծ դեր է խաղում նախնական շուրթերի ձևը: Բայց ցանկացած դեպքում ես անձամբ փորձում եմ ստանալ տվայլ մարդու դեմքին համահունչ շուրթեր: Այսինքն՝ շուրթեր, որոնք «առանձին իրենց կյանքով» չեն ապրի տվյալ մարդու դեմքին։

-Ճի՞շտ է, որ մարդիկ այնքան են հավանում այս պրոցեդուրայի արդյունքը, որ կախվածության մեջ են ընկնում և անդադար ձգտում են մեծացնել ծավալը։ Եղե՞լ  է, որ խորհուրդ տաք՝ կանգ առնել։
-Իհարկե, պլաստիկ և էսթետիկ բժշկությունը շատ գրավիչ է: Բայց այո շատ հաճախ ստիպված եմ լինում խորհուրդ տալ կանգ առնել, քանի որ ամեն ինչ գեղեցիկ է չափի մեջ, իսկ այդ սահմանը շատ նուրբ է:

- Ո՞ր տարիքից սկսած է կարելի անել պլաստիկ վիրահատություններ, եթե չկա հատուկ բժշկի ցուցում։
-Ամեն վիրահատությունն ունի իր տարիքային և առհասարակ բժշկական ցուցումները, դա տարբեր է ամեն վիրահատության համար:

-Ի՞նչ նյութերով եք աշխատում։Արդյո՞ք, այդ նյութը վասակար չէ առողջությանը։ Շուրթերը չե՞ն կորցնում զգայունակությունը։ Համբույրները նույն հա՞մն են ունենում լցրած և չլցրած շուրթերով։ Որքա՞ն ժամանակ է պետք անցնի ներարկումից հետո, որ էֆեկտը տեսանելի լինի։
-Ես աշխատում եմ միայն լիցենզավորված նյութերով: Հիալուրոնաթթուն, որ ֆիլերի հիմնական բաղադրիչն է, առկա է մեր օրգանիզմում, և հիմնականում խնդիրներ չի առաջացնում: Շուրթերը ծավալի մեծացումից հետո, իհակե իրենց զգայունությունը չեն կորցնում: Համբույրներն էլ ավելի համեղ են դառնում։ Արդյունքը երևում է անմիջապես միջամտությունից հետո, իհարկե, այտուցված է լինում, վերջնական արդյունքը տեսանելի է մի քանի օրից:

-Ըստ Ձեզ, ինչո՞ւ ոչ մեկ չի ցանկանում  ծերանալ։ Արդյոք, այս կոսմետոլոգիական միջամտությունների հասանելիությո՞ւնն է պատճառը, որ մարդիկ փորձում են հետաձգել ծերությունը։ Որո՞նք են ամենատարածված ու արդյունավետ պրոցեդուրաները ծերության, կնճիռների դեմ պայքարում։
-Ծերանալ ոչ ոք չի ցանկանում, այդ իսկ պատճառով շատ շատ հեքիաթներում, առասպելներում խոսվում է «երիտասարդության էլիքսիրի» մասին, և իմ մասնագիտության ընտրության հարցում էլ այս փաստը մեծ դեր է խաղացել: Ինչ վերաբերում կոսմետոլոգիական ծառայությունների հասանելությանը, ապա երիտասարդ մնալ մարդիկ միշտ են ցանկացել, և ավելի շուտ այդ ցանկությունն է ,որ նպաստել է այս ոլորտի զարգացմանը և ավելի հասանելի դառնալուն:

-Բոտո՞քս, թե՞  հիալուրոնային թթու։
-Սրանք 2 տարբեր միջամտություններ են, որոնք մեր հասարակությունը շատ հաճախ է շփոթում կամ նույնականացնում: Բոտուլինոթերապիան դինամիկ (միմիկայով պայմանավորված) կնճիռների դեմ պայքարի միջոց է, հիալուրոնաթթուն ծավալ ապահովող միջոց է: Յուրաքանչյուրը ունի իր կիրառման հստակ ցուցումները:

-Հնարավո՞ր է, առանց վիրահատության փոխել դիմագծերը, քիթը, դունչը, կզակը և այլն. Խոսքս ներարկումնեով կամ այլ միջոցներով դիմագծերի շտկումի մասին է։ Որն է այդ պրոցեդուրան, որքան է պահպանվում էֆեկտը։
-Իհարկե , հնարավոր է: Ամենինչ կախված է թե ինչ փոփոխություն է անհրաժեշտ , ըստ դրա ընտրվում է միջոցը, որոնք շատ շատ են։

-Ճի՞շտ է, որ այս պրոցեդուրաները շատ թանկ են։ Ինչպե՞ս է էթիկապես ճիշտ  ասել   բժշկին, որ  պրոցեդուրան թանկ է և առաջարկի ավելի հասանելի տարբերակներ։
-Պրոցեդուրայի արժեքը պայմանավորված է և մասնագետի որակավորումից և նյութերի որակից: Իհարկե, որակյալ ծառայությունները մատչելի չեն: Պացիենտը ազատ է իր ընտրության հարցում:

-Ի՞նչ եք կարծում Ինստագրամի  ֆիլտրնե՞րն են  նպաստում, որ կոսմետոլոգիական միջամտությունները ակտուալ  մնան, թե՞ հակառակը։Եղե՞լ  է, որ մեկը գա ու ասի՝ «ուզում եմ  այս ֆիլտրի պես դեմք»։
-Իհարկե, ֆիլտրերը իրենց դերը խաղում են։ Սոցիալական կայքերի ակտիվացման հետի ավելացել են նաև ֆիլտրերի նկարներով դիմող պացիենտները։

-Ի՞նչ է «Ֆոքսի այը», ո՞ր տարիքում կարելի է անել ու ինչ միջոցներ կան ստանալու այդ էֆեկտը։ 
-Ես նման միջամտություններով չեմ զբաղվում։

-Կա՞ն կոլագենի դեղահաբեր ու կապսուլաներ, կա՞ իմաստ խմել  դրանք, թե այդ ամենը սուտ ու մարքեթինգային հնարք է։ Կամ չիայի սերմերով հեղուկները կնպաստե՞ն երիտասարդության պահպանմանը։
-Ծանոթ չեմ և չեմ աշխատում նման պրեպարատներով։

-Հիալուրոնային թթով դիմակները կօգնե՞ն, կամ հենց այդպես այդ քսուկը դեմքին քսելը կօգնի՞, թե անպայման պետք է ներարկել։
-Այս հարցերով զբաղվում են մաշկաբան կոսմետոլոգները:

-ԿԿ մայրերը կրծքով կերակրման ավարտից որքան ժամանակ հետո կարող են դիմել կրծքերի վիրահատման:

-Կերակրելը ավարտելուց գոնե 6 ամիս անց:

-Պրոցեդուրաներից հետո կապի մե՞ջ եք լինում հաճախորդների հետ, հետևում եք ընթացքին, եղե՞լ են դեպքեր, որ հակառակ էֆեկտն է տվել ներարկումը կամ այլ միջամտություն։ Նման դեպքերում ո՞ւմ է ճիշտ դիմելը, ինչ մասնագետի։
-Իհարկե, մենք միշտ կապի մեջ ենք լինում մեր պացիենտների հետ: Հետևում ենք հետվիրահատական շրջանին, և անում ամենինչ որպեսզի կանխվեն հնարավոր հետվիրահատական բարդությունները: