Ձեր վստահելի աղբյուրը

Փաստաբան Միհրան Պողոսյանը, դատավոր Բորիս Բախշիյանի կալանավորման միջնորդությունը քննող դատարանի առջև տեղի ունեցող աջակցության ակցիային, եկել էր թմբուկով և պարբերաբար թմբկահարում էր։

Փաստաբանն իր այդ քայլն այսպես մեկնաբանեց․ 

«Մենք գտնվում ենք մի իրավիճակում, որտեղ մարդիկ իրենց բնական մասնագիտությունը, հոգու ճիչը թողած,  զբաղված են ՀՀ-ում իբրև արդարադատություն իրականացնելով, իբրև քրեական գործերով հսկողություն իրականացնելով։ Ես այս թմբուկը բերել եմ մարդկանց հիշեցնելու իրենց բնատուր մասնագիտացումը։ Վերջապես հանգիստ թողնեն իրվապահ համակարգը և զբաղվեն այն գործով, ինչն իրենց հոգեհարազատ է։ Եվ համոզված եմ՝ ողջ կյանքում հաջողված կլինեն այդ մասնագիտության մեջ»։

Փաստաբանը հիշեցրեց, որ տարբեր ակցիաների ընթացքում ականատես ենք եղել թմբուկի հարվածներին և օրկեստրային այլ գործիքների կիրառմանը։ Նրա պնդմամբ՝ նմանօրինակ դատավորները պետք է հանգիստ թողնեն իրավապահ համակարգը։

«Պետք է զբաղվել նրանով, ինչից հաճույք են ստանում, այլ ոչ թե դատավորի մուրճը հարվածելով «թմբուկներին»՝ մարդկանց ճակատագրերի, միևնույն ժամանակ ՀՀ-ի՝ որպես իրավական պետության ճակատագրի հետ խաղալ։ Այս մարդիկ իրավունք չունեն արդարադատության անունից խոսելու, ուր մնաց մարդկանց անունից՝ արդարադատություն իրականցնելու։

Դատավոր դառնալու համար անձը պետք է որոշակի չափանիշների համապատասխանի, այդ թվում ՝ քաղաքական զսպվածություն ցուցաբերի։ Այն մարդը, որը դատավորի հաստիքում հայտնվել է այն պատճառով, որ մասնակցել է քաղաքական ակցիաներին և դրանց ընթացքում թմբուկին հրահանգով շատ լավ հարվածել է, իրավունք չունի արդարադատություն իրականացնելու»,- ասաց Միհրան Պողոսյանը։