Ձեր վստահելի աղբյուրը

«Ֆուտբոլային դիվանագիտության և այսօրվա նվաստացուցիչ իրականության միջև զուգահեռներ անցկացնելը ոչ միայն տգիտություն է, այլ անբարոյականություն է»,- «Հաշտեցում Բայրաքթարների տակ» թեմայով քննարկմանն ասաց ՀՀԿ ԳՄ անդամ Էդուարդ Շարմազանովը։

Այնուհետև նա նշեց, թե որն էր իրենց և այս իշխանության հայեցակարգային գլխավոր տարբերություններից մեկը. «Մենք Թուրքիան և Ադրբեջանը համարում էինք սպառնալիք, այս մարդիկ Թուրքիան և Ադրբեջանը համարում են լավ հարևան, հաշտեցման գնացող, խաղաղասիրության դարաշրջան են ստեղծում»։

Նա ընդգծեց, որ 100 տարում որևէ բան չի փոխվել և այս իշխանությունը կանգնում ու ասում է հաշտեցում. «Հայ տղաներին սպանած թուրքերի հետ հաշտեցման գնալը սրբապղծություն և  անարգանք է Եռաբլուրի հանդեպ։

Բոլոր նրանք, ուզում են նախկին լինեն, ներկա կամ ապագա, ովքեր այսօր հայտարարում են, որ Թուրքիայի հետ պետք է  գնալ հաշտեցման ու այս պայմաններում, նրանք պղծում են Եռաբլուրը»։

Նա նշեց, որ Սերժ Սարգսյանի ֆուտբոլային դիվանագիտության գնդակն իր կարգավիճակով ավելի բարձր արժեք էր, քան այսօրվա իշխանությունները հայ-թուրքական գործընթացում։

«Սերժ Սարգսյանին մեջբերում էր Քլինթոնը, իսկ սրանք մեջբերում են Ալիևին և Էրդողանին»,- ասաց Էդ. Շարմազանովը։

Ընդդիմադիր քաղաքական գործչի խոսքով, թուրք-ադրբեջանական տանդեմի 100 տարվա  միակ երազանքը եղել է Սյունիքով ճանապարհ բացելը, այդքան շահագրգռված չեն եղել հետ բերել Ղարաբաղը,  ինչքան այդ ճանապարհը բացեն։

«Դա կենսական նշանակություն ունի,  պանթուրքիզմի ճանապարհն է։ Մեզ համար ռազմավարական նշանակություն ուներ Հյուսիս-հարավ ճանապարհը, սրանց համար՝ պանթուրքիզմի ճանապարհը։

Այս իշխանությունը ուղնուծուծով հակահայկական է, անգրագետ է, չի ճանաչում Թուրքիան և գնում է գելի բերան։ Քիչ է  այս իշխանությունները համաձայնվում են այդ պանթուրքիզմի ճանապարհին, մի հատ էլ Հայաստանն իր գրպանից 200 միլիոն դոլար է դնելու պանթուրքիզմի ճանապարհը  կառուցելու վրա։ 

Ի՞նչ հաշտեցում կամ ի՞նչ տնտեսական շահ»,- ասաց Էդուարդ Շարմազանովը։