Ձեր վստահելի աղբյուրը

«Բոլորս վրդովված ենք Բելառուսի նախագահի հնչեցրած խոսքերից, բայց գուցե փորձենք հասկանալ դրա պատճառնե՞րը»,- Ազգային ժողովում հայտարարությունների ժամին հարցադրում արեց «Պատիվ ունեմ» խմբակցության քարտուղար Հայկ Մամիջանյանը։

Նա նշեց, որ պատճառները հասկանալու համար խորհուրդ  է տալիս նորից լսել ՀՀ երրորդ նախագահ Սերժ Սարգսյանի և Ալեքսանդր Լուկաշենկոյի խոսակցության ձայնագրությունն ու տարբերել, թե ինչպես էին մինչև 2018 թ. խոսում մեր երկրի ղեկավարի հետ առանց տեսախցիկների, և ինչպես են խոսում Փաշինյանի հետ տեսախցիկների առաջ. «Պատերացո՞ւմ եք, թե ինչեր են ասում, երբ տեսախցիկներ չկան»։

Ընդդիմադիր պատգամավորի խոսքով, Բելառուսի նախագահն իր հարցազրույցներում իրեն թույլ է  տվել արտահայտություններ, որոնք անընդունելի է համարում։

«Հայաստանը գնալու տեղ ունի, ավելին՝ Հայաստանը հստակ նպատակներ ունի, Հայաստանը շարունակելու է մնալ Եվրոպան ու Ասիան կապող աշխարհաքաղաքական հանգույց, Հայաստանն ու Արցախը եղել են ու շարունակելու են մնալ քրիստոնյա աշխարհի դարպասը, Հայաստանը շարունակելու է լինել Արցախի ժողովրդի արդար ինքնորոշման երաշխավորն ու աջակիցը, մեր երկիրը ոտքի է կանգնելու ու մաքրվելու է կապիտուլյացիայի ու դրա պատճառը հանդիսացող խմբակին վերընտրելու խայտառակ խարանից:

Մեր երկիրը հմուտ դիվանագիտության միջոցով և դրան ուժ տվող արհեստավարժ զինված ուժերի գոյությամբ վերականգնելու է արդարությունը տարածաշրջանում։ Բայց այս ամենը տեղի է ունենալու միայն այն ժամանակ, երբ մեր երկրի կառավարչի միջազգային հարաբերությունների զինանոցը չսահմանափակվի, իբր, պարզաբանում պահանջող, իսկ իրականում «լայքեր» մուրացող հայացքով»,-հայտարարեց Հայկ Մամիջանյանը:

Նա հիշեցրեց՝ այս ամբիոնից բազմաթիվ անգամներ պահանջել է, որ ՀՀ ԱԳՆ-ն արձագանքի Ալիևի, Էրդողանի լկտի արտահայտություններին, բայց այսօր, ծանոթանալով Բելառուսի նախագահի հարցազրույցի արձագանքին, հասկացել է, որ  ավելի լավ է չարձագանքի։ 

Նա կոչով դիմեց նաև Բելառուսի նախագահ Ալեքսանդր Լուկաշենկոյին. «Ալեքսանդր Գրիգորիի, մի նույնականացրեք Հայաստանն ու Նիկոլ Փաշինյանին և երբեք չկարծեք, որ Հայաստանի հետ կարող եք խոսել այն նույն ձևով, ինչպես խոսում եք Փաշինյանի հետ»։

Բելառուսի նախագահ Ալեքսանդր Լուկաշենկոն Վլադիմիր Սոլովյովին տված հարցազրույցում կարծիք էր հայտնել, որ Բելառուսի և Ռուսաստանի Միութենական պետությանը կարող են միանալ հետխորհրդային տարածության նաև այլ հանրապետություններ, և մեծ հավանականությամբ՝ Հայաստանը, որովհետև «ոչ մեկին պետք չէ»: