ՄՊՀ-ն հրապարակել է թռչնամսի շուկայի ուսումնասիրությունը

Տնտեսություն 17:03 08/02/2022

ՄՊՀ-ն հրապարակել է թռչնամսի շուկայի ուսումնասիրությունը

Տես նաև`Թռչնամսի շուկայում առկա խնդիրները. Ինչպե՞ս կառավարել ռիսկերը

Հայաստանում նախադրյալներ են ստեղծվել հավի մսի արտադրության ընդլայնման համար։ Նման եզրահանգման է եկել Մրցակցության պաշտպանության հանձնաժողովը՝ թռչնամսի շրջանառության ոլորտում իրականացված ուսումնասիրության արդյունքում։

Համաձայն ուսումնասիրության արդյունքների, «հավի միս» ապրանքային շուկան ունի կենտրոնացվածության միջին աստիճան: Ոլորտում գործող ընկերությունների միջև առկա է էական մրցակցություն՝ չնայած այն հանգամանքին, որ և՛ ներմուծողների, և՛ արտադրողների շրջանում առկա են առաջատար ընկերություններ:

2014-2020 թվականների ընթացքում զգալի նվազել է առավել խոշոր ներմուծման ծավալ ունեցող տնտեսավարող սուբյեկտի մասնաբաժինը՝ 68 տոկոսից կազմելով 37 տոկոս:

Ավելացել է նաև հավի մսի իրացման առաջնային շուկայում գործունեություն ծավալողների թիվը՝ 2018 թվականին՝ 60 տնտեսավարող, 2020 թվականին՝ 66:

2015-2020 թթ ընկած ժամանակահատվածում ՀՀ-ում հավի մսի տեղական արտադրության ծավալն աճել է շուրջ 2,5 անգամ, այնուամենայնիվ հավի մսի ինքնաբավության մակարդակը դեռևս ցածր է՝ 30 տոկոս:

Ուսումնասիրությունը ցույց է տվել, որ նպաստավոր նախադրյալներ են ստեղծվել թռչնամսի տեղական արտադրության զարգացման և ընդլայնման համար, քանի որ վերջին տարիներին ամբողջ աշխարհում ավելացել են թռչնամսի սպառման ծավալները, և հիմքեր կան կանխատեսելու, որ արդեն 2030 թվականին աշխարհում մսի արտադրության և իրացման ծավալների մեջ թռչնի միսը կկազմի սպիտակուցի պարունակությամբ մսի ընդհանուր ծավալի 41%-ը:

Ուսումնասիրությունն իրականացվել է ՀՊՏՀ «Ամբերդ» հետազոտական կենտրոնի հետ համատեղ:
Ուսումնասիրությանն ամբողջությամբ կարող եք ծանոթանալ հետևյալ հղմամբ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: