Ձեր վստահելի աղբյուրը

«Փաստորեն միակ նախկինը չեմ այստեղ, տիկին Բաթոյանն էլ է այստեղ»,- Աշխատանքի և սոցիալական հարցերի մշտական հանձնաժողովում նախկին նախարար Զարուհի Բաթոյանին դիմեց «Հայաստան» խմբակցության անդամ, նախկին սոցապ նախարար Աղվան Վարդանյանը՝ ներկայացնելով «Նվազագույն ամսական աշխատավարձի մասին» օրենքում փոփոխություն կատարելու մասին նախագիծը:

Հիշեցնելով, որ 2019 թվականին Կառավարությունը 55 հազար դրամ նվազագույն աշխատավարձը բարձրացրել է 68 հազար դրամ՝ ընդդիմադիր պատգամավորը տեղեկացրեց, որ իր հեղինակած նախագծով էլ առաջարկում է 68 հազար դրամը բարձրացնել և ֆիքսել 100 հազար դրամ:

Աղվան Վարդանյանը տեղեկացրեց, որ սպառողական զամբյուղի արժեքը 2021 թվականի համար 73 400 դրամ և այսօր աղքատության հաղթահարման և աշխատավարձի բարձրացման խնդիր կա, այդ պատճառով էլ իր նախաձեռնությունը տեղին է:

Նկատելով, որ մինչև 2026 թվականի կառավարության ծրագրով նախատեսված է նվազագույն  աշխաավարձը 85 հազար դրամի հասցնել՝ օրենքի հեղինակն ասաց, որ գնաճը և գազի, էլեկտրաէներգիայի, ջրի սակագների թանկացումը խելամիտ են դարձնում իր առաջարկությունը:

«Եթե նկատի ունենանք, որ 2021 թվականի դեկտեմբերին միջին աշխատավարձը կազմել է 255 հազար դրամ, ապա դրա նվազագույնը 40 %-ը կկազմի 102 հազար դրամ»,-հիշեցնելով, որ ՀՀ-ն վավերացրել է Սոցիալական խարտիան. որով աշխատավարձի նվազագույն շեմը միջին աշխատավարձի 40%-ն է իսկ առավելագույնը միջին և նվազագույն աշխատավարձերիի հարաբերակցության 60%-ը՝ ասաց Աղվան Վարդանյանը:

Ընդդիմադիր պատգամավորը հանձնաժողովի նիստում կարդաց կառավարության միջնորդությունը, որով 2019 թվականին գործադիրը բարձրացվել էր նվազագույն աշխատավարձը և շեշտեց, որ այդ հիմնավորումը միանգամից փարատում է արդեն իր հեղինակած նախագծի վերաբերյալ նույն կառավարության տված արդեն բացասական եզրակացության մեջ արտահայտած մտահոգությունները:

«Հայաստան» խմբակցության մյուս պատգամավորը՝ Թադևոս Ավետիսյանը հիշեց, որ 2004 թվականին 60 %-ով էր նվազագույն աշխատավարձ բարձրացվեց, որը ամենբարձրն է եղել նորանկախ Հայաստանի պատմության մեջ:

«2003 թվականին նվազագույն աշխատավարրձը 5 հազար դրամ էր, միջին կենսաթոշակը՝ 6 հազար դրամ, այդ տարիներին 10-15 հազար աշխատավարձեր էինք ստանում, դուք ասացիք 60 %, բայց ես հիշում եմ, որ 2004 թվականի այդ 5 հազար նավազագույնը միանգամից դարձավ 13հազար, այսինքը՝ 160 %-ով բարձրացավ նվազագույն աշխատավարձը: 6 հազար դրամ միջին կենսաթոշակը 4-5 տարիների ընթացքում դարձավ 30 հազար»,-պատասխանեց Աղվան Վարդանյանը:

Աշխատանքի և սոցիալական հարցերի նախարարի տեղակալ Ռուբեն Սարգսյանն ասաց, որ մինչև 2020 թվականի համաճարակը և պատերազմը տնտեսական ակտիվությունը այլ էր, դրա համար էլ բարձրացրել են նվազագույն աշխատավարձը, իսկ հիմա այլ է ու այդ պատճառով գործադիրը բացասական եզրակացություն է տվել:

Նա նաև հայտնեց որ արդեն միջնաժամկետ ծախսերը հաշվարկված են և Վարդանյանի նախագիծն ուշացված է, ինչպես նաև նախագծում բացակայում է մակրոտնտեսական գնահատականները:

Փոխնախարարը նաև պնդեց, որ  նախագծի ընդունումը կբերի գործազրկության աճի:

Թադևոս Ավետիսյանը հայտնեց, որ բյուջեի ընդունման ժամանակ ինքը կառավարություն էր ուղարկել նվազագույն աշխատավարձը 80 հազար դրամ դարձնելու առաջարկը և կառավարությունը կրկին մերժել էր, իսկ մակրոտնտեսական ազդեցության բանաձևը մշակված է, որի մեջ թվերը տեղադրելով արդյունքը ստացվում է:

Աղվան Վարդանյանը նկատեց, որ հանձնաժողովի ՔՊ-ական պատգամավորները հիմնականում լուռ են, բայց համաձայն են փոփոխության էության հետ:

«Այս քաղաքական ուժն իշխանության է եկել մարդկանց բարեկեցությունը բարելավելու խոստումներով ու ցանկությամբ, բայց խոսքի և գործի տարբերություն կա»,-նկատեց Վարդանյանը և ասաց, որ համաձայն է հետ վերցնել նախագիծը 100 հազար դրամի շեմն իջեցնել 80 հազարի և ուժի մեջ մտնելու ժամկետն էլ տեղափոխել 2023 թվական և այդ փոփոխությամբ նորից բերի հանձնաժաղով, եթե պատգամավորները խոստանան, որ կողմ կքվեարկեն::

Հանձնաժողովի ՔՊ-ական պատգամավոր Լենա Նազարյանը հարցրեց, թե ի՞նչ վստահություն ունենան, որ հենց նախատեսված փոփոխություններով կբերվի նախագիծը:

«Կանայք սովորաբար տղամարդկանց խոսքին պետք է վստահեն, ես չգիտեմ թե ում խոսքին եք վստահում, բայց վստահեք»,-արձագանքեց Վարդանյանը:

Հանձնաժողովի նախագահ Հերիքնազ Տիգրանյանը հայտնեց, որ «ԱԺ կանոնակարգ» օրենքով, եթե չկա գրավոր առաջարկ, ապա քվեարկության է դրվում առկա օրենքի նախագիծն առանց փոփոխությունների:

Աղվան Վարդանյանը համաձայնեց առաջարկին՝ խոստանալով երկու շաբաթից բերել լրամշակված  նախագիծ, իսկ հանձնաժողովի ՔՊ-ական պատգամավորները դեմ քվեարկեցին նախագծին: