Ձեր վստահելի աղբյուրը

«Թերևս շատ խորհրդանշական է, որ այս նախագիծը ես եմ ներկայացնում, ով մեքենա վարել չգիտի և երբևէ չի վարել»,-խորհրդարանում հայտնեց «Հայաստան» խմբակցության պատգամավոր Գեղամ Մանուկյանը՝ ներկայացնելով Վարչական իրավախախտումների վերաբերյալ փոփոխություններ կատարելու մասին նախագիծը և շեշտելով, որ նախագիծը ներկայացնում է Արամ Վարդևանյանի փոխարեն, ով հիվանդացել է:

Նրա ներկայացմամբ՝ նախագծով առաջարկվում է ուժը կորցրած ճանաչել այն դրույթները, որոնցով տուգանային միավորներից զրկվելուց հետո վարորդները զրկվում են նաև տրանսպորտային միջոց վարելու իրավունքից: 

Գեղամ Մանուկյանը նշեց, որ նախագծով չի վիճարկվում բալային համակարգի արդյունավետությունը, տուգանքների բարձր կամ ցածր լինելն, այլ վիճարկման հիմնական պատճառն ՀՀ Սահմանադրության պահանջն է խախտվում:

«Սահմանադրության 68-րդ հոդվածի առաջին մասի համաձայն՝ ոչ ոք չի կարող կրկին դատվել նույն արարքի համար»,-հայտնեց ընդդիմադիր պատգամավորը:

Նա նկատեց, որ ըստ օրենքի՝ նույն արարքի համար վարորդը տուգանվում է խախտումների համար և այդ տուգանքների կուտակման հետևանքով վերջում նաև երկրորդ պատիժն է կրում՝ զրկվելով մեքենա վարելու իրավունքից:
 
Նկատելով, որ ԱԺ հանձնաժողովում քննարկումների ժամանակ գործադիրի ներկայացուցիչը փաստել է, թե այդ համակարգի ներդրաման նպատակն անկարգապահ վարորդներին ավելի խիստ պատժելն է՝ «Հայաստան» խմբակցության պատգամավորը բերեց հակառակի մասին փաստող վիճակագրություն. «2017 թվականին ՀՀ ճանապարհներին, ցավոք սրտի, ճանապարհատրանսպորտային պատահարների հետևանքով մահացել են 279 քաղաքացի, 2018 թ.՝ 343 , 2019 թ.՝ 341 քաղաքացի, իսկ բալային համակարգը ներդնելուց հետո 2021 թվականին ՀՀ ճանապարհներին մահացել են 368 քաղաքացի»:

Պատգամավորի խոսքով՝ բալային համակարգի ներդրման պայմաններում ՀՀ ճանապարհներին շատ ավելի քաղաքացի են զոհվել:

Գեղամ Մանուկյանը խոսեց նաև օրենքի նախագծի քաղաքական տարրի մասին և նկատեց, որ այսօրվա իշխանությունը 2018 թ-ին հանդես էր գալիս արագաչափերի և տեսախցիկների վերացման խոստումներով, բայց նրանց իշխանության տարիներին դրանք շատացան:

«Վերջապես ժխտվեց այն թեզը, որը կառավարությունում հնչեց դեռ 2018 թվականին, թե «քաղաքացին տուգանքի մատերիալ չէ», նաև այս բալային համակարգի ներդրմամբ ՀՀ քաղաքացին դարձավ շատ ավելի տուգանքի մատերիալ, որին և տուգանում են և բալերից զրկելով՝ զրկում են նաև մեքենա վարելու իրավունքից»,-հայտնեց Գեղամ Մանուկյանը: