Ձեր վստահելի աղբյուրը

«Հայաստանում կան քաղբանտարկյալներ։ Սա նաև Հայաստանում ԵՄ դեսպանի ականջի համար է»,-հայտարարեց «Քաղաքացիական գիտակցություն» ՀԿ նախագահ Նարեկ Սամսնյանը՝ ելույթ ունենալով Հայաստանում ԵՄ ներկայացուցչության դիմաց ընթացող ակցիայի ժամանակ։

Նա նշեց, Հայաստանում կան բազմաթիվ մարդիկ, որ բանտերում են, որ ենթարկվել են հետապնդումների՝ որևէ քրեական գործողության ու արարքի հետ բնավ կապ չունենալով։

«Այս ամենն արվում է, քանի որ երկրում մի հոգեկան հիվանդ որոշել է, որ իր դեմ ցանկացած քաղաքական խոսք պետք է ճնշվի բռնի, խայտառակ «իրավական», ոչ իրավական ճանապարհներով։ Այ էս ցանկապատից այն կողմ կուչ եկած մեկը, որ երեկ խոսում էր ավտոմատով փողոցում քայլելուց, ամեն բան անում է, որ մեր երկրում ցանկացած օրենք բռնաբարվի»,-ասաց հասարակական գործիչը։

Սամսոնյանը նշեց, որ «վախից կուչ եկած այս երևույթը» ոստիկանությանը ստորացրել է ու դարձրել «պոլի շոր»։

«Ես սա ասում եմ մեծ ցավով։ Ոստիկանը ամեն օր ժամը 7-ից քաղաքական գործչի տան դիմաց կանգնած սպասում է,  որ այդ գործչին պոլին տա, որ դրանից մի հոգեկան հիվանդ ոգևորվի։ Սա ժողովրդավարություն չէ, տիկին դեսպան։ Ձեր դերն այստեղ ոչ թե դեղձի չիր աշխատելն է, այլ ժողովրդավարական ինստիտուտները պահպանելն է»,-նշեց Սամսոնյանը։

Նա կարծում է, եթե Հայաստանի վիճակում գտնվող պետության մասին մի մարդ ասեր, որ ժողովրդավարական պետությունն է, ինչպես ԵՄ դեսպանն է հայտարարել, ապա նրա երկրում այդ մարդուն կուղարկեին հոգեբուժարան։

«Ժողովրդավարական արժեքներն առ ոչինչ են այս երկրում, քանի որ այս երկրում կա Նարեկ Մանթաշյան, որը կալանավորված է, այս երկրում կան բազմաթիվ համայնքապետեր, որոնք նստած են նրա համար, որ դուք այստեղ դեղձի չիր չաշխատեք, պաշտպանեք ժողովրդավարությունը։ Դա դեր չի, որ ստանձնել եք։ Տիկին դեսպան, դուք պղծել եք ժողովրդավարական արժեքները, որովհետև մեր երկրում կան նման մարդիկ, որովհետև ոստիկաններն առավոտից իրկուն քնում են մեր դռների առաջ, ոչ թե բռնում են թմրանյութ տարածողներին»,-ասաց նա։