«Ընդդիմությունը չի գեներացնում իշխանությունների նկատմամբ հասարակության ունեցած մեծ բացասական տրամադրությունները»
«Այսօր դատարանը կայացրել է համայնքի ղեկավարին կալանավորելու որոշում, որպեսզի դատավորին չկալանավորեն»,- «Հայելի» մամուլի ակումբում հայտարարեց ՍԴ աշխատակազմի նախկին ղեկավար Էդգար Ղազարյանն՝ անդրադառնալով դատարանի կողմից Քաջարանի քաղաքապետ Մանվել Փարամազյանին կրկին կալանավորելու որոշմանը:
Նա հիշեցրեց, որ ոչ պատահականորեն այդ վճռի կայացման պահին ընթանում էր մեկ այլ դատավարություն, որով ազատությունից զրկում էին Աշոտ Մինասյանին կալանքից ազատելու որոշում կայացրած դատավոր Բորիս Բախշիյանին:
Էդգար Ղազարյանը հետաքրքիր համարեց, որ ոչ թե բողոքարկել են դատավոր Բախշիյանի որոշումը, այլ դատախազի միջնորդությամբ անմիջապես կալանավորել են նրան:
«Այս ամենը մեթոդական ուղեցույց է մյուս բոլոր դատավորների համար»,-ասաց բանախոսը:
Նա զարմանք հայտնեց, որ ոչ միայն դատավորների, իրավաբանների հանրությունը բողոքի ձայն չի բարձրացնում այս ամենի հանդեպ, այլ նաև խորհրդարանական ընդդիմությունը:
«Դատավորների առաքելությունն արդարադատության իրականացումն է, հանգամանքներն այնպես են դասավորվել մեր երկրում, որ նրանք արդարադատություն չեն իրականացնում, հետևաբար հարց է առաջանում, թե ինչու են իրենք այդ ֆորմալ կողմն ապահովում»,- մտահոգություն հայտնեց Ղազարյանը:
ՍԴ աշխատակազմի նախկին ղեկավարի ներկայացմամբ՝ իրեն ֆեյսբուքում մի երիտասարդ ամենախայտառակ հայհոյանքներով հաղորդագրություն է ուղարկել, նրա էջից պարզել է, որ Նիկոլ Փաշինյանի մոլի կողմնակիցն է և պատրաստվում է գնալ ոստիկանություն, պարզելու, թե նրա նկատմամբ քրեական գործ հարուցվելու է, թե ոչ:
Նկատելով, որ իշխանության անօրինականությունները բազմաթիվ են՝ բանախոսը տարակուսեց, որ դրա դեմ պայքար չի տարվում:
«Այս դիմադրությունը ե՞րբ պետք է ստեղծվի, ոչ հանրային աջակցություն է ցուցաբերվում, ոչ էլ ընդդիմադիր թևն է ակտիվ ջանքեր գործադրում»,- տարակուսեց Էդգար Ղազարյանը և, շեշտելով, որ բանտում գտնվողներն ընդդիմության օգտին աշխատելու համար են կալանավորված, ասաց. «Երկրորդ դասարանի երեխան էլ գիտի, որ Առուշ Առուշանյանը ձերբակալվել է նրա համար, որ Նիկոլ Փաշինյանին թույլ չի տվել Սիսիանից գնալ Գորիս»:
Նրա խոսքով՝ նույնիսկ բանտից իշխանությանը հաղթած համայնքապետը դեռ բանտում է և նրանով չեն հետաքրքրվում:
Ղազարյանը բնական չհամարեց, որ այս իրավիճակում ընդդիմադիր պատգամավորները հանգիստ գնում են ԱԺ հանձնաժողովների նիստերին:
Նա գտնում է, որ հասարակության մոտ կա շատ մեծ բացասական տրամադրություններ իշխանությունների նկատմամբ, որ ընդդիմությունը չի կարողանում գեներացնել:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
