Ձեր վստահելի աղբյուրը

Գորիսի քաղաքապետ Առուշ Առուշանյանի հայրը` Գագիկ Առուշանյանը շնորհակալություն հայտնեց Վերաքննիչ դատարանի դիմաց ի աջակցություն, զորակցություն որդու հավաքված մարդկանց։

Նա և պաշտպանը խնդրեցին, որ մարդիկ գնան տուն. ցուրտ է, գործեր կունենան, իսկ դատական նիստը, որ ընդմիջվել է, կարող է երկար տևել։

«Մի սպասեք լավ բանի այս վիճակում։ Ի՞նչ ասեմ, արդեն դատավոր են կալանավորում։ Ի՞նչ միտք ունի խոսել»,-լրագրողների հետ զրույցում ասաց Գագիկ Առուշանյանը։

Ի աջակցություն  Առուշ Առուշանյանի դատարան էր եկել նաև «Ժառանգություն» կուսակցության հիմնադիր Րաֆֆի Հովհաննիսյանը։ Վերջինը համարում է, որ Գորիսի քաղաքապետը քաղբանտարկյալ է։

«Պետք է թույլ տան, որ ընտրված քաղաքապետը ծառայի իր համայնքին։ այնպես պետք է լինի, որ Հայաստանը չունենա հավելյալ քաղաքական բանտարկյալներ։ Մեծ ցավ եմ ապրում, որ Հայաստանն այս վիճակում է, մարդիկ, որոնք եկան իշխանության ժողովրդավարությամբ, մեր երկրի համար ապահովում են քաղաքական բանտարկյալներ»,-ասաց Հովհաննիսյանը։

Հիշեցնենք, որ վերաքննիչ դատարանի դատավոր Ռուբիկ Մխիթարյանը քննում է Գորիսի քաղաքապետ Առուշ Առուշանյանի կալանավորումը գրավով փոխարինելու վերաբերյալ պաշտպանի միջնորդությունը մերժելու վերաբերյալ ընդհանուր իրավասության դատարանի որոշման դեմ բերված բողոքը։