Ձեր վստահելի աղբյուրը

«Հայհոյանքը պետք է արգելված լինի Հայաստանում»,- ԱԺ-ում լրագրողների հետ զրույցում ասաց ԱԺ Պետաիրավական հարցերի մշտական հանձնաժողովի նախագահ, ՔՊ-ական պատգամավոր Վլադիմիր Վարդանյանը՝ անդրադառնալով «Freedom House»-ի հայտարարությանը։

Նրա խոսքով, հայհոյանքը որպես բարոյական նորմ արգելված է եղել Հայաստանում, արգելված կա և հույս ունի՝ արգելված կմնա. «Հայհոյանքը որպես կատեգորիա ընդհանրապես դուրս պետք է մնա հանրային դիսկուրսից»։

ՔՊ-ական պատգամավորի խոսքով, հայհոյանքը սոցիալական ցանցերի ազդեցության պարագայում վերածվել է մի դաշտի, որը կարող է բերել շատ ավելի կրիմինոգեն երևույթների։

Նա նշեց, որ հայհոյանքը ոչ թե խոսքի ազատության դրսևորում է, այլ հայհոյանքը խոսքի ազատության սահմանափակման այն իրավաչափ դեպքերից է, երբ նույնիսկ ՄԻԵԴ-ը հայհոյանք տված մարդուն պաշտպանություն չի տրամադրելու:

«Ես չեմ խոսում վիրավորանքի այլ դրսևորումներից, ես խոսում եմ հայհոյանքի մասին, գիտեք, որ օրենքի ընդունման նպատակը նախ և առաջ այդ իրավիճակը  շտկելն է»,-ասաց Վ.Վարդանյանը։

Նա ընդգծեց, որ խոսքի ազատությունն այն կարևորագույն արժեքներից է, որ պետք է պաշտպանվի, երկրորդ՝ պետք է հասկանալ, որ խոսքի ազատությունն ունի սահմանափակումներ, հայհոյանքը խոսքի ազատության դրսևորում չէ, դիտարկվում է որպես խոսքի ազատության անթույլատրելի կիրառություն։

Հիշեցնենք, որ Freedom House իրավապաշտպան կազմակերպությունը մտահոգություն է հայտնել ՀՀ քաղաքացու քրեական դատապարտման առաջին դեպքի առնչությամբ՝ պայմանավորված պետական պաշտոնյաների հանդեպ «ծանր վիրավորանքի» քրեականացման մասին նոր օրենքով, կոչ արել  խորհրդարանին չեղարկել այս օրենքը։