Ձեր վստահելի աղբյուրը

Վերաքննիչ քրեական դատարանում Գորիսի քաղաքապետ Առուշ Առուշանյանի պաշտպան Էրիկ Ալեքսանյանն իր բողոքը քննող դատավոր Ռուբիկ Մխիթարյանին հիշեցրեց՝ երեկ կայացրած որոշման՝ այսինքն իրականացրած արդարադատության համար կալանավորվել է Սյունիքի մարզի ընդհանուր իրավասության դատարանի դատավոր Բորիս Բախշիյանը։

«Դատավոր Բախշիյանի, իմ, բազմաթիվ իրավաբանների համոզմամբ, դատավորը գործել է բարեխղճորեն և կայացրել է օրինական դատական ակտ։ Սակայն դաախազության, առավել ևս քաղաքական իշխանության համոզմամբ, դատավոր Բախշիյանը չի եղել բարեխիղճ և չի կայացրել օրինական դատական ակտ։ Մենք ունենք փաստ, որ դատավորը կալանավորվել է իր կայացրած որոշման համար»,-իր խոսքում նշեց Ալեքսանյանը։

Նա ասաց՝ իր մոտ ողջամիտ կասկած կա, որ բացառությամբ մի քանի դատավորների ստանդարտից դուրս քրեական գործերով, որոնցով հետաքրքրված են քաղաքական իշխանությունները, մյուս դատավորներն ուղղակի չեն ունենա համարձակություն օրինական հիմքերի առկայության պարագայում ամբաստանյալի  նկատմամբ ընտրված խափանման միջոց կալանքը գրավով փոխելու որոշում կայացնել։

«Հիմա նույն վիճակում այսօր հայտնվել եք Դուք, հարգելի դատարան։ Փաստան այն է, որ դուք իրականցնում եք քննություն ստանդարտից դուրս քրեական գործով։ Հիմա ես ուզում եմ հասկանալ, ո՞րն է այն երաշխիքը, որ եթե լինեն օրինական հիմքեր Առուշ Առուշանյանին ազատ արձակելու վերաբերյալ, դուք կկայացնեք նման դատական ակտ՝ չունենալով մտավախություն, որ դրա համար կարող եք հետագայում ենթարկվել քրեական հետապնդման, ընդհուպ կալանավորվել»,-ասաց նա՝ նշելով, որ այսուհետ ոչ ստանդարտ գործերով միշտ այս հարցը տալու է դատարանին։

Փաստաբանը նկատեց, միգուցե դատավորը նման երաշխիքը պայմանավորի իր աշխատանքային գործունեությամբ, ապա հիշեցրեց, վեց ամիս առաջ նույն դատավորը անձեռմխելիության, կալանավորման հետ անհամատեղելի հիվանդության պայմաններում կալանավորել է Արմեն Չարչյանին,  երեկ կալանավորել է Մանվել Փարամազյանին, ով ազատության մեջ դրսևորել է պատշաճ վարքագիծ, ի վերջո երկու տարի առաջ հակասահմանադրական հոդածով կալանավորել է ՀՀ երկրորդ նախագահ Ռոբերտ Քոչարյանին։

«Այս ամենը վկայում է այն մասին, հարգելի դատարան, որ Դուք չեք ունեցել համարձակություն անգամ օրինական հիմքերի դեպքում կայացնել անաչառ որոշում։ Կյանքը ցույց տվեց, որ Դուք իրավաբանության տեսակետից կայացրել եք ոչ անաչառ որոշումներ։ Հիմա ո՞րն է այն երաշխիքը, որ այս քրեական գործը բացառություն է, և Դուք չեք ունենա մտավախություն և օրինական հիմքերի առկայության պարագայում կկայացնեք համարձակ որոշում։ Այս հարցի պատասխանը շատ կարևոր է, որպեսզի ես հասկնամ՝ ինքնաբացարկի միջնորդություն ներկայացնե՞մ, թե՞ ոչ»,-ասաց նա։

Ի պատասխան, դատավոր Ռուբիկ Մխիթարյանն ասաց՝ չի մեկնաբանի Բախշիյանի գործտ, չի բացառվում, որ ինքը հետագայում առնչություն ունենա այդ գործի հետ։

«Մնացածը դատարանը դիտարկում է որպես Ձեր անձնական դիրքորոշում»,-ասաց դատավորը։

Ռուբիկ Մխիթարյանն ասաց՝ մյուս գործերով կայացրած դատական ակտերը չեն բեկանվել։

«Տպավորություն ունեմ, Դուք լավ չեք ուսումնասիրել Չարչյանի գործ
Ով նյութերը։ Մնացած մասով կարող եմ ասել, բոլո դեպքերում իմ գործունեության ընթացքում որևէ ազդեցություն իմ նկատմամաբ չի եղել, չի էլ կարող լինել։ Բոլոր դատական ակտերը կայացվել են օրենքի ու փաստերի համադրմամբ»,-ասադ Ռ. Մխիթարյանը։

Էրիկ Ալեքսանյանն ասաց՝ պատասխանն իրեն չգոհացրեց, բայց ինքնաբացարկ էլ չի հայտնի, հիշեցրեց, որ կյանքում ոչինչ հավերժ չէ, այդ թվում այս քաղաքական իշխանությունը։