Ձեր վստահելի աղբյուրը

«Այսօր մինչև երեկոյան սպառիչ պատասխան կստանաք»,- խորհրդարանական ճեպազրույցների ընթացքում ասաց «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ պատասխանելով հարցին, թե 44-օրյա պատերազմի հանգամանքներն ուսումնասիրող հանձնաժողով պետք է ստեղծվեր, 1,5 տարի է անցել՝ ինչո՞ւ չի ստեղծվում։

Մեկ այլ հարցի, թե ինչո՞ւ են հրապարակվում հայրենիք վերադարձած գերիների անունները, իսկ պատերազմի ընթացքում զոհերի անուն-ազգանունները չեն տրամարդվում ոչ ՀՀ ՊՆ-ի, ոչ ԱՀ ՊԲ-ի կողմից, ասում են՝ «չենք կարող տրամադրել», ոչ մի հիմնավորում չի հնչում, նա պատասխանեց. «Ճիշտ են անում, որ չեն տրամադրում այս պահին՝ ելնելով ինչ-ինչ  հանգամանքներից»։

Նա չնշեց, թե այդ ինչ հանգամանքներ են, միայն ասաց, որ գոյություն ունեն նման հանգամանքներ։

Լրագրողներից մեկը ճեպազրույցի ժամանակ հիշեց երեկ ԱԺ ամբիոնից Նիկոլ Փաշինյանի հայտարարությունից, որ չնայած երկրում իրադարձություններ էին տեղի ունենում, սակայն ինքը երբեք ավտոմատով, զենքով ման չի եկել։

«Համացանցում երեկ  հայտնվեց տեսանյութ, որտեղ Երևանի Դեմիրճյան փողոցով Փաշինյանն անցնում է, մեքենայի միջից  անվտանգոթյան աշխատողն ավտոմատի փողը ուղղել է դեպի ժողովուրդը։ Մեկնաբանություններ են հնչում՝ կամ անվտանգության աշխատողը կամ Փաշինյանը, որևէ տարբերություն չկա, ավտոմատի փողը ժողովրդին է ուղղված։ Ինչպե՞ս կարձագանքեք այս ամենին»,- հարցրեց լրագրողը։ 

Անդրանիկ Քոչարյանն ասաց, որ  շատ բնական է,  անվտանգության աշխատակիցները զինված են, իրենք ունեն հստակ գործառույթ։

«Փողոցում ժողովուրդ էլ կա, մեքենա էլ կա,  հանցագործ էլ կա, ավտոմատը պարզապես իր համար անհրաժեշտ վիճակում է գտնվում, եթե անհրաժեշտ լինի դա  կիրառել։ Տա Աստված, որպեսզի այդ անհրաժեշտությունը երբեք չլինի»,- նշեց նա։