Ձեր վստահելի աղբյուրը

Բելառուսի նախագահ Ալեքսանդր Լուկաշենկոյի հայտարարությունը նոնսենս է, բայց դրա պատճառները Հայաստանը պետք է փնտրի իր մեջ։ ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արմեն Ռուստամյանը՝ մեկնաբանելով Բելառուսի նախագահի հայտարարությունը։

«Բնականաբար, նման հայտարարություններով չպետք է հանդես գա առնվազն քո գործընկեր  պետությունը, սա նոնսենս է, միջազգային դիվանագիտական պրակտիկայում երևի սկանդալային դրվագներից մեկը կարող է համարվել։ Բայց պատճառները պետք է փնտրենք մեր մեջ։ Մենք ենք տեղիք տալիս, որ մեզ հետ այդպես քամահրանքով խոսեն։ Եվ միայն Լուկաշենկոն չի դա անում։ Հարևան երկրի նախագահը, հենց առիթ է ունենում, ոչ միայն այդ ոճով է խոսում, ուղղակի  նվաստացնում և վիրավորում է քո երկիրը և  ղեկավարին։ Բնականաբար, մենք այս նսեմացած վիճակի արդյունքներն ենք տեսնում»,- ասաց ընդդիմադիր պատգամավորը։

Նրա խոսքով, երբ հայտարարում էին՝ Հայաստանը կորցրել է սուբյեկտությունը, հեղինակություն չունի, որպեսզի պաշտպանի իրեն և ստիպի հաշվի նստել իր հետ, հիմա տեսնում են, որ դա իրականություն է, նման հայտարարությունները դրա հետևանքն են։

«Լուկաշենկոն այն օդիոզ անձնավորություններից մեկն է, որոնք ասում են, ինչ մտածում են՝ հաշվի չառնելով, թե կարելի է նման բառապաշար, ոճ կիրառել, թե ոչ։ Սա խոսում է լուրջ ներքին խնդիրների  մասին, խոսում է այն մասին, թե ինչ է տեղի ունենում կուլիսների հետևում»,- նշեց Ա. Ռուստամյանը։

Ընդդիմադիր պատգամավորն ասաց, որ եթե Հայաստանի ղեկավարը դիվանագիտական կորպուսին վիրավորում է,  բացահայտ ասում է՝ պետք է այնտեղ «յուրայինների» նշանակել, սա նշանակում է քանդել դիվանագիտական  պլացդարմը, որը ուներ Հայաստանը և հեղինակություն էր վայելում։

Նա նշեց, որ չպետք է խրախուսվի Լուկաշենկոյի ոճը, օրինակ չէ, որին պետք է հետևել։

«Ընդհակառակը, դա ցույց է տալիս, որ մենք  ունենք այնպիսի արտառոց դրսևորումներ, որ նսեմացված վիճակն արտահայտվում է  այս  կամ այն կերպ տարբեր մարդկանց հայտարարությունների մեջ»,- ասաց Արմեն Ռուստամյանը՝ հավելելով, այն, որ Հայաստանը կորցրել է իր հեղինակությունը, գործոնից վերածվել է գործիքի, բանակցություններում  խոսում են Հայաստանի մասին առանց հաշվի առնելու Հայաստանի կարծիքը, դա ակնհայտ փաստ է։

«Առիթ է, որպեսզի մեր մեջ խորը վերլուծենք  ու հասկանանք, որ այսպես շարունակվել չի կարող»,- ընդգծեց ընդդիմադիր պատգամավորը։

Ա. Ռուստամյանը նշեց, որ Լուկաշենկոն իր հայտարարություններն անում է՝ հաշվի առնելով իր շահերը. «Նա Հայաստանի հետ ռազմավարական շահերի անհրաժեշտություն չի տեսնում։ Ըստ էության, դա է նշանակում»։

Նա նշեց, որ դատապարտում է Լուկաշենկոյի հայտարարությունը,  բայց ընդդիմության դատապարտելով  հարց չի լուծվի, դատապարտող պետք է լինի պետությունը. «Այսօրվա իշխանությունների թեթև ձեռքով մեր արժանապատվությունը ոտնատակ տված տանում են»։

Ըստ նրա, որպեսզի ընդդիմությունը շտկի ստեղծված իրավիճակը, պետք է գա իշխանության։

«Չպետք է իշխանության գործառույթները դնել ընդդիմության վրա և մի բան էլ դժգոհել, որ ընդդիմությունը չի անում»,- ընդգծեց Ա. Ռուստամյանը։

Խոսելով միութենական պետության մեջ մտնելու հնարավորության մասին՝ նա ասաց, որ Հայաստանը պետք է պահպանի ինքնիշխանությունը և այնքան հզորանա, որ ինքը որոշի իր ճակատագիրը։

«Եթե այնքան թուլանանք, կշարունակվի նսեմացման  գործընթացը, մեր փոխարեն կորոշեն, մեզ չեն էլ հարցնի, ինչպես եղավ կապիտուլյացիան։ Եթե այսպես շարունակվի, մենք  արդեն ոչինչ չենք որոշի»,- ասաց «Հայաստան» խմբակցության պատգամավորը՝ ընդգծելով, որ ժողովուրդը պետք է ոտքի կանգնի, փոխի այս իրավիճակը։ 

«Իշխանությունները մեզ տանում են օտար օրակարգերով, տանում են կործանման։ Հայաստանը տանում են թուրքացման, Արցախը՝ հայաթափման։ Սա է իրականությունը»,- ասաց Արմեն Ռոստամյանը։